فاعل خير

تحديث : ظهر الشخص الحمد لله

شكراً ليه

و بكدة نقفل التعليقات على البوست ده

جائتنى رسالة على الميل من صديق مدون
الرسالة بخصوص شغل من المفترض انى اقدم فيه
و الحقيقة الصديق المدون ما هو الا واسطة خير
بينى و بين الأخ و الأخت اللى طلبت منه يرسل الرسالة
لبدراوى اذا وجد وسيلة للتواصل معاه

و انا لحد دلوقتى مش عارف مين الشخص ده
لسبب واحد مهم
ان الشغل ده من المفترض انه فى القاهرة
و انا مش من القاهرة
و لو نزلت ببقى نازل على شىء محدد
مش مشوار على الفاضى

اكيد واسطة الخير صادق فى رسالته
بس برده انا من حقى اعرف مين الشخص ده
و اظن اى حد مكانى لازم برده يبقى عارف
و لا ايه ؟

فياريت لو هو اخ مدون او اخت مدونة
يسيب تعليقه أو تسيب تعليقها و يقولى هو مين
او حتى يبعتلى او تبعتلى على الإميل
اللى سبته فى البروفيل

مش عايز اشتغالات فى التعليقات على فكرة

!

أوباميات

البوست ده حنشره بعد الحاح من الصديق مهندس حر

و هو عشان خاطره حنشره

و يالا اهه دماغى روحت رشيت عليها مبيد حشرى

و شلت الصراصير اللى فيها

:-)

اه و مش رحت عملت تحليل مرارة طلع انى معنديش مرارة اصلاً

و انى مولود كدة فبسأل الدكتور طب و فقعة المرارة اللى جاتلى ديه منين

قالى لأ انت صباع رجلك الصغير بيدوحس لما تتضايق .

و بعدين لو انا مخنوق مش لازم اخنق على اللى حواليا

يعنى خليهم يضحكوا حيبقى بدراوى و مصر عليهم

اه و بالنسبة للبعض اللى زعلت من تعليقاته فى البوست اللى فات

انا مش زعلان من اى حد خالص ،

بس معلش اصل انا مقولتش لحد انى شخص حساس اوووى

و دمعتى على خدى ، و اى موقف ممكن يضايقنى ، فإنسوا اللى حصل

انا بعتز بيكوا كلكوا .

يالا جهزوا بقى الترمس و اللب و السودانى و الببس و فيه حد حيعدى بكشاف نور دلوقتى

اللى حاجز كرسى غلط يقول من دلوقتى عشان منقوموش فى نص البوست

ممنوع التدخين ، السرعة مراقبة بالرادار ، تصحبك السلامة

--------

1

أوباما ياس وى كان

بينما كنت امشى فى احد الشوارع
مرتدياً تى شيرت عليه صورة اوباما
و تحتها كلمة

Yes we can و

كلمة

The Change we need

و هما اشهر شعارات لحملة أوباما

استوقفنى احد الأشخاص اللى سحنته مدياه على مخبر
و الحقيقة هو مش استوقفنى ده هو عبطنى

و قالى ايه يا روح امك اللى انت لابسه ده
و ايه قلة الأدب و الأباحة اللى انت كاتبها ياد يا امور يا نايتى

طبعاً أنا استغربت بيعرف انجليزى ازاى

طلع انه لفت نظره صورة اوباما

و قاللى صورة مين الأخ اللى على التى شيرت ده انا بشبه عليه شبه واحد صاحبى بيشتغل بواب

رديت قولتله : لا سيادتك ده اوباما

قاللى : اوباما و راح مكلم فى اللاسلكى الضابط اللى فوقيه و قاله يا فندم قبضنا على واحد حاطط صورة واحد اسمر اسمه اوباما و بيقول كلام افرنجى كدة باينه كلام ابيح و قلة ادب و مسخرة .
---
-

نعم يا فندم ايوا نقبض عليه ؟ الضابط رد : هاته معاك من قفاه

قولتله سيادتك ده اوباما ،
قاللى ماليش فيه : عيب اختشى بقى بأم الكلام الأبيح اللى انت فرحان بيه ، انت ياض باينك لا مؤخذاة و لا ايه ،
و قام بالبصق على الأرض و قال قايل اسفوخس عليك حتروح من ربنا فين

!

و انا عمال اشرحله أن الكلام المقصود بيه ، احنا نقدر و التغيير اللى احنا عايزينه
يقولى : انت باين عليك حتودخنى معاك .

و انا اقوله يا جدع : ده اوباما الرئيس الامريكى ، طبعاً قولت اما ألبس تهمة العمالة للخارج ، أحسن ما ألبس تهمة الدعوة للإنحلال و الفجور و الخروج عن الأخلاق .

قاللى المخبر : امريكى كمان ، تلاقيك عايز يبقى فيه حقوق للتيييت و قال كلمة فيها حرف الخ

طبعاً أيقنت انى لابس التهمتين لابسهم

وقفت واحد فى الشارع شكله محترم و متعلم و الأهم ان شكله راجل لحسن عمك المخبر يقولك ده واحد من اياهم

قلت للمخبر طب إسأل الأخ ده و هو يقولك

قالى ماليش فيه : أوباما بينا على البوكس ياض

!

بعدما شد و جذب بينى و بين الضابط ، قالى انا حفرج عنك ، بس اياك اشوف الكلام الأبيح ده
تغيير و نعم نستطيع ناقص تكتب حامد يا جامد ، احنا شعبنا زى الفل مش محتاج تغيير

!

خرجت من عنده و قوم اول حاجة عملتها روحت البيت حرقت التى شيرت ، و نزلت اشتريت تى شيرت عليه صورة هيفاء و لزقت عليه بالمكواه نفس عبارات اوباما .

Yes we can
The Change we need

كدة بقت قباحة رسمى

!!

و من يومها كل ما اشوف حضرة المخبر اياه يضحك بسخرية و يغمزلى ويقول ايوا يا عم ياس وييى كان – ميكونش ليه – اااااااه البت هيفاء ديه لخبططلى مخى ، و بفكر اتجينش الولية اللى فى البيت .

!

---------

تم كتابتها قبل زواج صاحبة الصون و العفاف هيفاء بنت وهبى ، عشان ديه اعراض ناس

!

--------

2

أوباما فى جامعة القاهرة

و أثناء دخوله الجامعة الضابط على البوابة قاله رايح فين حضرتك ؟
قاله انا اوباما رئيس امريكا
الضابط قاله لو كنت رئيس كوبا حتى طلع الكارنيه يا اموور
قاله كارنيه ايه بقولك انا باراك اوباما ياس وى كان
الضابط قاله كان ، قول الزمان ارجع يا زمان

و بعدين قال لرئيس الحرس يا باشا عايز يخش الكلية و معاهوش كارنيه ادخله؟
رئيس الحرس قاله هاتهولى ابن الفقرية ده
اما اشوف ايه حكايته
طبعاً ماسكه شتيمة و تلطيش و قلة قيمة
و قاله اهاليكوا بيصرفوا عليكوا عشان تيجوا تتصرمحوا هنا يا ولاد الكلب نسيت الكارنيه يا امور

!!
نسيت تأكل نسيت تشرب و كمان لا معاك ورقة و لا قلم و لا كشكول من ابو سلكة و بعدين راح تافف فى وشه

و قاله اركن على جنب لحد اما افطر و اشرب شاى و اشوف ايه حكايتك بلاوى بتتحدف علينا من انهى نصيبه
و بعدين بعد كدة افتكر اوباما انه معاه الحافظة بتاعت دفع المصاريف فطلعها للضابط و دخل الكلية

يدوبك لحق خطاب الرئيس فى اخره
لولا انه غمس عم سيد اللى كان قافل باب المدرج
ببريزة عشان الريس رافض حد يخش بعديه
كان اوباما اتاخذ غياب

بس اللى شافوه قالوا انه اول ما دخل الريس شخط فيه و قاله
جاى متأخر و بتتكلم كمان طبعاً قال للى جنبه ورق و قلم بسرعة الحق انقل اللى فاتنى فقاله يا عم فكك منى
حبقى اديك المحاضرة تصورها برة

فى الريست بقى
طلع ضرب سنتدوتشات كبدة مع أخت كدة اتعرف عليها فى المحاضرة
و جاله عسر هضم و باطنه سابت و ملحقش يعمل مباحثات ثنائية مع الريس

لأنه قضى يومه كله فى حمام الكلية المقرف بعد ما كان عايز يخش حمام اساتذة الجامعة و قال للواقف على باب الحمام معلش يا عم انا واخذ ماجستير من جامعة هارفارد

قاله فين الشهادة اللى تثبت طلعها و روح ادفع 5 جنيه خدمات تعليمية فى الخزنة و بعدين 75

جنيه مصاريف فى البنك و بعدين روح اختمها من شئون الطلبة
و بعدين ادخلك الحمام
طبعاً اضطر يخش حمام الطلبة
اتقفش جوا من الامن كان بيلف سيجارة مارجوانا
---
و بعدين بعد ما خلص
شاف العيال اللى بتحب على روحها فى الجونينة
قال ده شىء هايل جميل أنا فى غاية السعادة
ثم قبل ان يغادر الجامعة قال بلغة عربية واضحة ميتين ابو التعليم و اللى بيتعلموه

البنات فى المنصورة و أشياء أخرى

1

لكل مدونى مدينة المنصورة
و اللى لاحظت انهم عاملين جالية منصورية كبيرة على البلوجر
فكل ما اجى اتعرف على مدونة لأخ او اخت الاقيه من المنصورة ايه الحكاية

فبدعوكم لحضور حفل التوقيع الثانى لكتاب البنات عايزة إيه للأخت العزيزة

بسمة عبد الباسط و صديقتها بدرية طه
و اللى حيكون فى المنصورة

الحفل إن شاء الله يوم الجمعة القادم 5 يونيو من الساعة 6 الى 9 مساءاً طبعاً و اكيد هههههههه
:)

فى المنصورة مكتبة
Books & Beans

7

ش جزيره الورد المشايه السفليه امام نادي الجزيره

------

2

أحب ادعوكم لزيارة مدونة أدى حال الدنيا و مدونة حكايا الأميرة
للأخت العزيزة أميرة ويلز

و مدونة قلم كحل للأخت العزيزة زينة مدحت

و بجد الكلام ده مش بس لأن مدوناتهم تستحق
لأ كمان لأنهم
من انبل و اعز و ارقى الشخصيات اللى ممكن تعرفها فى حياتك .

------

3

انا الفترة القادمة حتوقف عن التدوين - بس طبعاً حبقى اعلق فى مدونات الأصدقاء -

بعد معركة النقاب حامية الفطيس ،
و ده مش السبب الرئيسى للتوقف بالطبع لكن هو احد الأسباب المهمة ،
عشان يدوبك ألحق اعمل تحليل مرارة أشوفها اتفقعت و لا لسة

و كمان عشان التدوين ده مالوش اى لزمة اصلاً ،
انا عندى كلام اقوله اه مقولناش حاجة ،
بس انا بفضل اهرى و احط فى نفسى لحد ما اطق
و خلاص ، بلا تدوين بلا قرف ،

صحيح ان عالم التدوين هو عالم مهم بالنسبة لى كشخص
يعتبر الكتابة شىء مهم فى حياته ،
صحيح كمان ان على المستوى الواقعى
ماليش صداقات كثير او تقريباً مفيش ،
و ان معظم التواصل بينى و بين المدونين
هو تواصل بيحسسنى انى عايش و مش لوحدى

بس واضح كدة انى بيبقى عشمى زيادة اووووى فى الناس ،
فأستكمل رحلتى مع وحدتى و اسعى على مستقبلى لوحدى
زى ما انا طول عمرى لوحدى

و فى الحقيقة و الواقع كل حاجة فى حياتى
بعملها لوحدى حتى وسط اهلى ماشى و ليا دماغ لوحدى
بس خلينى كدة اريح ،
انا لما بتخنق مبعرفش اتكلم و لا اقول حاجة ،
فخلينى كدة افضل

اه نسيت قبل ما اخلص كلامى ،
كنت مجهز بوست ساخر عن باراك اوباما ،
بس بقول خليه مركون كدة احسن بلا نيلة .

النقاب – رأى شخصى

التدوينات السابقة: كلام الشيخ الغزالى 1 ، 2 ، كلام الشيخ الألبانى

-----

1

هذا رأيى الشخصى فى النقاب ، و الذى أقوله بعد أن طرحت كلام الشيخ الغزالى الذى قال ان النقاب عادة بحسب فهمى لكلامه و كلام الشيخ الألبانى الذى لم يقل ان النقاب فرض و لكن قال انه مستحب
. و فى اخر التدوينة رد على تعليقات محددة فى التدوينتان التى نشرت فيها كلام الغزالى رحمه الله .

النقاب عادة ، هذا هو فهمى و اعتقادى فى النقاب ، النقاب ليس من الإسلام أيضاً انا مقتنع بهذا ،
لكن على استعداد ان اتقبل الإعتقاد بأنه فضل او فرض او سنة كما قال الشيخ الألبانى – أقول اتقبل و ليس اقتنع ،

و حتى لو كان هو ملابس امهات المؤمنين الذين نجلهم و نحترمهم بالطبع ، فهم لهم تشريع خاص بهن ، هن لسن كأحد من النساء ،

يَا نِسَاء النَّبِيِّ مَن يَأْتِ مِنكُنَّ بِفَاحِشَةٍ مُّبَيِّنَةٍ يُضَاعَفْ لَهَا الْعَذَابُ ضِعْفَيْنِ وَكَانَ ذَلِكَ عَلَى اللَّهِ يَسِيراً{30}

{يَا أَيُّهَا الَّذِينَ آمَنُوا لَا تَدْخُلُوا بُيُوتَ النَّبِيِّ إِلَّا أَن يُؤْذَنَ لَكُمْ إِلَى طَعَامٍ غَيْرَ نَاظِرِينَ إِنَاهُ وَلَكِنْ إِذَا دُعِيتُمْ فَادْخُلُوا فَإِذَا طَعِمْتُمْ فَانتَشِرُوا وَلَا مُسْتَأْنِسِينَ لِحَدِيثٍ إِنَّ ذَلِكُمْ كَانَ يُؤْذِي النَّبِيَّ فَيَسْتَحْيِي مِنكُمْ وَاللَّهُ لَا يَسْتَحْيِي مِنَ الْحَقِّ وَإِذَا سَأَلْتُمُوهُنَّ مَتَاعاً فَاسْأَلُوهُنَّ مِن وَرَاء حِجَابٍ ذَلِكُمْ أَطْهَرُ لِقُلُوبِكُمْ وَقُلُوبِهِنَّ وَمَا كَانَ لَكُمْ أَن تُؤْذُوا رَسُولَ اللَّهِ وَلَا أَن تَنكِحُوا أَزْوَاجَهُ مِن بَعْدِهِ أَبَداً إِنَّ ذَلِكُمْ كَانَ عِندَ اللَّهِ عَظِيماً }الأحزاب 53

و يهمنى اقول انى لما قريت فى كلام الشيخ الألبانى ان هذا كان من ملابس امهات المؤمنين وجدت نفسى مدين بإعتذار لهن و طلب المغفرة من الله ، لأمهات المؤمنين ، لأنى كنت كثيراً ما اقول ان النقاب تخلف و زى متخلف ، اما و قد ظهر انه من ملابس امهات المؤمنين حتى و لو افترضنا ان على ذلك خلاف فالأحوط الا اصف الزى بهذا ،
انتقده لكن لا اصفه هكذا ، و انا اجل و احترم امهات المؤمنين فى نفس الوقت الذى اؤمن به ان ارتداؤهن لما يسمى النقاب هو امر لا ارفضه لهن فقط لأن هن لهن تشريع خاص بهن .

لكن ان نصل الأن لمرحلة ان النقاب فرض فديه جديدة !

للأسف انا مضطر انى اردد نفس العبارات الشهيرة لمعارضى الحجاب و التى حفظناها عن ظهر قلب ، من قبيل ان الحجاب لم يكن موجود فى السبعينات و اننا كنا لا نرتديه و متى اصبح الحجاب فرضاً !؟
مع اقتناعى التام بفرضية الحجاب ، لكن مضطر ان اقول و منذ متى أصبح النقاب فرضاً ؟!
-
ملحوظة بدأت الدعوة للنقاب انه فضل ثم سنة ثم اصبح فرض ، ثم اصبح الشكل الصحيح للنقاب هو الذى يغطى العينان ايضاً و من اظهرت عيناها فهى آثمة !

عندما كنت اسمع ان النقاب سنة ، منذ فترة لم اكن اركز جيداً مع هذا الكلام ، ماشى سنة سنة
المهم انه مش فرض ، لكن ناس بتقولك ده فرض يبقى احنا مقبلين على ايام سودة بعون قناة الناس
اللى بوظت مخ الناس خالص بقالها 5 سنين و ما زالت ،

اه و مش عايز حد يقوللى طب و قنوات الكليبات ، حقولك ان قنوات الكليبات اه بوظت اخلاق الناس لكن فى النهاية عارفين ديتها كباريه و شغال ليل نهار ، لكن المصيبة الكبرى فى القنوات اللى بتبوظ مخ الناس بإسم شىء مقدس و هو الدين .

النقاب فرض ماشى اهلاً و سهلاً حضرتك ارتدى النقاب باقتناعك الشخصى ، لكن بقى اسمع ناس تتكلم عن ان غير المنتقبة آثمة و مذنبه

حضرتك بتقولى من باب الحرية الشخصية ارتدى النقاب ماشى ، يبقى مش من حقك تخاطبينى بشكل دينى و تتكلمى عن فرضية النقاب
لأن كما يقول دوماً الأخوة مؤيدى الحجاب للأخت الغير محجبة حينما تقول الحرية كيت و كيت يردون عليها بس ده فرض و مفيش حرية شخصية فى الفروض .

و طالما ان فيه رأى بيقول ان النقاب فرض و رأى تانى بيقول سنة و ثالث بيقول فضل و رابع بيقول مش من الإسلام
يبقى خلاص من حق اى مؤسسة انها تفرض زى معين على موظفيها الإناث .

يعنى من ضمن الكلام ان ايه المشكلة ان الأخت المنتقبة تبقى ممرضة او دكتورة فى المستشفى ؟
و بعدين ده حتى النقاب شبه الكمامة اللى بيرتديها الدكتور فى اوضة العمليات

و ده كلام مردود عليه بأن الدكتور مش ماشى طول اليوم فى المستشفى بكمامات ، وضع الكمامات ليه جو طبى معين معقم ، و كمامات معقمة ، و جو للأوضة نظيف بنسبة نقاء عالى ، و مينفعش الأخت المنقبة اللى هيا نظيفة كما اقول تخش اوضة العمليات بنقابها اللى اكيد تعرض لجو مصر الملوث بكل انواع الجراثيم ،

عشان كدة من حق وزير الصحة طبقاً لسلطاته انه يفرض زى معين على العاملين فى المستشفيات ، طبعاً حسمع حد بيقول بيضيقوا على المنتقبات ليه و لا يعنى عشان هماه خذوا طريق ربنا يبقى خلاص نحاربهم ، و ان ما يحدث هو ابتلاء و شيطان يريد ان يحيدنا عن الطريق و بالمرة ان ما يحدث هو حرب على الإسلام
و متنساش واقعة رئيس جامعة حلوان السابق عبد الحى عبيد اللى منع النقاب فطلعت مظاهرات تقول انه يريد ان يشيع الفاحشة فى الذين آمنوا !

طبعاً انا عارف ان حكوماتنا بتحارب اى مظاهر دينية ، لكن فى الموضوع ده انا شايف ان عندها الف حق ، خاصة ان الوزارة مقالتش للأخت المنتقبة اقلعى النقاب
و البسى جيبة قصيرة ، فالموضوع لا ليه علاقة بالفاحشة و لا بالحرب على اللى خدوا طريق التدين و لا حتى حرب على الإسلام .

حتى لو انا شايف ان خطوة منع النقاب فى الجامعة صحيحة

بس يهمنى اقول ان لو حيفرضوا فى الجامعة مثلاً زى معين ليس فيه تغطية الوجه ، يبقى زى موحد على الكل او مواصفات معينة على الكل المنتقبة و المحجبة و المتبرجة كمان ، انما زى واحد على المنتقبات و بس يبقى لأ ، عشان الموضوع ميبقاش فيه تحيز ضد فئة ، سيادتك عايز تفرض شكل معين للزى يبقى على الكل

بالمناسبة الكلام ده مكنتش بقوله بالضبط امبارح و لسة ضايفه من شوية فى التدوينة ، عشان دورتها فى دماغى و لقيت ان وجهة نظر وجيهة موضوع التحيز ضد المنتقبات اللى بالمناسبة مش ضدهم .

ثم المنتقبات بكلامهن عن حقهن فى العمل بدون تضييق و عدم منعهن ، يهدرون كل فرص و حقوق الأخوات المحجبات فى العمل ، فبعد ان كنا نقول ان من حق المذيعة المحجبة الظهور فى قنوات التليفزيون المصرى و فى اماكن سيادية بالدولة و ان حجابها لا يعيق عملها ، و ان منع المحجبات من العمل فى اماكن معينة شىء ضد حقوق الإنسان و ضد حق المرأة فى العمل ، و قرار عنصرى و تمييزى ضد المحجبات ، أصبح الكلام يدور حول حق المنتقبات فى العمل و ان النقاب لا يتعارض مع العمل !

و انا اتخيل اى شخص معارض للحجاب سيقرأ او يسمع هذا الكلام عن حق المنتقبات انه سوف يفكر الف مرة فى تعيين المحجبات و يكاد لسان حاله يقول
لا يا عم بلاها محجبات خالص بكره يطلعوا يقولولى انا لبست النقاب و من حقى اشتغل !
طبعاً انا مش متفق مع الكلام ده بس انا احياناً بحط نفسى مكان الأخرين عشان اوصل لوجهة نظرى .

الإنسان اللى بيعمل شىء هو مقتنع بيه و غالباً شىء له علاقة بالدين مش بيدور على الحكمة او الأسباب وراء ذلك ، يعنى عمرك شفت واحد قرأ دراسة عن ان الصلاة زى تمرينات السويدى و قالك و الله يا اخى الصلاة ديه حاجة جميلة خالص تصور انا بقيت بصلى دلوقتى بدل تمرينات الصباح
او اخت تقول تصدق صيام رمضان مفيد اوووى فى الريجيم طب انا حبقى اصومه
بالضبط زى الأخ اللى قاطع الخمور الدنماركى تعبيراً عن نصرته للرسول عليه الصلاة و السلام !

عشان كدة انا مش مستعد اسمع كلام عن الحكمة الجليلة من النقاب و انه سبحان الله يقى من الإصابة بأنفلونزا الخنازير و انه كمامة اوتوماتيك ،
زى بالضبط ما انا مش مستعد اسمع كلام عن فوائد المايوه و علاقته بأشعة الشمس ، حضرتك ارتديتى النقاب معتقدة بفرضيته خلاص يبقى متدوريش على الحكمة منه نفذى امر ربنا كما تعتقدين و خلاص ، انما كنوع من التسويق لفكرة النقاب و كأنك تريدى ان تقولين لهؤلاء معارضى النقاب ان الحكمة منه كذا ،

فيه نقطة كثير ما ترردها الأخوات المنتقبات حين نقول لها افرضى مثلاً منقبة سرقت و لا قتلت ،
تقوم بالرد قائلة : يعنى انت شايف كل المنتقبات وحشين و حرامية و قتالين قُتله ؟!
لأ مش كلهم اكيد فيه منهم المحترم و الكويس و فيه منهم اللى مش محترم و مش كويس
بس انا اعرف منين هل فيه طريقة معينة تخلينى اعرف المنتقبة الفلانية كويسة و لا وحشة ؟!
المنتقبة اللى بتسرق و لا بتقتل انا عرفت انها وحشه ، طب و الكويسة انا اضمن منين انها كويسة
اعرف ازاى ؟!

ما هو يا اربى المجتمع كله من اول و جديد ، يا اشوف طريقة لإكتشاف الجرائم ، و النقاب طبعاً اسهل طريقة لإرتكاب الجرائم ، يعنى لما تسرق واحدة طفل من مستشفى
ابقى قابلنى بقى لو جبتوها حتبقى س زى ص زى ع زى ل – مفيش فرق و انا مشكلتى مش مع الأخت المتنقبة مشكلتى مع النقاب نفسه ، النقاب كزى يسهل ارتكاب كل الجرائم ، و طبيعة الزى هى مشكلته

طبعاً حد حيقول طب و الأخت الغير منتقبة ازاى تعرف انها كويسة و لا وحشة ؟ ، حقول انا مش مطلوب منى اعرف انها كويسة و لا وحشة اصلاً
بس طالما هى مش منتقبة خلاص ، لو كويسة لنفسها ، و لو وحشة اضمن انها لو حتؤذينى انى ممكن اعرف هى مين .

قالت الأخت مها زين
و أحب اقول بردو ان اللى هيجي يكلمني بالعقل والمنطق ويقولي اذاي يعني؟ وليه؟ واشمعنه؟ هرد عليه واقوله
- قال الله تعالي "" وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم ومن يعص الله ورسوله فقد ضل ضلالا مبينا"
يعني اللى ربنا يقول عليه او يقول عليه النبي مفيش امامنا غير اننا نقول علم وينفذ بلا جدال ولا فلسفة ومنطق وده امر تاني من ربنا اننا نقول سمعاً وطاعة

ده انا من صغرى كل ما الاقى شيخ فى التليفزيون الاقيه يقول الإسلام دين العقل ، و حضرتك تقوليلى اللى حيكلمنى بالعقل و المنطق هرد عليه و اقول
امال هو سموه دين العقل ليه !!؟ ، و بعدين اذا كان الإجتهاد عملية عقلية و ايمانية اصلاً ، يعنى نلغى عقولنا بقى و نسلم دماغنا لشيوخ متطرفة
عشان يقنعونا بكلامهم اللى المفروض ان ده اللى ربنا قال عليه و الرسول و نقول علم و ينفذ بلا جدال
طالما كدة متبقوش بقى تزعلوا لما حد فى الغرب يقول الإسلام دين متطرف و ارهابى و بيلغى العقل .

طبعاً الأية الكريمة المذكورة فى كلام الأخت مها جاية فى غير محلها لأن الحقيقة الذى قضى ليس الله و رسوله و انما الشيخ الفلانى الذين يتصور ان تفسيره للدين هو امر الله
فيقول لك لقد قضى الله و رسوله امراً
و السؤال : ليه يكون تفسير الشيخ فلان لكتاب الله و سنته رسوله هو قضاء الله و رسوله و لا يكون تفسير الشيخ علان هو قضاء الله و رسوله ؟!

2

الرد على بعض التعليقات ،
طبعاً فيه تعليقات ردى عليها جه فى سياق رأيى .

Cardiology Man يقول...

بغض النظر عن كون النقاب عادة ولا عبادة وفرض ولا سنة،
أعتقد انه من الصعب إنكار انه بيقلل من التعرض للتحرش والمعاكسات
وده مابيقللش من دور تربية الشباب والكلام اللي حضراتكم قلتوه
بس لو واحدة عايزة تحمي نفسها من التحرش أعتقد أسهل لها انها تلبس النقاب من انها تربي المجتمع
لحد ما حضرات السادة اللي بيكرهوا النقاب وشايفينه مالوش لازمة يربوا لها المجتمع
ويقولوا اقلعي النقاب بقى مالكيش حجة المجتمع كله بقى ناس طيبة
وبتسمع كلام ربنا ولو مشيتي بالبيكيني ماحدش هايتعرض لك ،
أما بقى الأخوات الفاضلات اللي بيحاربوا النقاب فالمنقبات حريصات على استمرار هذا الهجوم ووجود غير المنتقبات ضروري لحماية المنتقبات هاتقول لي ازاي ؟
أقول لك ما هو لو كل الستات انتقبوا الشباب الضايع مش
هايلاقي حد يتحرش بيه غير المنتقبات وهاتبقى الامور سيان،

يعنى حضرتك بقى كأنك بتقول فى داهية غير المنتقبات و المتبرجات خللى الشباب يتحرش بيهم و كويس بدل ما كله ينتقب الشباب يتحرش بالمنتقبات
يا استاذ اعرف صديق ليا بيقول لى ان فيه شخصيات مريضة مزاجها التحرش بالمنتقبات و بس ، و التحرش مش بيفرق ، لأن اللى بيعمل كدة مش فارقة معاه
كفاية أنها أنثى بالنسبة له و خلاص .

و بعدين اللى بتلبس النقاب مقتنعة بفرضيته مش عشان حماية ليها و لا حاجة ، لأنه لا حماية و لا مراية حتى لأن المتحرش مش حينقى اصلاً لأنه شخص سافل .

maha zein يقول...
انا عجبني اراء الناس بجد اللى اتكلموا في فرضية النقاب ما شاء الله ولا حول ولا قوة الا بالله تحس ان ارائهم بجد قوية وثابته وراسخة ويقبل بها العقل قبل القلب

هو مش حضرتك قولتى اللى حيكلمنى بالعقل و المنطق ؟!
-----
يعني اللى بيدافع عن ان النقاب عادة هو فعلا بيدافع عن كونه مش عاوز يترك الدنيا

لأ مش صحيح و اعتقد ان كلام حضرتك مغلوط ، يعنى خلاص النقاب بقى هو الزهد و هو الأخرة و اللى مش عايزاه تلبس النقاب يبقى بتحب الدنيا؟!

"ملابس البداوة إمارة علي التقوي...وعدم البصر لا غض البصر اسا العلاقة بين الجنسين...

هو محددش اصلاً ملابس الإناث ام الذكور يعنى شامل الإثنين ، و بالنسبة لعدم البصر فبصراحة الواحد اللى بيشوفه من اللبس الغريب للمنتقبات اللى بيخليها مش شايفة اى حاجة اصلاً .

يوم القيامة بجد مش وقت مراهنات ولا وقت ان اللى كنت مقتنعة بيه يطلع صح ولا لاانا اعمل اقصا حاجة وربنا سعاتها يرحمني برحمته

و اقصى حاجة من وجهة نظر حضرتك هى اصعب حاجة طبعاً ، يبقى كدة انتى بتقفلى باب الإجتهاد و بتقولى بقا لو فيه رأيين واحد بيقول فرض و واحد بيقول مش فرض
يبقى اخذ الرأى اللى بيقول فرض و خلاص ، و الكلام اللى حضرتك بتقوليه قاله بالضبط الشيخ المتشدد ابو اسحاق الحوينى فى قناة الناس ،
يبقى كدة الدين بقى عسر لا يسر
هو حضرتك متصورة ليه ان الرأى الصعب هو الأصح ؟!
---
د . ياسر عمر عبد الفتاح

انا مش حرد على حضرتك لأن انا مناقشاتى مش لبيان فرضية الحجاب او لأ لأنى مش عالم حديث ، انا جبت رأى الشيخ الغزالى و الشيخ الألبانى فيه اخوه ردوا على حضرتك فى التعليقات .
------
الناس اللى علقت اتفاقاً مع رأيى مش حرد على كلامها لأنه لا مجال للنقاش فيه و الإختلاف بالطبع .
-----
Adam يقول...
النقاب وسيله لحفظ البنات والامهات والسيدات من كل شر

للأسف لا يحفظهن .

قول الشيخ الألبانى فى النقاب

قبل رأيى الشخصى ، اعتقد من الأمانة انى اطرح رأى الشيخ الألبانى رحمه الله فى النقاب ، لأنى كتبت رأيى قبل ما اقراه كتابه جلباب المرأة المسلمة ،

و الذى قام الأخ مهندس حر بوضع لينك له ،

و اعترف انى اول مرة اكون عندى شجاعة الإعتذار ، و مش عيب ان الواحد يكون غلطان فى شىء و يوضح ده ،

و انا مغيرتش فى رأيى لسبب ان عايز اللى يقراه يبقى عارف رأيى كويس ، خاصة ان كلام الشيخ الألبانى و ان سلمت بيه ، بس الحقيقة لسة مقتنعتش بيه ، سميها بقى نشوفيه دماغ سميها زى ما تسميها بس متسميهاش ان الله لم يشرح صدرى بعد عشان ده شىء ملكش فيه ، لكن المهم هو طرح رأى الألبانى حتى لو انا لسة مش مقتنع بيه .

يقول الشيخ الألبانى فى الكتاب – و عدد صفحاته 143 و طبعاً مقرتوش كله – لكن هناك كلام واضح ليه و قاطع :

ولقد علمت أن كتابنا هذا كان له الأثر الطيب –والحمد لله- عند الفتيات المؤمنات، والزوجات المحصنات، فقد استجاب لما تضمنه من الشروط الواجب توفرها في جلباب المرأة المسلمة الكثيرات منهن، وفيهن من بادرت إلى ستر وجهها أيضًا، حين علمت منه أن ذلك من محاسن الأمور، ومكارم الأخلاق، مقتديات فيه بالنساء الفضليات من السلف الصالح، وفيهن أمهات المؤمنين رضي الله عنهن.ومع ذلك،

فإن بعض أهل العلم وطلابه، ولا سيما المقلدين منهم –فإنهم مع إعجابهم بالكتاب وأسلوبه العلمي، وقوة حجته، ونصاعة برهانه- لم يرقهم ما جاء فيه من التصريح بأن وجه المرأة ليس بعورة، وقد كتب إلي بذلك أحد الأساتذة في المدارس الثانوية، وشافهني به آخرون هنا في سورية، وفي الحجاز أيضًا، وهؤلاء فريقان

الأول:

من لا يزال يرى أن الوجه عورة، وليس ذلك عن دراسة الأدلة الشرعية، وتتبعها من مصادرها الأصلية، وإنما تقليدًا لمذهبه الذي نشأ عليه، أو البيئة التي عاش فيها، وفيها بعض المتحمسين لذلك أشد الحماسة بحسن نية، وعاطفة إسلامية، وغيرة دينية. وقد جلست إلى أحد هؤلاء الفضلاء جلسة دامت ساعات، تباحثنا فيها حول المسألة، وكان ذلك بطلب مني، لعلي أجد عنده، ما يؤيد رأيه، فلم أحظ بشيء من ذلك، وكل الذي سمعته منه، إنما هي شبهات عرضت له على بعض أدلة الكتاب، صدته عن الاقتناع بها، وتبني لازمها، فأجبته ليلتئذٍ عن شبهاته بما يسر الله، ثم فكرت

الثاني:

من يذهب معنا إلى أن الوجه ليس بعورة، ولكنه يرى مع ذلك أنه لا يجوز إشاعة هذا المذهب نظرًا لفساد الزمان، وسدًّا للذريعة، فإلى هؤلاء أقول:إن الحكم الشرعي الثابت في الكتاب والسنة لا يجوز كتمانه وطيه عن الناس؛ بعلة فساد الزمان أو غيره، لعموم الأدلة القاضية بتحريم كتمان العلم، مثل قوله تعالى: {إِنَّ الَّذِينَ يَكْتُمُونَ مَا أَنْزَلْنَا مِنَ الْبَيِّنَاتِ وَالْهُدَى مِنْ بَعْدِ مَا بَيَّنَّاهُ لِلنَّاسِ فِي الْكِتَابِ أُولَئِكَ يَلْعَنُهُمُ اللَّهُ وَيَلْعَنُهُمُ اللَّاعِنُونَ} [البقرة: 159].

وقوله -صلى الله عليه وسلم: "من كتم علمًا ألجمه الله يوم القيامة بلجام من نار".رواه ابن حبان في صحيحه، والحاكم، وصححه هو والذهبي، وغير ذلك من النصوص الرادعة عن كتم العلم.فإذا كان القول بأن وجه المرأة ليس بعورة حكمًا ثابتًا في الشرع كما نعتقد، فكيف يجوز القول بكتمانه، وترك تعريف الناس به؟! اللهم غُفرًا.

نعم؛ من كان يرى أنه مع ذلك لا يجوز العمل به سدًّا للذريعة، فعليه هو بدوره أن يبين ذلك الذي يراه للناس ولا يكتمه، ويأتي بالأدلة التي تؤيد رأيه، وهيهات هيهات!

فهذا رسول الله -صلى الله عليه وسلم- يرى الفضل بن العباس رضي الله عنه يلتفت إلى المرأة الخثعمية، وكانت امرأة حسناء ينظر إليها، وتنظر إليه، وهي غير محرمة –كما سأبينه- ثم لا يكون منه عليه الصلاة والسلام أكثر من أن يصرف وجه الفضل عنها، ولا يأمرها أن تستر وجهها عنه، فأي ذريعة ووسيلة أوضح من هذه، وهو -صلى الله عليه وسلم- القائل بهذه المناسبة: "رأيت شابًّا وشابة، فلم آمن الشيطان عليهما".

فهذا الحديث الصحيح، يقرر أن كشف المرأة عن وجهها –ولو كانت جميلة- حق لها، إن شاءت أن تأخذ به فعلت، وليس لأحد أن يمنعها من ذلك، بزعم خشية الافتنان بها، فمثل هذا الحديث منعنا من أن نقول برأي الفريق المذكور، وأوجب علينا إشاعة الرأي الصواب في المسألة.على أنه لم يفتنا أن نلفت نظر النساء المؤمنات إلى أن كشف الوجه وإن كان جائزًا، فستره أفضل،

وقد عقدنا لذلك فصلًا خاصًّا في الكتاب "الصفحة 104".وبذلك أدينا الأمانة العلمية حق الأداء، فبينا ما يجب على المرأة، وما يحسن بها، فمن التزم الواجب فبها ونعمت، ومن أخذ بالأحسن فهو أفضل.

وهذا هو الذي التزمته عمليًّا مع زوجتي، وأرجو الله تعالى أن يوفقني لمثله مع بناتي حين يبلغن أو قبيل ذلك.ومن الغريب ما جاء في كتاب الأستاذ الذي سبقت الإشارة إليه:"وقد يلحظ أحدهم، أو يسمع حرصك الحسن على ستر أهلك الستر المطلوب دون السماح بإظهار الوجه، معاذ الله! فإذا قرأ ما كتبت، قال: خالفت فتواه تقواه، ورماك بما لا يجمل"!.وقد كنت أرسلت إليه جواب كتابه بتاريخ "23/ 9/ 74هـ"1، ومما فيه جوابًا على هذه الفقرة؛ قولي:"إن رماني أحدهم ظلمًا "بما لا يجمل"، فإن لي أسوة حسنة بالأنبياء والصالحين صولات الله عليهم أجمعين، الذين لم يرمهم أعداؤهم "بما لا يجمل" فقط، بل وبما يقبح،

ومما لا شك فيه عندي؛ أن الرامي بما أشار إليه حضرة الكاتب، معتد ظالم، أو جاهل ينبغي أن يعلم، وذلك لأمرين.الأول:

أن غاية ما قررته في الكتاب أن وجه المرأة ليس بعورة، وأنه يجوز أن تظهره بالشرط المذكور فيه، وهذا ليس معناه أنه يلزم القائل به أن يكشف وجه زوجه ولا بد؛ لأن هذا ليس من شأن الأمر الجائز، بل هو من لوازم الأمر الواجب، إذ إن كل واحد يعلم أن الجائز هو ما يجوز فعله، كما يجوز تركه، فإذا أنا أخذت بالترك أو أخذت بالفعل؛

فعلى الحالتين لم أخرج عما أفتيت به من الجواز. فتبين من ذلك أن من قال فِيَّ: "خالفت فتواه تقواه"؛ كان بعيدًا جدًّا عن الفهم السليم، أو العدل.والآخر: أنني بجانب تقريري أن الوجه ليس بعورة، قد قررت أيضًا أن الستر هو الأفضل،

ووردت فيه "ص104" على من زعم أن الستر بدعة وتنطع في الدين؛ بأحاديث وآثار أوردتها

ص -104-

مشروعية ستر الوجه:

هذا ثم إن كثيرًا من المشايخ اليوم يذهبون إلى أن وجه المرأة عورة لا يجوز لها كشفه بل يحرم وفيما تقدم في هذا البحث كفاية في الرد عليهم، ويقابل هؤلاء طائفة أخرى يرون أن ستره بدعة وتنطع في الدين،

كما قد بلغنا عن بعض من يتمسك بما ثبت في السنة في بعض البلاد اللبنانية،

فإلى هؤلاء الإخوان وغيرهم نسوق الكلمة التالية:

ليعلم أن ستر الوجه والكفين له أصل في السنة، وقد كان ذلك معهودًا في زمنه -صلى الله عليه وسلم- كما يشير إليه -صلى الله عليه وسلم- بقوله:"لا تنتقب المرأة المحرمة، ولا تلبس القفازين"1.قال شيخ الإسلام ابن تيمية في "تفسير سورة النور" "ص 56"."وهذا مما يدل على أن النقاب والقفازين كانا معروفين في النساء اللاتي لم يحرمن وذلك يقتضي ستر وجوههن وأيديهن".

، ثم ختمتهما بما نصه "ص114":فيستفاد مما ذكرنا أن ستر المرأة لوجهها ببرقع أو نحوه مما هو معروف اليوم عند النساء المحصنات، أمر مشروع محمود، وإن كان لا يجب ذلك عليها، بل من فعل فقد أحسن، ومن لا فلا حرج".

فهذا مني نص صريح في تفضيل الستر، ورد على الطائفتين المتشددتين: القائلين منهم بوجوبه، والقائلين منهم ببدعته، و"خير الأمور أوساطها"1.وحقيقة الأمر عندي؛

أنه وإن كان قلبي ليكاد يتفطر أسى وحزنًا من السفور المزري، والتبرج المخزي، الذي تهافتت عليه النساء في هذا العصر، تهافت الفراش على النار، فإنني لا أرى أبدًا أن معالجة ذلك يكون بتحريم ما أباح الله لهن من الكشف عن الوجه، وأن نوجب عليهن ستره بدون أمر من الله ورسوله. بل إن حكمة التشريع، والتدرج فيه، وبعض أصوله التي منها بقوله -صلى الله عليه وسلم: "يسروا ولا تعسروا"1،

وأصول التربية الصحيحة، كل ذلك ليوجب على فقهاء الأمة ومربيها ومرشديها، أن يتلطفوا بالنساء، ويأخذوهن بالرفق لا بالشدة، ويتساهلوا معهن فيما يسر الله فيه، ولا سيما ونحن في زمن قل فيه من يأخذ بالعزائم من الأمور والفرائض، فضلًا عن المستحبات والنوافل!

فإذا كان بعض العلماء اليوم يرون أن في كشف المرأة عن وجهها مع سترها لما سواه من بدنها

مما أمرها الله به خطرًا عليها –زعموا- فنرى أنه لا يليق بهم أن يكتفوا من المسألة بإظهار الإنكار الشديد على من يخالفهم في الرأي، واتخاذ القرار بمنع دخول الكتاب إلى بلادهم، بل إن عليهم أمرين اثنين لا بد لهم من القيام بهما:

الأول: أن يبينوا للناس حكم الله فيها، مستدلين عليه بالكتاب والسنة، لا تقليدًا للمذهب، أو اتباعًا للتقاليد، وبذلك فقط؛ يظهر للناس الصواب من الخطأ، بل الحق من الباطل {فَأَمَّا الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِي الْأَرْضِ} [الرعد: 17].

إنهم إن فعلوا ذلك استجاب لهم النساء المؤمنات، فهل يفعلون؟!والآخر: أن يُعْنَوا بتربية الفتيات المسلمات تربية إسلامية صحيحة، وخصوصًا في المدارس والمساجد والجامعات، بتعليمهن وتثقيفهم الثقافة الشرعية النافعة، ومنع المجلات الخليعة أن تتسرب إليهن، وتفسد عليهم أخلاقهن، ونحو ذلك من الوسائل المبذولة في العصر الحاضر، مما يمكن استعماله في الشر والخير، {وَنَبْلُوكُمْ بِالشَّرِّ وَالْخَيْرِ فِتْنَةً} [الأنبياء: 35].

بمثل هذا وذاك يمكن أن يوجد جيل من النساء المؤمنات اللاتي إذا سمعن مثل قول الله تعالى: {يَا أَيُّهَا النَّبِيُّ قُلْ لِأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ} [الأحزاب: 59]؛ بادرن إلى امتثال أمره كما فعلت نساء الأنصار -رضي الله عنهن- حين نزل قوله عز وجل: {وَلْيَضْرِبْنَ بِخُمُرِهِنَّ عَلَى جُيُوبِهِنَّ} [النور: 31]،

بادرن فاختمرن بما تيسر لهن من الأزر كما هو مذكور في موضعه من الكتاب "الصفحة 78".فمثل هذه النسوة يمكن أن تؤمر بستر الوجه إن كان واجبًا، وأما أمر السواد الأعظم من النساء بذلك، في مثل بلادنا السورية، وغيرها كمصر ونحوها من البلدان الأخرى التي انتشر، أو بدأ ينتشر فيها التبرج والخلاعة بأبشع صوره، مما لم تنج منه مع الأسف حتى بلاد التوحيد التي كنا نأمل أن تكون الحصن الحصين للمسلمين من هذا التبرج،

فأمر هذا الجنس من النساء بستر الوجه الذي لم يأمر الله به، وهن لا استعداد عندهن أن يسترن نحورهن وصدورهن وما هو أكثر من ذلك؛ مما لا يذهب إليه من كان عنده ذرة من رائحة فقه الكتاب والسنة.فمن الحكمة إذن،

أن يقنع العلماء في هذا العصر بأن يستجيب النساء لما أمر الله به من حجب البدن كله؛ حاشا الوجه والكفين، فمن حجبهما أيضًا منهن، فذلك ما نستحبه لهن، وندعو إليه.

وأما إيجاب ذلك عليهن، فهو عندي تشدد في الدين، وتنطع لا يحبه الله، وخصوصًا على النساء اللاتي وصانا بهن رسول الله -صلى الله عليه وسلم- خيرًا، في أحاديث كثيرة، منها قوله عليه الصلاة والسلام: "رفقًا بالقوارير"1.ويوم يستجيب النساء المسلمات لأمر الله؛ إلا من شذ منهن، وتكون غريبة مهينة بين المستجيبات،

فيومئذ يعود إلى المسلمين عزهم ومجدهم، وتقوم لهم دولتهم، وينصرهم الله على عدوهم {وَيَوْمَئِذٍ يَفْرَحُ الْمُؤْمِنُونَ، بِنَصْرِ اللَّهِ} [الروم: 4]، ولن يكون ذلك إلا إذا استجاب لأمره تعالى الرجال قبل النساء، وعسى أن يكون ذلك قريبًا. {يَا أَيُّهَا الَّذِينَ آمَنُوا اسْتَجِيبُوا لِلَّهِ وَلِلرَّسُولِ إِذَا دَعَاكُمْ لِمَا يُحْيِيكُمْ وَاعْلَمُوا أَنَّ اللَّهَ يَحُولُ بَيْنَ الْمَرْءِ وَقَلْبِهِ وَأَنَّهُ إِلَيْهِ تُحْشَرُونَ} [الأنفال: 24].

دمشق 25/ 7/ 1385هـ

محمد ناصر الدين الألباني.

النقاب عادة لا علاقة لها بالإسلام 2-2

ملحوظة : الجزء الأول هنا

و أعتذر بسبب وجود مشكلة فى تحديث ظهور البوست فى المدونات التى يتابعها اصدقائى

عشان كدة من لم يظهر عنده البوست السابق و لم يقرأه ياريت يبقى يقراه لو حابب يعرف الموضوع كله

إستكمالاً لكلام الشيخ محمد الغزالى رحمه الله عن النقاب هذه بعض الدلائل الأخرى من كتابه قضايا المرأة بين التقاليد الراكدة والوافدة

و قد قمت بعمل تظليل على الكلمات التى اقصدها بالضبط مع مراعاة القراءة الكاملة للوصول للمقصود كاملاً و للتكبير قم بالضغط على الصورة

--
لتحميل الكتاب كاملاً إضغط على اللينك

و مش محتاج افكر اى حد بالمصير الذى ينتظره

لو قاللى حقرا الكتاب

و بعدين ارد عشان كما قولت سابقاً الأجزاء اللى متكلمه عن النقاب

هى بس اللى قايل عليها و يمكن الكتاب ده اكثر توضيحاً و تقسيماً لمحتوياته

النقاب عادة لا علاقة لها بالإسلام 1-2

ملحوظة

1)

لينك الموضوعين المشار اليهم عند الأخت مها مش حيفتحوا لأنها أغلقت مدونتها لفترة ، فمعلش اقرا التدوينة بدون التفكير فى ما قالته الأخت ، يعنى اعتبرها تدوينة منفصلة لا علاقة لها بكلامها

2)

فيه لينك للكتاب سايبه تحت

اللى حيقولى حقراه الكتاب و بعدين ارد مش حرحمه
الأجزاء اللى متكلمة عن النقاب هى بس اللى قايل عليها

يعنى سيادتك اتفضل اقراها

عايز بقى واحد كمالة تقرا الكتاب كله

مع نفسك بقى ده شىء ماليش فيه

--------------

كتبت الأخت العزيزة مها زين فى مدونتها تدوينتين عن النقاب أحدهما عن أدلة وجوب النقاب و الأخرى عن النقاب و وزير الصحة و أنفلونزا الخنازير

و قالت فى التدوينة الثانية : ده اصلا اساساً جموع العلماء أختلفوا في النقاب حول انه سنة او فرض وقليل اوي اوي قالوا انه فضيلة واصلا الشيوخ اللى قالوا انه سنة ذي الغزالي والالباني رحمهم الله قالوا بانه سنة ولكنهم جعلوه فرض في زمن الفتن

و الحقيقة بعيداً عن رأيى الشخصى فى النقاب - و الذى سوف أطرحه بإذن الله فى تدوينة خاصة - ان الشيخ محمد الغزالى لم يقل ان النقاب سنة ، و بطبيعة الحال لم يقل انه فرض ، و لم يقل أنه فضل حتى ، و لكنه قال انه عادة بدوية .


و إليك بعض الدلائل من كتابه هموم داعية و قد قمت بعمل تظليل على الكلمات التى اقصدها بالضبط مع مراعاة القراءة الكاملة للوصول للمقصود كاملاً و للتكبير قم بالضغط على الصورة
--
لتحميل الكتاب كاملاً إضغط على اللينك

صاحبة مدونة إنها الحياة راحت فين ؟

معلش انا اسف لو بكتب تدوينات كثيرة و محدش بيلحق يعلق
بس انا دلوقتى كنت بشوف مدونة الأخت العزيزة

مها زين - إنها الحياة

و لقيتها قفلتها

و انا بس قلقان تكون زعلت من كلامى فى تدوينة التلاكيك
و ما قبلها بخصوص النقاب
رغم انى مقولتش اى رأى شخصى بخصوص النقاب
لحد دلوقتى
فياريت اى بنت معاها ايميلها توصلها بس رسالتى ديه
لأن هى اصلاً السبب الرئيسى
اللى دفعنى انى انشر اقوال الشيخ محمد الغزالى فى النقاب
و هى كانت منتظرة التدوينات ديه
فمش عارف هى راحت فين ؟

!

جائزة أول 18 تعليق

قررت المحكمة - قصدى المدونة
إعطاء أ/ ميمى
صاحبة مدونة
Mimaya
جائزة اول 18 تعليق

و هذا بعد قيامها بالتعليق على إحدى التدوينات
لأول تعليقين
ثم قالت

ايه ده ... كنت اول تعليق؟

ياااااه طول عمري في الصداااااارة
احتفالية أول تعليق وتاني تعليق كمان
وجايزتي ... اخترها ايه اخترها ايه؟؟؟؟

أخترت اكون اول 18 تعليق
هههههههههههههههههه
لا... كفاية كده
تحياتي ... تقبل احتلالي

ستين جنيه بيقضوا و يفيضوا ، الحمد لله

ست أم إبراهيم هى عنوان ساطع للرضا ، هى تستحق ان نشاهد هذا الفيديو كى نرى تلك الحكاية العجيبة لتلك السيدة الصابرة الراضية ، و أحب أشكر الشخص اللى لفت نظرى للفيديو و خلانى اسجله
و ياريت اى مدون مدونته عليها اقبال ينشر الفيديو ده عنده

كل تلكيكة و فيها خيرة

أكثر شىء بيستفزنى هو التلاكيك اللى ملهاش لزمة حتى لو من غير قصد ،
واحد يجى يتلكك مثلاً عشان يهرب من حوار او مناقشة ،
او مش عاجبه الكلام يقوم يقولك طب و الله هو حيحصل بس انا بقول لو كان
،
عشان كدة انا لغيت نشر تدوينتى عن النقاب ، عشان شغل التلاكيك الغريب ده
جه مدون بعتز بيه و بحترمه و قال بكل إحترام حبقى اقرا الكتاب و بعدين ارد ان شاء الله

ثم جاءت مدونتان و قالت إحداهما – و بالمناسبة اول مرة ييجوا مدونتى

–
شكراً على الكتاب حبقى احمله و اقراه ، و الثانية قالت : إمممم طااايب

!

و ده كله بالنسبة لى شغل تلاكيك مالوش لزمة و يفقع مرارة اللى خلفونى
يعنى ايه حقرا الكتاب و بعدين ارد

!؟

اولاً : انا حاطط الكتاب عشان اللى حابب يقراه ، مش عشان حضرتك تيجى تقوليه حبقى اقراه ،

لأن الكتاب مش بيتكلم عن النقاب غير فى المواضع اللى انا اشرت ليها يبقى حضرتك تتفضل تقراها و بعدين تناقشنى
لكن تقولى حقرا الكتاب
يالا بقى يديك و يدينا الصحة و طولة العمر ، لحد بقى ما انتظر حضرتك اما تقراه الكتاب من الجلدة للجلدة و تفليه و بعدين تناقشنى

.

يمكن حد يشوف رد فعلى ده غريب
لكن انا فاهم كويس ، الكل عنده استعداد لو جبتله كتاب يقول النقاب فرض و فضل و سنة
انه يرد و يتكلم ، غير كدة تبلع لسانك و تقول لى اممممم طااااااايب

!

الأخت اللى جات تقول اممممم طاااايب
حضرتك مش عاجبك الكلام و مش موافقة عليه تناقشينى فيه .
الكتاب مش مفروض من حضرتك تقراه كله عشان تفهم رأى الشيخ الغزالى فى النقاب

و كمان حقولك حاجة لما تلاقى تدوينة تتكلم عن ادلة وجوب النقاب
حتلاقى ما شاء الله الكل بيشيد و ايه الكلام الجميل ده

الا ما حد قال مثلاً حضرتك جايبة الكلام ده منين
تقول و الله من الكتاب الفلانى او العلانى
المفروض يرد يقول طب حبقى اقراه و ارد
زى ما حضراتكم عملتوا تلكيكة و خدتوا ديلكوا فى سنانكو

!
لكن على طوول كله قال امييين

.
---
و احب اعتذر لأى حد ممكن يضايقه كلامى ده
خاصة الأخوة اللى اشرت الى تعليقاتهم
انا متعودتش احتد كدة ، بس الصراحة مرارتى اتفقعت بالقوى .

انا ثلاثين ألف واحد

اليوم تذكرت فيلم واحد من الناس ، قصة بلال فضل و بطولة كريم عبد العزيز ، تذكرت الفيلم مع أجواء
جلسة النطق بالحكم - ملحوظة : الحكم اليوم كان بلا معنى فهو قرار اقرب منه الى حكم
فما معنى أخذ رأيى المفتى ؟! - فى قضية مقتل سوزان تميم و المتهم فيها رجل الأعمال الشهير هشام طلعت مصطفى و محسن السكرى ضابط امن الدولة

الكلام دار عن مصير شركات و مؤسسات هشام طلعت مصطفى و تأثرهما بخبر الحكم ،
تذكرت تلك الكلمات فقط

كمال ابو العزم رجل الأعمال لرضا السايس بالجراج
يا رضا انا مش واحد انا 30 الف واحد ، يرضيك عشان غلطة واحد يضر 30 ألف واحد

رضا

اللهم ما إضرب الظالمين بالظالمين و أخرجنا من بينهم سالمين

صلاح المنوفى

5

دقائق مفيش كمال أبو العزم على وش الأرض

وَابْيَضَّتْ عَيْنَاهُ مِنَ الْحُزْنِ

اردت ان اكتب عن حادثة وفاة حفيد الرئيس رحمه الله و ألهم أهله و كل محبيه الصبر و السلوان فلم أجد الا تلك المشاهد البسيطة التى دارت فى ذهنى و اردت ان اخرج بها بعضاً من حزنى ، خيراً من أن يخرج فى شماته سافلة من البعض .

---------------------
الرئيس كعادته ليلاً يجلس فى غرفته بالقصر الرئاسى حوالى الساعة 9 مساءاَ أمس الأول الإثنين
كان يشاهد إحدى القنوات الإخبارية

الذين كانوا معه من الحرس او الخدم يعرفون انه كان يريد الإطمئنان على حفيده الذى يعانى من وعكة صحية .

يرن جرس الهاتف فيقوم أحد المستشارين بالرد عليه : ثم يذهب الى الرئيس و يقول له
سيادة الرئيس هناك إتصال لك من باريس .

الرئيس يرفع السماعة
يأتى صوت السيدة الأولى حرمه على الهاتف و به نبرة حزن :
حفيدى مات يا محمد ، محمد ابن علاء مات يا ريس .

ثم يأتيه نجله الأصغر الذى كان يقيم مع والده تلك الليلة ، ليقدم التعازى لوالده ، و لكى يطبطب عليه فى هذا المصاب الأليم
و يأتى الخدم و غيرهم للتعازى .

فيقول لهم الرئيس اتركونى وحدى الأن لا اريد ان ارى احداً .

يغلقون باب غرفته عليه ، و يطفىء الأنوار و يدخل الرئيس فى نوبة بكاء غير طبيعية ، و يقول لنفسه الأن
بكيت كما لم أبكى ، بعد ان صادر البعض على حقى حتى فى البكاء لمجرد انى رئيس
لا انا انسان فى النهاية .
ثم ينام بعد ان هدئت دموعه فيأتيه فى منامه حفيده الراحل بصورته الجميلة حين كان طفلاً
و لكنه ظهر و وجهه كضياء الصبح و كان يقول له :
يا جدو احكيلى حكاية حلوة
ثم يطبع قُبلة على خذ جدو و يقول انا بحبك اوووى يا جدو ، بحبك ااااااد الدنيا كلها .
يرد الرئيس و انا كمان بحبك اووى ، هات بوسة كمان لجدو
ثم يستيقظ الرئيس على اثر القُبلة التى طُبعت على جبينه ، فإذا بها جائته فى الحقيقة من نجله الأصغر ، الذى جاء يشد من ازر ابيه .

-----

على فكرة اللى حيعلق بشماته مش عارف حعمل فيه ايه

و محدش يقوللى لزمته ايه الكلام اللى انت كاتبه ده

دون الجنة

يقول الرسول عليه الصلاة و السلام
من أدخل على أهل بيتٍ من المسلمين سروراً لم يرض الله له ثواباً دون الجنّة

هذه هى عظمة الرسول عليه الصلاة و السلام ، و هذا الحديث منذ ان سمعته ملأ علىّ كل افكارى
و اذا كانوا الذين يدخلون السرور ليس لهم ثواباً دون الجنة .

فماذا عن الذين ادخلوا الحزن و الهم و الغم على أهل بيت من الناس مسلمين كانوا او غير مسلمين ؟

بالتأكيد لم يرض الله لهم ثواباً دون جهنم .

البلياردو

هذه بعض كلمات قرأتها فى كتاب أصداء السيرة الذاتية للأستاذ نجيب محفوظ رحمه الله

1
التحدى

فى غمار جدل سياسى سأل أحد النواب وزيراً :
هل تستطيع أن تدلنى على شخص طاهر لم يلوث ؟
فأجاب الوزير متحدياً :
إليك على سبيل المثال لا الحصر الأطفال و المعتوهين و المجانين ، فالدنيا مازالت بخير .

2
الهجر

لم أشعر بأنه مات حقاً إلا فى مأتمه
شغلت المقاعد بالمعزين و تتابعت تلاوة القرآن الكريم ، و إنهمك كل متجاورين فى حديث ، فذكرت حوادث لا حصر لها
إلا أن الراحل لم يذكره أحد .
حقاً لقد غادرت الدنيا أيها العزيز ، كما أنها قد غادرتك .

3
البلياردو

جلست فى ركن المقهى الذى تقوم فيه مائدة البلياردو ، و جاء رجل نشط و راح يلاعب نفسه فيرمى الكرة مرة و يرد فى أخرى .
و قلت له بأدب :
هل تسمح لى أن ألاعبك فهو أجلب للمتعة .

فقال دون أن ينظر إلىّ :
بل المتعة أن ألعب وحدى و أن يتفرج الآخرون .
و نظرت حولى فرأيت جميع الزبائن يغطون فى النوم .

4
عندما

سألت الشيخ عبد ربه التائه :
متى يصلح حال البلد ؟
فأجاب :
عندما يؤمن أهلها بأن عاقبة الجبن أوخم من عاقبة السلامة .

5
فى الحظيرة

قال الشيخ عبد ربه التائه
حلمت بأننى واقف فى حظيرة أغنام مترامية الأطراف ، و كانت تأكل و تشرب و تتبادل الحب فى طمأنينة و سلام ،
تمنيت أن أكون أحدها ، فكنت جدياً بالغ القوة و الجمال ,
و يوماً جاء صاحب الحظيرة يتبعه الجزار حاملاً سكينه .

تاج البدراوية

التاج ده جالى من الصديق حسام غانم و ساعتها مكنتش فاهم يعنى ايه تاج فى المدونات ، لأنى التاج ده مصطلح ليه علاقة بالفيس بوك ، و لكن لما لقيت ناس كثير بتعمل الموضوع ده قررت اعمل انا كمان تاج

اسمك ؟

أحمد بدراوى

المشهور بيه وسط أصحابك ؟
بدراوى او بدرو

سنك ؟

24 الطبيعى

17 الشكلى

الحقيقى لسة انا متولدتش اصلاً

او بمعنى اصح : اذا كانت الأعمار تُقاس بالسعادة فإكتبوا على قبرى مات قبل أن يولد .

اسم مدونتك ؟

طعم البيوت ده الإسم اللى اخترته منذ معرفتى بإسم البوم محمد منير ، و كان ليها اسم قديم حاضر يا زهر

و هى أغنية أخرى لمحمد منير أيضاً

مجال دراستك ؟

إعلام

الصورة الرمزية لمدونتك بتعبر عن ايه ؟

واحد بيقرا جرايد كثير و ده انا ، بس الفترة الأخيرة مليت من قراية الجرايد و حسيت انى المفروض انوع فى قراياتى و ارجع اقرا كتب زى زمان

هل فكرت فى إغلاق المدونة ؟ والسبب ؟

اه فكرت أخرها امبارح ، و السبب كنت مضايق قوى.

ايه رد فعلك لو حد قل أدبه عليك في التعليق ؟

يعنى حشيل تعليقه و خلاص مش حعمل حاجة تانية .

أسوأ مدونة ؟

المدونات اللى بتدعو الى اخلاقيات و سلوكيات غير محترمة ، او المدونات اللى تصميم خلفيتها اسود !

مع كامل احترامى لأى حد عامل كدة فى مدونته ، بس انا مش بتكلم على المضمون فى الناحية ديه

انا بتكلم على التصميم لان انا بيبقى متعب ليا اوووى قراية شىء خلفيته سودة ، لكن لو مدونة تستاهل بتغاضى عن ده

و بتابعها على سبيل المثال العنبر اللى فاتحه الأخ أحمد سعيد .

هيحصل ايه للإيميل بتاعك بعد ما تموت ؟

حيموت هو راخر ، يارب حسن الخاتمة

أديت الباس وورد لحد قبل كده ... ؟
لأ

السفر بالنسبة لك ؟

تجربة ظريفة ، و لكنها محفوفة بالمخاطر ، و تجربة كثيراً ما احتاجها لما اكون مضايق ، لكن بصفة عامة انا مش بتاع خروجات و لا فسح .

المود بتاعك ؟

مخنوق و مضايق و بينهما بعض الضحك و السخرية اللى تدارى ضيقى .

بتعمل ايه فى وقت فراغك ؟

قول بتعمل ايه فى وقت مش فراغك !! ، لأنى مع الأسف بعانى من الفراغ الى الأن لأنى لسة ملقتش شغل ، بس باخذ كورسات تفيدينى و تعلى فرصى فى الشغل .

الأكلة المفضلة ؟

مكرونة فرن (البشاميل )

الرقاق اللى هو cousin أو ابن عم خالة المكرونة البشاميل

محشى ورق العنب – المحشى ورق العنب هو المحشى المعتمد لدى هو البريمو و الباقى ترسو

اللحمة المسلوقة مع الرز اللى بيصارع الغرق فى الشوربة و الاقيه بيكلمنى يقولى ابوس ايدك طلعنى قبل ما اغرق!

الكمونية ، البسلة ، صينية البطاطس ، الرز بالخلطة ،الفراخ البانيه ، كشرى مصر ، الحواوشى

البيتزا ، الفطائر بأنواعها

الرز بلبن ، الكنافة ، الكاستر ، الكريم كراميل ، الشيكولاتات ، البسبوسة

----

ملحوظة انا رفيع مش تخين خالص :-(

الصفات التى ورثتها من والدك ؟

العصبية .

الصفات التى ورثتها عن والدتك ؟

انى طيب بهبل ، القراءة .

أكتر ست حاجات بتكرهها ؟

الظلم ، الحسد ، انى محدش يبقى فاهمنى ، الوحدة ، الإدمان لأى شىء – لأنى بعانى من ده

علم التنمية البشرية

عشان بحسه نصب فى نصب ، و مش بعترف فيه

أكتر ست حاجات بتحبها ؟

الصداقة

الإخلاص

الحب

المودة و العواطف

الحنية

الدموع

الحزن

شخصيتك نوعها ايه ؟

شخصية بلا ملامح ، لسة معرفتش نفسى خالص ، شخصية غريبة كثير ، بتحب تبقى لوحدها .

لماذا دخلت عالم التدوين ؟
عشان عندى شىء اقوله ، و لأنى من صغرى بحب الكتابة اووووى ، كنت اشطر مادة فيها مواضيع التعبير ، كمان عشان لقيتها موضة بقى و حبيت اجربها لأنى كنت بكتب و مش بلاقى حد يقرا كلامى او بمعنى اصح مكنتش بكتب كثير الا ايام الدراسة و المدرسة و بس ، و النت و الفيس بوك نمولى موهبتى كثيييير .

أجمل كلمة قيلت فى وصف مدونتك ؟

مش عارف .

أهمية التعليق بالنسبه لك ؟

شىء مهم جداً ، و من غيره مقدرش انى اكتب اى شىء ، التعليق بالنسبة لى بيحسسنى ان فيه ناس بتشاركنى ما اكتبه ، ناس عندها استعداد انها تقدرنى ، بتدينى امل شوية فى اى شىء ، لأنى لو ملقتش تعليقات و بقيت بكتب لنفسى و بس ممكن اطق اموت ابقى كأنى بكلم الحيطان

:-(

أحسن بوست كتبته وليه ؟ ضع اللينك

أحسن بوستات اللى عن استاذ مجدى مهنا الله يرحمه

و كمان البوستات ديه

أنا و الفيس بوك

الله يرحمها أيام

سامحينى

أضيئوا الشموع

عيد الرياضة

أفضل بوست قرأته ؟وأفضل مدونة؟

أعترف و أقر - مايكل

سرداب الحياة – Appy

النسيان – فتاة من الصعيد

كنا و أصبحنا – أحمد الصباغ

جميعنا حواديت – دعاء مواجهات

هو فيه تدوينة عجبتنى جداً عند الأخت العزيزة بسمة عبد الباسط

دورت عليها عندها ملقتهاش كانت عن النهار – ان شاء الله اقولها تحطها فى المدونة لانى قريتها على الفيس بوك

بس هيا ليها تدوينات تانية جميلة منهم ديه

لا يا صديقتى

أفضل مدونة ، معظم المدونات اللى بقراها

تستحق انها تتقرا

بس كإعلان غير مدفوع الأجر

انصحكوا بجد تشوفوا مدونة محدش بيموت ناقص حلم

بجد مدونة ممتازة و مختلفة ،

و مدونة فوق فى السما صاحبها

شاعر موهوب و ان شاء الله يبقى ليه مستقبل

هو جديد فى التدوين

و اتمنى انكوا تتابعوا اشعاره .

مع كامل تقديرى لكل اصدقائى المدونين .

الإنترنت بالنسبة لك ايه ؟

إدمان نفسى اقدر أتخلص منه

تمرر التاج لمين ؟

مايكل

محدش بيموت ناقص حلم

بلاش فضايح

مواطن مصرى

مونى الشريف