الخميس، يوليو 29، 2010

صديقى الذى انتقل




شاهد: أولى جلسات محاكمة المخبرين المتهمين بقتل خالد سعيد على موقع صحيفة الشروق
-----------------------
حين ذهبت أمس للتغطية الصحفية - لصحيفة الشروق المصرية - لأولى جلسات محاكمة المخبرين المتهمين بقتل خالد سعيد لم أتخيل أن أراه، 10 سنين مرت على اخر مرة التقينا حيث كان زميل دراستى فى الصف الأول الثانوى، حين رأيته امس فى المظاهرة كان يقف لينظم صفوف عساكر الأمن المركزى كان يرتدى تلك البدلة الميرى السوداء،بينما يتدلى من خصره مسدس "شبهت عليه" ثم قلت ...... فابتسم لى ومددت يدى وسلمت كان يتذكر ملامحى مثلما انا اتذكرها لكن نظرات عينى كان تقول له "انت بقيت منهم" ، "انت بقيت معاهم" ، "انت روحتلهم، حدثته انت بتقضى تجنيدك هنا فقال : اه بينما كان الحر الشديد يمنعه من ان تتكلم.

ثم مرت ساعات اثناء تأديتى لمهمتى وشاهدته وفى كل مرة تلتقى عينانا لا يتخلى عن ابتسامته لكنه بالتأكيد قد تغير كثيراً.
ضباط الأمن المركزى وعساكره بالتأكيد هم اخوة لنا لكننا لا نر سيوفهم سوى علينا لا نسمع لهم حساً فى اى شىء لحفظ امن المصريين المهدد كل يوم.

عساكر الأمن حقيقى غلابة بجد احدهم و انا اقوم بتصويره ابتسم وقال لى صورنا يالا عشان نطلع فى التليفزيون بليل.
أما الأخر فرأيته يقف فى يده عصاه و فى الأخر كان يمسك بـ "سندوتش فول" ثم مر عليه احدهم من على باب المحكمة.
هذه اول مرة احتك بهؤلاء البشر حقيقى "صعبوا عليا".

----------

هناك 9 تعليقات:

كلمات من نور يقول...

مش تحكي حصل إيه في المحاكمة يا بني؟؟؟

أما صديقك فله الله ولنا الله جميعا...رمضان مبارك عليك يا بدراوي

dr.lecter يقول...

في مظاهره 9 يوليو قعدت اهزر مع العسامر اللي كانوا محاصريينا في اسكندريه غلابه والله وحتي الظباط الصغيرين

كلمات من نور يقول...

بدراوي بداروي :

مش لاقيه خالص اي لينك يوضح الموضوع الخاص بالقضية ....يمكن مش شايفه علشان يوسف كسر نظارتي ؟؟؟؟؟؟؟؟؟؟؟

ممكن توضحلي معلش هو فين الا بجد حاسه اني داخله اوضه ضلمة يا بني (:

adel يقول...

هم منفذين
احنا ولا عارفين نقول لا ولا هما برضه

فاتيما يقول...

حلو البوست جدا يا بدراوى

فيه لمحة انسانية عالية


للاسف فيه مهن حالياص امتهنت كرامتها بسبب ما لحق بها من سمعة رديئة سببها الديناصورات الآدمية اللى الديناصورات الحقيقة تخاف منهم
اما اللى زى صاحبك فهم لم يختاروا هذا المصير و بيبقى منتهى املهم الخروج منه سالمين عشان يبتدوا حياتهم و يملكوا قرارهم


تحياتى ليك
و مبسوطة جدا انك بتكتب
يا بنى لا تنقطع عن اخواتك
عشان بتوحشهم دا اولا
و اصلا لما ترجع بتكتب حاجات حلوة جدا اهو .. دا ثانيا

ثالثاً بقى
دمت بكل الخير

Kiara يقول...

نظرة مختلفة للامور

جميله بجد هما والله غلابة في كل حاجه بس للاسف مسيطر عليهم فكرة " عبد المامور " استغفر الله العظيم


بس هو حصل ايه في المحاكمة؟؟

ستيتة يقول...

كل عام وانت بخير يا بدراوي
رمضان كريم

مي ثابت يقول...

أولاً : باعتذر عن التأخر فى الزيارة .

ثانياً : كالعهد بك دائماً أسلوبك راقى مغلف بعاطفة شفافة ...و تلمس نقاط الخير فى الآخرين .

أخيراً : كل عام و أنت بمليون خير ... و رمضان كريم .

علاء المصرى يقول...

أسجل مرورى كل عام وأنتم بخير