الثلاثاء، يناير 12، 2010

أسوء محامين

بعد تقديم التعازى لأخوانى الأقباط المصريين و الجندى المسلم المصرى فى الحادث الأليم اللى حصل ليلة عيد الميلاد المجيد 6 يناير .
نخش فى الموضوع و معلش حكتب بعامية عشان اوصل فكرتى اسهل و ان كنت بحب اكتب بفصحى .


يقول الشيخ محمد الغزالى رحمه الله (إن أهل الإسلام يخذلونه كل يوم ، لأنه اعدل قضيه فى يد أسوء محامين)
(1)
بحب اوووى احط نفسى مكان الأخرين عشان اتصور الوضع ازاى ، و ان انا لو اتحطيت مكان فلان الفلانى حيبقى الوضع ازاى ، يعنى المقال ده نقد ذاتى للمسلمين من مسلم زيهم ، اصل الطبيعى و البديهى انى لا انتقد بنى دينى و اقول دووول زى الفل و احنا حلوين و متسامحين و شوية الهجص ده اللى فى بعض المسلمين و بقول المسلمين مش الإسلام و حط خط عريض على المسلمين .
انا بحب انتقدنا كمسلمين و ادور على مشاكلى فى التعامل مع الآخر قبل ما ادور على الآخر عمل ايه لأن يعنينى صورة دينى فى المقام الأول و اللى للأسف بعض المسلمين محسوبين عليه .

(2)
لا تأكيد على البديهيات مينفعش تطلع تقوللى تصدق يا اخى الشمس بتطلع من الشرق ، يعنى بديهى جداً اننا كمسلمين رافضين اللى حصل و ابرياء من السفاحين اللى عملوا ده ، لكن مجرد التأكيد كل شوية و الله يا جماعة ابرياء منهم و الله و لا نعرفهم و الله ديه مش اخلاق مسلمين
يؤكد ان صورتنا كمسلمين سيئة نتيجة اسباب كثيرة من أهمها المسلمين نفسهم و ده حوضحه لاحقاً ، لكن للأسف المسلمين مش عاوزين يعترفوا ان عندهم مشكلة ما فى تعاملهم مع الآخر .

(3)

حد حيقولك ان الهجوم على الإسلام جزء من مؤامرة ، فأقوله إن نظرية المؤامرة ان كان لها وجود فالمشكلة مش فيها المشكلة فى الأهبل اللى سهل التأمر عليه ، لو موجودة انت ليه مش بتحاول تبطل مفعولها يقولك يا اخى اللى حصل فى نجع حمادى فيه ايادى امريكية للعبث بالمنطقة و ضرب الوحدة الوطنية فى مقتل ، يا حبيبى ماشى حعمل انى مصدقك ، بس المشكلة فيك انك عندك مشاكل فى علاقتك مع اخوانك المسلمين او المسيحيين و هو دخل يكبرها ، على فكرة انا بس بفكر و بحاول احلل الموضوع لكن انا مش مؤمن بنظرية المؤامرة خالص ، و اختراع النظرية ديه عند الأخ اللى حاسس انه بيتم التآمر عليه بتخليه يستكين و يعيش فى دور الضحية اللى يا حرام الكل عمال يخطط و يتآمر عليها ، و العرب شغالين الله ينور احنا ضحية و الكل بيتآمر علينا
عشان ينهب ثوراتنا ، خلصنا من العرب ، دخلنا فى اخواناه المسيحيين اللى مجبرين يعيشوا دور الضحية دائماً و للأسف ده دور واقعى و حقيقى ، بس المشكلة انهم فضلوا ساكتين عملاً بما يؤمنون به - صلوا لأجل الذين يسيئون اليكم او بمعنى ابسط فلان بيقولى كذا يا عم انا قولتله الله يسامحك !
فى مرة كنت بعمل حوار مع قسيس فى الكنيسة المرقسية و قاللى المسيحيين حاولنا اننا نقولهم بعد كذا حادثة اهدوا و متكسروش حاجة و ضبط النفس بس كان بيطنشونا و بيخرجوا للشوارع يتظاهروا و يكسروا ، و بقول مجرد ان المسيحيين عايشين دور ضحية ده مش حاجة ظريفة خالص ، بس هماه عايشين فيه مجبرين عشان اكون واضح و كلامى ده مقصدش بيه انهم بيدعوا انهم ضحايا لأ هماه ضحايا فعلاً لشوية مسلمين صوتهم عالى فى المجتمع بينما اصحاب الرؤى الهادئة العاقلة مبيتسمعلهمش و ان اتسمع بس عشان يتقال ده قابض من الدولة عشان يقول بقين زى دووول .

(4)
المسلمين بقى عايشين دور الضحية و لابسينه ليل نهار بدرجة تصل الى حد الإتقان ، منعوا النقاب انها حرب على الإسلام منعوا المآذن إنها حرب ، قتلوا مروة انها الحرب ، رحلوا مسلمين انها حرب على الإسلام ، و المضحك فى الموضوع ان المسلمين اللى مطلعين ميتين اصحاب الديانات الأخرى فى بلدهم يجوا عند الغرب و يقولك الغرب مدعى الحرية يمنع النقاب و يمنع المآذن اين الحرية المزعومة التى يتشدق بها الغرب ؟!
صحيح ان اصحاب الديانات الأخرى لهم بعض الحرية فى مصر مثلاً لكن حرية منقوصة يكفى انه بيمارس حريته بنوع من الحذر و الخوف و عدم الإحساس بالأمان ، و بخصوص موضوع الشهيدة مروة الله يرحمها طلع علينا شوية ناس قالك الغرب العنصرى ضد المسلمين قتلوها عشان مسلمة اين حرية الرأى و حرية الإعتقاد و ادانوا حادث قتل مروة فى الوقت اللى هماه يتعاملون بنوع من التشفى مع حادث حرق بيوت البهائيين – اللى انا ضدهم من هنا لبكره لكن عمرى ما كون موافق على ترويعهم و اخافتهم و تعريض حياتهم للخطر .
المسلمين بقى مع نفس دور الضحية عايشين فى حكاية احنا درجة اولى و الباقى تحتنا احنا بريمو و الباقى ترسو ، و قبل ما حد يقولى الأية الكريمة كنتم خير امة أخرجت للناس احب اقول ان اه خير امة بس مش عشان نتعامل بهذه الفظاظة و الغرور و العنف اللفظى على الأخر بطريقة هتلر و الجنس الآرى .

يعنى المسلمين مش عاوزين خالص يحطوا نفسهم مكان الاخر يقولك احنا دولة اغلبيتها مسلمة و باقى الديانات اقلية اذن الحكم للأغلبية و كدة ، طب ما حضرتك كمسلم فى بعض الدول الأوروبية اقلية برده بس سيادتك لأنك عايش انك درجة اولى عاوز تمشى البلد على مزاجك ازاى يمنعوا النقاب فين الحرية ازاى قانون يمنع المآذن ، رغم انك لو تعاملت بنفس المنطق اللى بتتعامل بيه هنا فى مصر حتقول انه يحق للأغلبية فى اوروبا تاخذ القانون اللى يناسبها و على الأقلية ان تستجيب زى ما انت عاوز هنا المسيحيين يستجيبوا لقرارك و قانونك ، مع الأخذ فى الإعتبار ان المسيحيين هنا مصريين اباً عن جد
اما انت فى اوروبا فإحتمال تكون مهاجر و خدت الجنسية الفرنسية او غيرها يعنى مش صاحب أرض اصلاً .

فى برنامج نحن هنا قال ابراهيم عيسى تعليقاً على منع المآذن انه للأسف الشديد لو اتعمل استفتاء فى مصر بمنع بناء الكنائس نتيجة الإستفتاء حتبقى 99 % نعم ، و الصراحة عنده حق .
بخصوص المسلمين احب اسيبك مع التعليقات ديه على الخبر ده
"القضاء" يرفض إدراج عيد القيامة إجازة رسمية
طبعاً فيه تعليقات لأخوة مسيحيين صادمة برده بس هى مجرد رد فعل لأن للأسف بعض المحسوبين على الإسلام محتلين النت تقريباً
و انا بتكلم محتلين المواقع الإخبارية الشاملة عشان ميجيش حد يقوللى شوف المواقع القبطية و التعليقات فيها لأن طبيعى المواقع القبطية معظم تعليقاتها لأشخاص اقباط .
زهقنا بقى
بواسطة: محمد
بتاريخ: الثلاثاء، 29 ديسمبر 2009 - 14:36
بصراحة زهقت كل يوم يطلعو بحاجة


ربنا موجود
بواسطة: محمد
بتاريخ: الثلاثاء، 29 ديسمبر 2009 - 14:56
رد علي التليق رقم 2 /// ربنا موجود اة بس اية الا مسيرة ينتهي يا جماعه انتو واخدين حقكم تالت ومتلت عايزين اية تاني زهقتونا في عشيتنا ارحمونا بقا شوية وكفاية انكم عايشين في امن وامان في مصر ام الدنيا

عيد راس السنة الهجرية
بواسطة: محمود
بتاريخ: الثلاثاء، 29 ديسمبر 2009 - 14:59
والنبي قبل ما يعملوا عيد للقيامة المزعومة يعملوا عيد راس السنة الهجرية ويدونا يوم بديل لو صادف الجمعةكفاية رضوخ للأقباط بقىعلى الاقباط انهم يعرفوا إن الأغلبية مسلمةهل أروبا بتعمل عيد الأضحى أجازة رسمية ؟نبطل لعب وضحك على الدقون

(5)
عارف ان بعض المسلمين حينتقدونى عشان انتقدنا كمسلمين بالشكل البشع ده بس انا قولت من الأول انا كمسلم تهمنى صورة دينى و اول طريق للإصلاح هو اننا الاول نبص على اخطائنا الاول اللى بتتنسب للدين و بتسىء لصورته ،
و عارف انهم ممكن يقولوا يعنى انت خلاص مش شايف ان المسيحيين مخطئين خالص ، لأ مخطئين بس حجم الجرم اللى بيعمله بعض المسلمين اكبر لإعتبارات كثيرة ، بس بخصوص اخطاء المسيحيين فى الحوار اللى عملته مع القسيس بصعوبة خليته ينطق بكلام يدين تصرفات بعض المسيحيين لدرجة انى تقريباًُ كنت بحط الكلام على بقه ، و ده موجود عندنا كمسلمين بس محدش عاوز يعترف بأخطائه و يصلحها ،
و ملحوظة تانية كل مشكلات المسيحيين لحد دلوقتى شايفها رد فعل و بس .

طبعاً حد حيقولى زكريا بطرس و اللى بيعمله اقوله الراجل بيجرح فى العقائد و فى الأديان و هو لحد دلوقتى كله كلام فقط ، حتى المسرحية اللى حصلت سنة 2006 فى اسكندرية و كان فيها اساءة للدين الإسلامى كانت مجرد كلام و فقط ، كلام يجب التعامل معه بطريقة عاقلة بدون لا تكسير و لا حرق كنائس ، و معتقدش ان اى مسيحى قام لحد دلوقتى بعمل اى سلوك فعلى لقتل مسلمين ، لكن للأسف العكس حصل كثير ، و حتى بعض الأحداث اللى بيحصل فيها مثلاً ان ولد مسيحى يعاكس بنت مسلمة او ولد مسيحى يغتصب طفلة مسلمة ، او شاب مسيحى يمارس فعل غير اخلاقى مع فتاة مسلمة و يصورها ،كل الأمثلة ديه مالهاش علاقة بالدين اصلاً هى جرائم اجتماعية بتلعب على اختلاف الدين عشان تجرها للطائفية يعنى اساساً سببها مش دينى خالص .

(6)
ياريت لو فيه اى نقص فى المعلومات عندى او اى شىء محتاج توضيح حد يتطوع و يقولوه يمكن اكون غلطت فى حاجة .

هناك 31 تعليقًا:

كلمات من نور يقول...

حاعمل زي اللي بيقولوا هيه هيه أول تعليق ..........بس موضوعك محتاج قراءة بتؤده وحاعمله كوبي وابتدي ارد على نقطة نقطة علشان بجد انت مش واخد بالك من حاجات كتير بس أنا عارفه إن كل غايتك وأملك إصلاح حالنا كمسلمين ...انتظرني  

اقصوصه يقول...

الله يفرجها علينا

نعيب زماننا والعيب فينا

وما لزماننا عيب سوانا!

كلمات من نور يقول...

ليه مش عارفه اعمل كوبي وبيست للبوست بتاعك؟ ممكن طلب؟ ابعتهولي ايميل عشان أقرا وأرد على نقطة نقطة بالشهود والقرآن والمقالات ...

اسمع بقى النكتة المعيبة دي:

و أنا بأقرأ جريدة الأهرام : معلش بحب اقرا الاخبار بايته .قريت خبر واجع قلبي قوي : شاب اسمه محمد عبد الوهاب طيار اد الدنيا راح أمريكا يتمرن ويزداد علما وهو راجع رايح على بيت أمه شايله حنينه وماشي وقفته دورية بتاعة بوليس وهوب انت محمد عبد الوهاب مهرب المخدرات .يا ناس لا ..حكمت المحكمة حضوريا ...ودخل محمد السجن وعاش وسط مجرمين انتهكوه بكل الوسائل أغربهم العض ..كما أشارت أخته ..وماتت أمه كمدا على ولدها حينما رأته وراء القضبان منكسرا ...ومضت الأيام و ثبت لهم أنه مش محمد عبد الوهاب مهرب المخدرات لا يا جماعه داه محمد الطيار بس دي تشابه أسماء.....داه ولا قصص اخل الوفي والمستحيلات الأربعه يا ناس..يا قهرتي يا قهرتي ووجعي بجد ...أخد أبنائي و أروح فين؟بعدما كنت أقول إلا مصر أسيب مصر لمين ..............اللهم لا اعتراض

http://www.masrawy.com/News/Egypt/Politics/2010/january/11/egyptian_pilot.aspx

dr.lecter يقول...

رائع بجد نفس اللي بقوله بقالي 4 سنين

انت كل افكارك هي اللي جوايا وقلتها ميت مره وتريليون مره

مين الغلطان؟ الاتنين المسلمين والاقباط الاننين سبب كل اللي حصل الاعلام الكتابات اياها النخبه من الطرفين الخطاب الدين

لما خطيب جامع كل جمعه يقول يارب انصرنا علي النصاره الكفره ويعدي بالصدفه واحد مسيحي يسمع ده تتقوع رد فعله يبقي ايه

ده لو مدخلش دبح في المسلمين اللي جوه يبقي اتهاون جدا في غيرته علي دينه


الاقباط مستنيين تدخل من بره يرفعهم لمواطني درجه اولي وده مش هيحصل

انا مشفق عليهم مستنيين العدرا تطلع لهم علشان يلتمسوا معجزه زي مالمسلمين مستنيين شجره مكتوب عليها الله يتباركوا بها


احنا حالنا يعصب علي الكافر انا اشك اصلا ان اي بلد تانيه غير مصر بيحصل فيها التناقض ده


احييك مره تانيه علي البوست

كلمات من نور يقول...

كلامك صح يا دكتور ليكتر ....أنا ساعات باكون نازله من بيتي وجيراني مسيحيين و الأمن اللي عندي مسيحي وهوب الاقي الشيخ بتاع المسجد بيدعي والمسلمين وراه : اللهم قاتل الكفار من اليهود والنصارى ...ببقى عايزه احفر حفرة اتدفن فيها ......ربنا سبحانه وتعالى قال لسيدنا محمد : لو كنت فظا غليظ القلب لانفضوا من حولك ..ورسول اله صلى اله عليه وسلم عمره ما كان شتاما أو لعانا وعمره ما رفع إيديه دعى على حد حتى ولو كان من أهل اكتاب أو حتى المشركين ..ولي عودة

كلمات من نور يقول...

مقالك مهم جدا يا بداروي يا ولدي : إحنا مسلمين ولازم نعرف نتعامل إزاي مع أهل الكتاب في السلم وفي الفتن والحروب .رسول الله صلى الله عليه وسلم حينما غاب اليهودي ، الذي كان يرمي عليه القاذورات وهو خارج وداخل إلى بيته، سأ ل عنه بل وزاره حينما علم بمرضه و أنه يحتضر وحينها أسلم هذا اليهودي ولكن حينما آذى أحد اليهود إحدى الصحابيات غضب رسول الله لله ولدين الله عز وجل ..إذن علينا أن يكون رسول الله قدوتنا وعلينا أن نتعلم الكثير من أخلاقيات غابت عننا
قال تعالى: لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِمَنْ كَانَ يَرْجُو اللَّهَ وَالْيَوْمَ الْآَخِرَ وَذَكَرَ اللَّهَ كَثِيرًا.
الخلاصة إننا لازم نكون مسلمين بأدبنا و أخلاقنا وبغضبنا لله ورسوله ونقرأ ونتعلم ونعي ما يحدث من فتن مقصود بها شر عظيم إذا ما قامت فتنة طائفية في بلدنا هذا..

الشعب لابد له من حكومه تشكمه يقول...

اولا كلمتين كده على هامش البوست:
لقاء المنصوره المأسوف عليه,,
ده انت عارف كويس اوىىىىىىىىىى انت كنت بتتناقش فى ايه وبناء على ايه اتقالك كده,
وقول اللى انت قلته وهتسمع تانى نفس,
لانك كنت بتتكلم فى نقاط غير اللى انت بتتكلم فيها فى البوست ده اصلا.
يعنى المقارنه مرفوووووووووووووووووضه.

لكن لما تتناقش فى سنن مؤكده وحجات فى صلب الدين يباه هتسمع التعليقات اللى انت بتسميها تعليقات فيها رعونه.
وانت فاهمنى طبعا.


بالنسبه للبوست ده معتقدش ان فى اى حد اصلا هيغلطك فى كلامك لانه ببساطه معظمنا ان مكنش كلنا متفقين عليه.

لا كل المسلمين ملائكه تمشى على الارض ولا كل المسيحين شياطين تمشى على الارض.
احنا عندنا ناس مثال سئ جدااا للاسلام ونفس الشئ عندهم.
دا لا عيب فى الاسلام ولا المسيحيه.
عيب اشخاص بيطبقوا الدين بمزاجهم.

ولا دينا بيحرضنا اننا نعامل اصحاب الاديان السماويه بطريقه وحشه ولا بيحرضنا على القتل.

دا سيدنا محمد لما اتكلم على سيدنا عيسى قال اخى عيسى,
وعندنا فى القران السوره الوحيده اللى باسم امراه هى سورة مريم.

يعنى كلامك محدش هيختلف معاك فيه.

غير معرف يقول...

كل المفدمات اللي فاتت والاستجواب ده علشان كلامك ده :)

اعتقد ان نفي وجود فتنه طائفيه استهبال اصلا

هو بس يمكن المتطرفين دايما صوتهم اعلى ... وافعالهم اسوء

تحياتي

ستيتة يقول...

من كتر ما انا موافقة على كل حرف
اي مناقشة مني ها تبقى مجرد استعراض رأي
زي الفل
كله كلام بيوصفنا بصدق وبدون اي حزازيات

Tears يقول...

مش محتاج تشرح و تشهد فى اول التدوينه و تعمل الف حساب لالى بيفتشوا فى ضمير الناس عشان يرهبوهم

غير معرف يقول...

شكرا جزيلا على طريقة العرض الجيدة
و الموضوع الهام
ربما المعلقون في اليوم السابع يفتقدون التسامح أو الثقافة نتيجة لتراكم التفرقة و الكره على مدى سنوات
لكن بصورة عامة هذه التعليقات لا تعبر عن كل فئات الشعب
و لو إني - شخصيا- لا يفرق معي كثيرا أخذ يوم اجازة لمسلم أو غيره ما دام مواطن له الحق في أخذ اجازة يوم عيده أو احتفاله.

تأثير الفراشة يقول...

السلام عليكم و رحمة الله و بركاته

الموضوع ده فعلا متشعب جدا و بيدل على أمراض اجتماعية و نفسية كثيييرة جدا متغلغلة فى مجتمعنا حاليا للأسف الشديد ، و حضرتك قلت الخلاصة فى مقولة الشيخ محمد الغزالى اللى فى بداية البوست ، فعلا..أعدل قضية فى يد أسوأ محامين

ربنا يستر بجد

تحياتى لحضرتك

محمد فؤاد (صاحب عمود النور) يقول...

بص يا احمد...

موضوعك منطقى جداااا وكلامك عجبانى ومعاك فى حاجات كتير اننا فعلا اللى بنخلى شكلنا وحش واللى بنخلى الناس تتكلم علينا وان اللى حصل دا مش من تعاليم الاسلام ولا تعاليم الرسول صلى الله عليه وسلم وانا كتبت مقال فى المدونة بتاعتى وقولت انهم ليسوا منا بس انا عايز اقولك حاجه المسيحين فى مصر مش بيتعملوا على انهم موطنين درجة تانيه ولا حاجه بدليل ان معظم بل واكتر تجار الدهب مسيحين وانت اكيد عارف يعنى ايه تجارة دهب فى الاقتصاد .
وكمان انت نسيت ان اكبر كيان اقتصادى فى مصر هو الاخ نجيب ساويرس وانا كامصرى بعتز جدا ان مصر فيها عقليه اقتصادية ذيه وكنت فرحان بحكم القضاء لما جيه فى صفة.
وماتنساش ان مصر من يوم الفتح الاسلامى ليها وهى اصبحت دولة اسلامية وداخل قانونها الشريعة الاسلامية .

تعرضك للموضوع بشكل عقلانى شدينى انى اكتبلك تعليقى واقرى الموضوع لاخر حرف

وزى ما شيما قالتلك اللى حصل فى المنصورة واللى خلا رد فعلى كدا انك اتكلمت فى حاجات هى اساسيات وبتجادل فيها بشكل خاطئ
ربنا يوفقك يا احمد

(انا شفتك فى مجلة احنا..منور المجلة)

غير معرف يقول...

عزيزي
ان المدونون العرب يتحاورون معي الآن على كرسي الاعتراف
و يستجوبون مدونتي - شيء بقلبي-
http://shayunbiqalbi.blogspot.com/
و ذلك في مجلة التدوين العربي ادخل و شاركهم التقييم كما تحب
http://arabicos.blogspot.com/2010/02/sonnet.html
مع تحيات اختك
SONNET

-_- يقول...

شفت حلقة ابراهيم عيسى و كان فيها من الحقائق الصادمة كثير

سارة نجاتى يقول...

فى برنامج نحن هنا قال ابراهيم عيسى تعليقاً على منع المآذن انه للأسف الشديد لو اتعمل استفتاء فى مصر بمنع بناء الكنائس نتيجة الإستفتاء حتبقى 99 % نعم ، و الصراحة عنده حق .


أتفق تماما
و الصراحة يا بدراوى بحييك على أنك مسكت الموضوع من الزاوية.. و بمعنى أصح على جرأتك أنك تعمل كده أنا مقرتش التعليقات اللى عندك بس توقع حد يدخل يشتمك يعنى ههههه
تحياتى

فينك صحيح

غير معرف يقول...

انا جيت اسأل عليك لأنك مختفي على غير العاده

يا ريت تكون بخير :)

ويا ريت ترجع تكتب يا بدراوي

تحياتي

غير معرف يقول...

طيب كويس انك كويس الحمد لله :)

موش هترجع تكتب تاني بقا :)

على فكره عيب اوي لما تشكرني اني سألت ... المفروض لو مسألتش تعاتب وتزعل :)

تحياتي

Ebtsam يقول...

الزملاء الأعزاء تحيه طيبة وبعد:
تسعي الشبكة العربية لمعلومات حقوق الإنسان لإصدار مطبوعة دورية خاصة بالصحافة الشعبية تحت اسم "وصلة " تنشر فيها بعض مما ينشره المدونين من كتابات وتعليقات على الأوضاع المحيطة بهم في مصر والعالم العربي .
ونرجو مشاركتكم معنا في المطبوعة بالسماح لنا الاستعانة ببعض مما تكتبونه على مدوناتكم من موضوعات بعد موافقتكم على النشر .
نرجو سرعة الرد
مع الشكر
ابتسام تعلب
للتواصل
الايميل : wasla@anhri.net

Ms Venus يقول...

معقولة اخيرا لقيت انسان عنده عقل وضمير


صدقنى حسيت انى بدور على ابرة فى كوم قش


كلامك ارفع له القبعة واحييك فى صمت

حفيدة عرابى يقول...

أنا أسفة
انا كنت بكلم نفسى والله فى الموضوع ده
وحسيت فعلا ان اول تعليق لى
كبر الحكاية
بس انت برضه فى تعليق لك
ضايقنى بزيادة

بس مهندس مصرى
بصراحة
ادانى الرأى اللى كان نفسى حد ينصحنى بيه

خلاص مش زعلان
أختك الكبيرة سنا

واتخنقت يعنى
وطلع ده عليك
مفيش حاجة

انا مستنية منك تعليق
تقول انك خلاص مش زعلان

Israa El-sakka يقول...

أنا جاية بس أسلم عليك بعد غياب عن التدوين بتاع 3 شهور :)
ربنا يستر على البلد

غير معرف يقول...

الله يسلمك يا بدراوي

ها عامل ايه ؟

فضيت ولا لسه ... ربنا يكرمك يا رب

اتمنى ترجع تدون قريب

تحياتي

-_- يقول...

اقتباسات رائعة

م/ الحسيني لزومي يقول...

اللهم احفظ مصر من كل سوء

حفيدة عرابى يقول...

ايه الاخبار؟
انا مستنية المواضيع والكتب والاختبارات :)

EMAN HASSAN KAMEL يقول...

الكلام الزين يخرج من الراجل الزين سلامى لحضرتك

غير معرف يقول...

ازيك يا بدراوي...انا قلت انك نسيتنا والله..

متشكره لسؤالك وتعليقك...بس حاول ترجع تاني لو سمحت..

وأسفه لو قصرت في السؤال عنك...بس انا اعتقدت انك خلاص موش بتدخل المدونه ..

تحياتي

حفيدة عرابى يقول...

الغياب طال
انت فين؟

فاتيما يقول...

انتا فيييييييين يا بدراوى

غيابك طول قوى يا بنى

يا رب تكون بخير

طمن اخواتك عليك
متسبناش كدا كتير
بقالنا شهر و ميصحش كدا
و لا إيه؟؟

ان شاء الله تكون بخير

تحياتى ليك

حفيدة عرابى يقول...

يعنى انت مش عايز تطمنا عليك
ماشى ياسيدى انااطمأنيت لوحدى من عند فاتيما