الثلاثاء، نوفمبر 20، 2007

اذكرينى


اذكرينى يا حبيبة
اذكرينى يا قريبة
اغفريلى يوم ما سبتك
صدقينى
كان غصب عنى
و غصب عنك
....
اذكرينى يوم ما قابلنا بعض
و لا قلنا اى كلام لبعض
ده العيون اتكلمت
و القلوب اتبسمت
....
اذكرينى يوم ما رحت لباباكى
شوفى قاللى ايه
قاللى يابنى انا زى والدك
لكن دى بنتى
....
و قاللى كمان
الخبز قبل الحب أحياناً
معلش يا بنى
كان نفسى أحط ايدى فى ايدك
لكن سامحنى
مش بإيدى و لا بخاطرى
....
أصل زمانى كان
غير زمانك
بتحب بنتى
طب حتصرف عليها إزاى
تعال قوللى
.....
و فى يوم ما سبتك
قلتلك
صدقينى انا ما بعتك
.....
اذكرينى بالخير يا حبيبة
و لو شوفتنيى بعد السنين
انسى اللى كان بينا
انسى الشوق و الحنين
و قوللى لإبنك ده صديق العيلة
و سبينى أبوسه و يقوللى عمو
اصله ده ابن الغالية
.........
لكن انا قبل ما أمشى
عايز أقوللك
يوم ما سبتك
ده كان
يوم وفاة الرومانسية

هناك 12 تعليقًا:

البدراوى يقول...

ايه ياعم انت اللخبطة دى بقى نفس الاسم من غير الف ولام

بقى ابوها قالك كده وانت سكتله
ولايهمك انت كده عملت اللى عليك

مش عارف حاسس من كلامك ان الموقف ده حصلك بجد وبالتفاصيل كمان

وعموما بالنسبة لسؤالك ياسيدى انا اصلا من الصعيد انت منين بقى ؟

تحياتى ليك يا بدراوى

Yassewr Adel يقول...

و قوللى لإبنك ده صديق العيلة
و سبينى أبوسه و يقوللى عمو
اصله ده ابن الغالية

أنا عمري ما شفت حد بيحب كده
انت نبيل في زمن الندالة
ياريت تقدر تعيش لحاد ما نتصاحب
أنا محتاج أعرف إنسان زيك

بدراوى يقول...

الى البدراوى (ألف و لام )

الصعايدة أجدع ناس

أما انا بقى من الإسكندرية

(مش عارف حاسس من كلامك ان الموقف ده حصلك بجد وبالتفاصيل كمان)

لا و الله محصلى الموضوع كله من خيالى

و من ولاد أفكارى لا أكثر

و بس يارب ميحصلشى لحد أبداً

بس انت ادعى !

بدراوى يقول...

الى ياسر عادل

أشكرك على تعليقك الجميل

أنا عمري ما شفت حد بيحب كده
انت نبيل في زمن الندالة
ياريت تقدر تعيش لحاد ما نتصاحب
أنا محتاج أعرف إنسان زيك

لحد ما نتصاحب ماحنا صحاب أصلاً
ده كلام يا راجل تقوله

و بعدين ياه تقدرتعيش ديه
أى نعم الأعمار بيد الله و ممكن اى يموت فى أى سن
بس انت محسسنى انى من أيام سعد زغلول

yasser adel يقول...

لا بس قصدي تستحمل العيشة في الغابة وانت قلبك قلب غزالة
الموضوع صعب شوية على نبيل في زمن الندالة

بدراوى يقول...

يا اه يا اه على القوافى المضبوطة

ايه ده يا عم ياسر

أما بالنسبة ان قلبى قلب غزالة اى نعم أه

لكن ساعة الجد لحمى مر

و ساعات بمشى بالمثل ده

عيش ندل تموت مستور!

لكن الأصل انى انسان
بحب الخير للكل
المهم نعيش عيشة فل
با نموت احنا الكل !

yasser adel يقول...

عليك الفل يا سيد الكل
أنا بجد بمعرفتك فرحان
وإوعى تكون لساك بردان

يَحيى المِصري يقول...

يا ترى مين اللي دق آخر مسمار في نعش الرومانسية

MAKSOFA يقول...

حبي الأول هو حبي الأخير

البدراوى يقول...

كل سنة وانت طيب يا جميل
عيد سعيد

غير معرف يقول...

~.................................

زينـه يقول...

فعلا من اجمل ما كتبت يا بدرواي
أحييك