الخميس، ديسمبر 10، 2009

متقولش مدينة قول محافظة

(1)
جولة الرئيس أول هذا الأسبوع للصعيد هى فرصة ذهبية لإستخلاص الدروس و العبر كى نصبح جميعاً عبرة لمن لا يعتبر ، ففى أول الأسبوع قامت صحيفة أخبار اليوم بعمل صفحتان بمانشيت كبير بعنوان مبارك للصعيد و أعتقد العنوان يكفى ،

و بالطبع دخلت صحيفة الجمهورية على الخط قائلة
المنيا ولدت – بضم الواو – من جديد ، و قد تكون بكسر الواو أيضاً لكن لا نعرف الأخت منيا ولدت ايه بالضبط ؟!

كل هذا طبيعى و مألوف و تعودنا عليه ، لكن اهم حدث فى تلك الزيارة هو ذلك الإكتشاف العلمى الخطير الذى عرفناه من الدكتور حاتم الجبلى
ففى عنوان على الصفحة الأولى فى صحيفة الجمهورية أيضاً
عنوان ثانوى يقول
الرئيس يسأل د.الجبلي عن ازدياد الأورام.. والوزير يجيب: الناس عمرها طال
و لمزيد من التفاصيل :
وتساءل الرئيس أيضاً عن سبب زيادة معدلات الإصابة بالأورام في مصر خلال السنوات الماضية. فأرجع الجبلي ذلك إلي زيادة متوسط عمر المواطن
المصري لأكثر من 70 سنة وهو ما يؤدي إلي زيادة معدلات الإصابة بالأمراض غير المعدية مثل السكر وضغط الدم والكلي.


و هو اكتشاف مذهل اذن عزيزى المواطن الأورام دليل طول عمر بإذن الله ، و هذا يشبه تفشى مرض النقرس مثلاً و الذى يعنى ان الناس بتاكل لحمة كثير .


(2)
اما الخبر الثانى فهو تحويل مدينة الأقصر الى محافظة و هو خبر قامت صحيفة الجمهورية بإبرازة فى الصفحة الأولى بعنوان
الأقصر محافظة
و هو خبر يجعلك تموت ضحكاً و كمداً و غباءاً ، فأنت لا تفهم هل هو عنوان تقريرى ام تعجب ام استفهام
هههههه الأقصر محافظة ارجوك قوللى ما هو الإحساس الذى انتابك حين قرأت الخبر ؟

انا تذكرت قصة الرجل الذى وضع على علبة السكر ورقة مكتوب عليها ملح كى يبتعد النمل عن العلبة .
و فى تفاصيل الخبر
واستقبل الأهالي الذين حضروا جولة الرئيس.. القرار بالتصفيق ووجهوا الشكر للرئيس علي هذه اللفتة الكريمة التي كانت تمثل حلما لهم طال انتظاره.

كل هذا عادى لكن تقرأ بعد ذلك فى صحيفة الأخبار امس الأربعاء على صفحة كاملة
أفراح الأقصر مستمرة بقرار الرئيس التاريخي


استقبلت جماهير وشعب الاقصر قرار الرئيس حسني مبارك بسعادة بالغة واحتشدت امام الديوان العام للمجلس الأعلي للأقصر لاستقبال الدكتور سمير فرج بمجرد عودته من مطار الاقصر الدولي لوداع الرئيس مبارك.. تبادل الأهالي عبارات التهنئة مع المحافظ ومع اللواء السيد الوكيل السكرتير العام للمحافظة الذي يعتبر مهندس عملية التنمية والتطوير في الأقصر وقال الدكتور سمير فرج إن قرار اعتبار الاقصر محافظة هو الهدية الكبري من الرئيس مبارك لشعب الاقصر .

ثم كانت نهايتى على هذا الخبر المنشور اليوم فى صحيفة الجمهورية أيضاً و هو
أول محافظ للأقصر يؤدى اليمين الدستورية !

أعتقد بعد هذا القرار لو تم ضبط اى مواطن و هو يقول مدينة الأقصر سوف يتم اتهامة بتكدير السلم و تعطيل مسيرة الإنجازات و كسر فرحة الشعب و انه لابس نظارة سودة و باصص لنص الكوباية الفاضى و غيرها من الكلام
و لى سؤال هل تفرق محافظة من مدينة مش مهم المسميات المهم الحشو !
و هل خلاص بقى مجرد تغيير يافطة بقى انجاز تاريخى و قرار طال انتظاره
و كأن الناس بتصحى تقول امتى بقى نبقى محافظة ، ايييه ادينى عشت و شوفت يا بنتى لما الأقصر بقت محافظة .

هناك 26 تعليقًا:

well يقول...

"هو اكتشاف مذهل اذن عزيزى المواطن "الجبلى المفروض ياخد جايزة على الاكتشاف ده
"أول محافظ للأقصر يؤدى اليمين الدستورية !" كرسى جديد من كراسى البلد ..يا ريت المحافظ يحافظ عليه
تحياتى ..اخ بدراوى

قلم رصاص يقول...


هههههههههههههههه

ايه الاخبار السعيدة دي بس

طبعا لما قريت خبر الاقصر محافظه ..عادي

الناس يقصدوا ان الاقصر محافظه ع النظام

ههههههههههههههههه

عجبت لك يازمن !

يااخي انا مش فاهم الناس عاوزا توصلنا لايه بالظبط ..!

يعني تغيير الاسم ده انجاز ؟!

عارف زي ماده فكرك بالراجل اللي كتب ملح على السكر .. فكرني بمثل قديم في الأرياف بيقول :

هو مقأيض الحمار على الحمار حرفه ؟!

ههههههههههههههههههه

أصل المثل ده ليه جذور تاريخيه مفادها انه كان فيه راجل فلاح بسيط على اد حاله كان كل شهر تقريبا يغير الحمار بتاعه .. لدرجة لفتت نظر الناس كلها.. فطلعوا عليه المثل ده
هههههههههههههههه

دمت على خير

واطمن مصر بتتقدم بيهم

بس لفين معرفش

الشعب لابد له من حكومه تشكمه يقول...

_ المشكله ان الريس بيروح كتير اوى الصعيد ومفيش حاجه بتحصل,,
فاكر رئيس الوزرا لما راح الصعيد وواحد قاله بقالى انا وولادى شهور مأكلناش لحمه ومرتبى 100 جنيه,,

امر بصرف 3 كيلو لحمه ليه:))
(مسؤلين دمهم خفيف)

اهو الريس بيتعامل كده حقنة بنج وكليو لحمه وكله يباه تمام,
لكن مثلا نرفع مرتب الراجل ونحل مشكلته من جذورها..!!
!نروح نزور الصعيد والاسم اننا مهتمين بيه لكن نحل مشاكله...!!!!


**الرئيس يسأل د.الجبلي عن ازدياد الأورام.. والوزير يجيب: الناس عمرها طال.

يارااااااااااااااجل ايييه محدش قاله حاجه عن يوسف والى ولا ايه؟؟؟؟؟؟؟؟
وافتكر يسال دلوقتى بعد مكلنا فاكهه وقمح مسرطن بقالنا سنين جاى يسأل دلوقتى؟؟
وايه تبرير الجبلى ده,,
دنا لما سمعت تبريره حسيت انى عاوزه اقول:

ايه اللى جاب القلعه عند البحر؟؟؟


** بالنسبه لمدينه ومحافظه..
على راى صبحى والله متفرق معانا الاسماء:)

وفى مقوله اخرى:
والله متفرق سينا من سونيا:))

فتاه من الصعيد يقول...

ههههههههههه

ايوووون الريس جه عندنا .... وعملوله مطار خصوصي .... وافتتح مشروع الصرف الصحي اللي من سنه 97

بس الطرافه بقا ان المشروع اصلا لسه ماخلصش :D

مبروك الاقصر .... وعقبالنا

تحياتي

ستيته حسب الله الحمش يقول...

كده يا بدرا
يعني مش عارف الفرق؟
حاضر نعرفك وناكل من بيوتنا

المحافظة لها ميزانية منفصلة
والميزانية ها تزود عدد الموظفين الأكلين منهم والشاربين
وكل اسبوع ها يهدوا الشارع ويرجعوا يرصفوه
وها يهدوا الرصيف ويسرمكوه
وانا دايما لي كلمة في موضوع الفلوس ده
"خلي المقاولين تاكل"
وزي ما انت شايف قرارتنا كلها قرارات مصيرية
بدل مدينة بقت محافظة وبيهني الشعب نفسه
وكأنه عيد الجلاء او مستشفى الجلاء للولادة
وفي نفس السياق بينفي السيد وزير الصحة اننا رحنا في توكر من المية الملوثة والهوا الملوث والخضار المسرطن
وتلاقي نفسك تاني بتفتكر مسرحية المشاغبين
آلو
مستشفى الجلاء للولادة
اديني محافظ الأقصر لو سمحت :)

الفراغ يقول...

كله نفاق فى نفاق
ومصالح
اللى صحيح يستحق التهنئه هو الذى عين محافظ..والمحافظ على درجة وزير
هنياله ياعم
انضم للعصبه الاثمه

المعلم محمد صاحب المطعم - طعمية سخنة يقول...

تصدق انك بتعطل مسيرة التنمية
جري ايه يا عم
سيبونا بقي ننطلق !
بيتهيالي اللي الناس هتستفاده انها تتسرق اكتر لما يتخصصلها ميزانيات كمحافظة و تتلهف في جيوب السادة المسئولين
.................
سامع ان شارعنا هيعملوه مدينة لوحده قريب

مهندس مصري يقول...

فكرتني ببرنامج الراديو القديم
قل و لا تقل
في إذاعة البرنامج العام
:)
طبعاً المهم المضمون مش الإسم و اليافطة

و الأمراض اللي تقصف العمر سببها زيادة العمر دي آخر نكتة بجد

و إبعد عن قراءة الجرائد القومية الموالسة خوفاً على عمرك و ضغط دمك

يساري نوبي يقول...

بصراحه الاقصر من زمان ان لازم تبقي محافظه لوحدها و يمكن قبل حلوان و 6 اكتوبر اللي مايجوش ربعها
بس الاهم ان كان ف مصر زمان محافظات اهم و اكبر و اتلغت و زي محافظه النوبه اللي حولتها الحكومات المصريه المتعاقبه مش لمدن لا لمحليات تابعه لمراكز تابعه لمدن
يمكن تتريق علي كلامي زي مابتتريق علي تحويل الاقر لمحافظه لكنها الحقيقه الاقصر و النوبه اكبر مناطق آثار ف مصر و الاتنين ماكانوش محافظات
بدانا بواحده و عقبال التانيه

لقد خلقنا الله احرارا يقول...

يابالك الطويل
بتقرأ الجرائد دى
انا اخر حاجة عندى فى الجرايد التعبانة
دى اليوم السابع
اكتر حاجة ضايقتنى
ان الاورام زادت لان الناس عمرها طال
حقيقى بحاول ادور على رد مش عارفة
الناس دى بتنسى ان فى اخرة
وان ربنا هيحاسبها على النصب بتاعها
بوست جميل
ربنا يوفقك

الزنارى يقول...

السلام عليكم و رحمة الله و بركاتة
تحية طيبة و بعد
بالفعل فرح سكان الأقصر كثير و ذلك من خلال الذين أعرفهم من الأقصر كانوا فى منتهى الفرح و السعادة .
و لكن لماذا كل هذا الفرح لا أعلم لا فرق هذا اسم و هذا اسم ما الفرق ؟
على العموم هذا سيزيد شعبية الرئيس فى الأقصر ليس الا .
مع خالص الاحترام و التقدير
أحمد الزنارى

احاسيس آيوشه يقول...

ههههههه هم يضحك وهم يبكى مش جاى يزور اسيوط ويشرفنا بانجاز من انجازاته :)
يارب ارحمنااااااااااااا

فشكووول يقول...

ازيك يا بدراوى

تقولش يا خويا حيجيب الديب من ديله لما يزور المنيا ولا حتى يزور السيده زينب

شوف يا بدراوى ... هل رأيت فى حياتك نهرا......!!!!!!!اى كلام فى اى طحينه فى اى طبق كشرى

mimi يقول...

بدرا صباح مساء الخير

بصراحة طبعا أسلوبك في الكتابة ، بيعجبني جدا جدا ،

من وجهة نظري مش فارقة معايا من كون الأقصر مدينة أو محافظة ، عندنا حلوان و 6 أكتوبر أهم ، مفيش أي فرق خااااااالص من تغيير حالتهم من مجرد مدن الي محافظات ..

وسلامي للإكتشاف الرهيب
دي حكومة عاوزة تولع .. حسبي الله ونعم الوكيل

بدرا ، لك كل تحياتي

يساري نوبي يقول...

بدراوي
انا معاك ف النقطه دي
و بصراحه مش فارقه معايا تكون النوبه محافظه او لا بس انا كنت برد علي الموضوع مش اكتر

mohamed ghalia يقول...

دى اختراعات عملاقة فعلا تستحق الإشادة
ربنا يستر علينا ياصاحبى

مـحـمـد مـفـيـد يقول...

يا خبر ابيض
قريت اخبار وجمهوريه
ولسه عايش
ده انت جبل يا اخي

المعلم محمد صاحب المطعم - طعمية سخنة يقول...

شكرا يا ابو حميد انك حطيت البانر

اقصوصه يقول...

loooooooooooool

والله ضحكت ضحك

شر البليه ما يضحك!

الا وين الاقصر هاي؟

انا اخر حدود معرفتي بالفيوم :)

نهر الحب يقول...

حمد الله على السلامة
مش باين ليه؟

موضوع جميل ورائع.
دمت مبدع

خالص تحياتى

نهر الحب

م/ الحسيني لزومي يقول...

نحن مقبلون علي لحظات حرجه في تاريخ مصرنا
انتخابات مجلس الشعب 2010
انتخابات الرئاسه 2011
هل اعددت نفسك لتقول كلمتك
هل سجلت نفسك في الجداول الانتخابيه
اذا كنت قد سجلت نفسك ادعو غيرك
الحمله الشعبيه للقيد بالجداول الانتخابيه
باقي من الزمن 45 يوم

micheal يقول...

يا راجل حد يقرأ الصحف دي وعناوينها
أنت الغلطان من الأول
أنا بطالب بتحويل المهندسين لمحافظة
بما أني عامل فيها معظم إنترفيوهاتي يعني
:))
تحياتي

Hager Za3bal يقول...

للأسف ..المسأله بقت مسألة مسميات مش أكتر .. بس يبقي الوضع علي ما هو عليه :))))))))))

donya يقول...

مساء الخير
كل سنه وانت طيب

بس برضه ماعرفناش راي اجددنا الفراعنه ايه في الموضوعين
بالنسبه للأورام برضه ماهم كان عمرهم طويل يعني واجب ناخد رايهم
وكمان همه فرحانين ان بلدهم بقت محافظه والا ايه
وانت مستغرب ليه ان المنيا ولدت
مش هي عروس النيل والصعيد
طيب ماهو اي عروسه بيجيها يوم تولد
ده التطور الطبيعي للحاجه الرخمه (قصدي السقعه)
ههههههههههه
ماتبقاش تقري عن هذه الجوالات علشان ماتتعبش نفسيا
واوعي تتفرج علي التقرير الاخباري المصور بتاع التلفزيون
اوعي
ولقد ازعر من ازور

تحياتي

Hager Za3bal يقول...

امممممم

طيب مفيش بوست جديد؟؟؟

د. إيمان مكاوي.. أم البنين يقول...

عام هجري سعيد عليكم وعلى الأمة الإسلامية جميعها
عام يحدوه أمل جديد
ونسال الله عز وجل أن يكون عام نصرة للإسلام
تحياتي