الخميس، سبتمبر 03، 2009

أطول من زهور الربيع

تحذير : البوست ده غامق اوووى فاللى حيحس انه حيتعب لو قراه بلاش منه و مش مسئول عن اى ضيق لأى حد من قرايته .




هناك شخصيات لا تطول اعمارهم أطول من زهور الربيع فيرحلون تاركين الجو حولهم معطراً بعبير مآثرهم .
---------------
ترددت كثيراً فى كتابة هذا المقال ، لسبب واحد هو أننى لم أحب ان يشاركنى أحد مشاعر الحزن و لوعة الفراق و غياب الأحباب ، لم أحب ان اكون سبباً فى ان يقرأ أحد هذا الكلام فيكون سبباً فى نوبة اكتئاب او حزن او ربما دموعاً تخرج فى غفلة منه اثناء القراءة ،
ليس هناك اى استعداد لمن يدخل المدونة ان يقرأ هذا الكلام هو تعود ان يدخل ليضحك او ليأخذ عبرة و يدخل فى نقاش سياسى ، او اى سبب الا أن يبكى .

لكن قررت كتابة هذا المقال فى تلك الأيام الجميلة التى فيها من البركة و المغفرة و الرحمات الكثير ، ربما الكثير من المدونين فكروا قبلى فى كتابة هذا المقال و لكن نفس اسباب ترددى قد واجهتهم فطردوا الفكرة من عقولهم .

المقال عن الموت و لكن بشكل أخر ، عن الموت الافتراضى ، الموت على الشبكة العنكبوتية .

اتكلم عن المدونين ، هناك من غابوا و انقطعت اخبارهم و توقفوا عن التدوين ، و الكل قال بالتأكيد انهم خرجوا من حيز الإفتراضى الى الحيز الواقعى للسعى فى طرق الحياة الحقيقية ، لكن هناك اخرين للاسف غابوا و انقطعت أخبارهم و توقفوا عن التدوين لأنهم رحلوا افتراضياً وواقعياً رحلوا عن الحياة ،

رحلوا و بقيت مدوناتهم يزورها البعض من حين لأخر ، مدوناتهم اصبحت شواهد قبور ، منذ ايام دخلت الى مدونة لأحد الراحلين
فوجدت من يكتب فى صندوق الدردشة : ازيك يا محمد احنا عملنالك عمرة ، كل سنة و انت طيب ، انا عارفة انك معانا و حاسس بينا ، مدونة أخرى تجد تعليقات اخر بوست تقول السلام عليكم يا فلان ، انه النداء على الموتى ، السلام عليكم دار قوم مؤمنين ،
لا تملك سوى مشاعر من الحزن و قشعريرة و ربما تجد دموعك تتساقط رغماً عنك ،

هذا هو عيب التدوين ، كل شىء باقى على حاله ، تصميم المدونة بألوانها ببوستاتها ، كل شىء يذكرك بالراحل ، اتذكر ان جدتى حين رحلت منذ 13 عام ، قامت امى بعمل تغييرات فى غرفتها من تغيير للفرش و السجاجيد و تغيير اماكن الكراسى و الإتيان بمكتبة كبيرة لوضع هذا الكم الهائل من كتب مكتبة الأسرة ، كل هذا فقط لأن شكل الغرفة على حالها يذكرها بوالدتها و هى تريد ان تنسى او تتناسى انها كانت تجلس هنا و تشرب الشاى هناك و تشاهد التليفزيون هنا و تقرأ الصحف هناك ، لم تتحمل ، لكن من يستطيع تغيير معالم الغرفة الإلكترونية ، لذلك هم احياء بمدوناتهم ، لكنك لا تملك اذا دخلت اليها سوى الدعاء و البكاء ، خاصة انهم قد رحلوا فى سن الشباب و نشاطه و حيويته .

لذلك كتبت المقال لأنهم لهم حق علينا ، حق ان ندعو لهم فى هذه الأيام بالرحمة و المغفرة و ان يشملهم الله برحمته و عطفه و كرمه ، و على غيرهم من الراحلين اخرهم شابة مصرية منذ ايام لا اعرفها و لكنى تأثرت لرحيلها اتمنى ان لا ننساها من دعواتنا .

لذلك حين يأتينى هاجس الرحيل لى ، لا اتخيل ان اترك شخصيات جديرة بأن يعرفها الإنسان ، حتى اننى لا اعرف عدد المرات التى فكرت فيها فى اعطاء كل ايميلاتى و باسوورداتى لشخص اثق فيه و فى امانته ، فقط لكى يُعلم الأخرين اذا حدث لى مكروه ، و ربما هذا هو السبب الحقيقى لعدم حبى للإشراف على تعليقات ربما احتاجها يوماً ما فتصير مُعلقة لا هى نشرت و لا هى لم تنشر و تكون مليئة بدعوات أحتاجها .

هناك 16 تعليقًا:

adel يقول...

قبل اي حاجة شكرا جدا

علي فكرة التعليق الحلو و من غير مجاملة بيفضل عايش و بينفع صاحبه برضه

انا حاسس ان التدوينة دي زي شاهد القبر و انا حابب اكتب عليها كلمة و امشي

الموت عمره ماكان حاجة وحشة
وانا عمري ماخفت منه
عشان كده مبيجيش
........
.........
...............................
.........................

عادل صليب
2-09-2009
4:10 صباحا

----------------
*ملحوطة : دي مش نقط ... انا حذفت باقي تعليقي قصد
لاني مش حابب حد يضايق من كلامي او يعيط تاني
انا مبحبش حد يعيط بسببي

بدراوي بجد ربنا يخليك
كلامك ده جه في وقته قوي :)

micheal يقول...

طب تصدق بقي أن البوست ده انا لا شايفه نكدي ولا كئيب
بالعكس واقعي ومعبر وصادق جدا
عموما عالم التدوين زيه زي اي عالم..له إيجابيات وسلبيات..بتتعرف فيه علي ناس محترمة وناس مريضة..بتفقد فيه ناس يوميا وبتكسب منه ناس
هي دي الحياة عموما
خير يا بدرو..انت مخاصمنا ولا ايه..مش كفاية أنك مختفي من الفيس
:)

ستيتة يقول...

عارف ايه اكتر شيء بيخوفني؟
بحس ان اللي بيبعد عنا شوية بنفتقده وبعدين بننساه
ساعات الوم نفسي لما الاقي اسماء عندي في الريدر معرفش عنهم هل هم احياء والا اموات مع اني كنت بحب التواصل معاهم جدا

يارب لما اموت الناس تفتكرني لو شوية نونو كل كام شهر ويدعوا لي دعوة


بالمناسبة انا بتشرف اني اعرفك ومش انت اللي سعيد بمعرفة اهل المدونات
لأ انا اللي سعيدة جدا بمعرفتك

تدوينة سكر وجميلة وبها رومانسية
ازاي بها رومانسية
معرفش
بس ده احساسي

مواطن مصري يقول...

بوست رائع يا بدراوي تعرف ان فية ناس من المدونات لما بلاقيهم بيطولو بين البوست و البوست بقلق عليهم و بقول يا ترى جرالهم اية و ادعيلهم ب السلامة

الانسان فعلا بصمات فية الي يترك علامة جيدة الناس تتذكرة بالخير على طول و فية انسان تاني مهما يكون عامل فيها متدين او غير متدين ممكن يكون لسانة زفر

و بصماتة سيئة و الناس هتتذكر ب السوء على طول



قال رسول الله صلى الله عليه وسلم: مثل الجليس الصالح والجليس السوء كحامل المسك ونافخ الكير، فحامل المسك إما أن يحذيك، وإما أن تبتاع منه، وإما أن تجد منه رائحة طيبة، ونافخ الكير إما أن يحرق ثيابك، وإما أن تجد منه رائحة خبيثة

amr imam يقول...

اولا انا مش من محبى التكونولوجية بشكل عام وتقدر تقول بكرها ومليش دعوة بيها اما عن انشائى مدونة فدة عشان عندى حاجة عاوز الناس تعرفها بس

فى جملة عندى اعتراض عليها بخصوص ان الدنيا مفهاش حاجة تتحب انا هقولك حاجة مهما عملت الدنيا فيك وسوت فانا الدنيا داست علية بكل قوة
وكان قعدت تتنطط عارف عملت اية
بردة عافرت معاها وقمت ووقعتنى وقمت ووقعتنى وفى الاخر وقفت وانا مبسوط وحاسس انى اقوى منها وانى ارادتى وعازمتى حديد
عارف الحلو فى الدنيا اية انك تعرف تتحداها تستمتع بالعب معاها مش قصدى اللعب بمعنى اللعب طبعا
هى حالوتها فى تحديتها

وان شاة الله لو شاءت الاقدار هحكيلك عحكايتى بالظبط او ممكن تعرفها من المدونة بس هى مش قايها مباشرة
مع فائق احترامى

رحلتنا في الحياة يقول...

للاسف الموضوع ده بقى عاملى رعب غريب انى ممكن فى يوم فعلا افقد الناس اللى عرفتها وحبتها فى عالم التدوين وبقيت بحاول لو غابوا شوية اعرف هم راحوا فين فى ناس بقدر اوصلهم وناس طبعا مشاغل الحياة مش بعرف اوصلهم والموضوع علمنى حاجة انى ساعات كنت ببعد واقفل موبايلى وكل حاجة عن اصحابى ومجربتش موضوع القلق اللى بعمله ليهم الا لما بيبعدوا هما كمان وبيخلونى مشغولة
وساعات كتير بقفل المدونة بسبب فكرة انى ممكن اموت واسيب المدونة تعذب الناس من بعدى وتعذب اهلى فى البيت كل ما يشوفوها
ربنا يرحم الجميع اللهم امين يارب العالمين ويربنا يطمنا على الناس اللى غابت ومنعرفش اخبارهم ايه بالظبط
على فكرة هقولك بوستاتك بيقيت قوية جدا يمكن علشان بقيت بتكتب باحساسك من غير خوف

حفيدة عرابى يقول...

اجمل بوست عندك
انا متابعة مدونتك وتعليقاتك من فترة
وخصوصا النقاش اللى دار عند نوارة نجم
واتكلمت فيه عن انك مش اجتماعى
انا بامانة شايفة انك انسان حساس بزيادة
فكرة التدوينة دى رائعة
وافكارك عدت علينا كلنا
بس محدش كتبها وعبر عنها بالجمال ده
ربنا يكرمنا عند موتنا بحد يفتكرنا
ويدعى لنا
انا مرة فكرت فى حديث الرسول عليه الصلاة والسلام الخاص باذا مات ابن ادم انقطع عمله الا من ثلاث

حسيت ان الحاجة الوحيدة اللى بجد هنملكها بعد وفاتنا هى اعمالنا بأذن الله
ياريت نفكر بعض دايما
ان مدوناتنا هتكون موجودة واحنا مش موجودين
وهتكون سبب فى زيادة حسناتنا او العكس
وحتى لو اللى يعرفونا نسيونا
زى مااحنا بننسى
نتعود ندعى للمسلمين كلهم
علشان بعد كده هنحتاج الدعوات دى بشدة

تحياتى لك

غير معرف يقول...

انت وجعت قلبي بكلامك ده 0000 اصل اصعب شيء الفراق 000 وفعلا اللي بيصعبه ان يظل شيء يفكرك باللي رحلوا

غير معرف يقول...

الابن الغالى احمد
وجعتنى اه وجعتنى ونزلت دموعى اه نزلت
عارف ليه اتوجعت يااحمد
وليه نزلت دموعى اننا فعلا اتعلقنا ببعض وبقى ربطنا حاجة جامدة
مش حاقول الموت والفراق بس
ده انت لو علقت عند حد وزعل بقيت بتزعل لزعلهوتحاول بكل جهدك تشرح له وجهة نظرك
وفيه ناس بنتابعهم فى صمت ولو غابو نسال بينا وبين انفسنا عليهم
عارف انا دايما فى بالى صاحب مدونة
كنت بقرأ تعليقاته عند ستيتة بس
ومكنتش لسة عملت المدونة اسمه
محمود ومدونته اسمها امبارح كان عمرى
عشرين دايما فى بالى ودايما بفكر فيه
وهو اختفى ليه ويمكن يكون حصل له زى مانت بتقول والناس بتدخل تكتب له
وتسال عنه
الموت علينا حق وانا نايمة قايمة افكر فى
الموضوع ده مش موضوع الموت بس موضوع انى
لورحلت عن الدنيا هل فعلا حتفضلوا فكرنى وممكن تدعولى
ربنا يعلم حبى ليكم كلكم وتعلقوا بيكم كلكم فيارب لو انتهى الاجل
تتذكروا حبى ده وتدعولى
على فكرة تعليق عادلبرضه اثر فيا
ربنا يبارك فى اعماركم جميعا
تحياتى يااحمد على هذا البوست

mohamed ghalia يقول...

بدراوى
بجد انت فوقتنا يمكن ناس كتير فعلا بدأت تنسى تدعلهم
ربنا يجازيك خير ودعوة رائعة منك بجد

دودو يقول...

انا متفقه مع مايكل تماما
البوست مش نكدى لا دخ واقعى
الموت هو الحقيقه الوحيده
مش باقول كده تشاؤما ولاكرها فى الحياه

بس فعلا هو الشىء الحقيقى الوحيد
وياريت كلنا دايما نفتكره
ساعتها حاجات كتير هتتغير

-_- يقول...

بوست معبر عن الحقيقة

مهندس مصري بيحب مصر يقول...

بالعكس التدوينة دي واقعية
و دي مشاعر كتير مننا

د. ياسر عمر عبد الفتاح يقول...

تدوينة جميلة ,, وفيها وفاء
تعيش وتفتكر يا بدراوي
ربنا يغفر ليهم
ويرحمنا إذا ما صرنا إلي ما صاروا إليه

وحي القلم يقول...

السلام عليكم
شكرا اخي على هذا البوست
اللهم ارحم كل المدونين
المدون الوحيد الذي امتلك مدونة بعد موته هو ابي رحمه الله ؟!!
نسألكم الدعاء

تامر علي يقول...

ده مش نكد ولا حاجه ده شيء حقيقي ولازم نعمل حسابه كلنا لكن الغلط انه يتقلب لمرض أو هاجس ويعوقنا عن تحقيق أهدافنا في الحياة .... بداية الحياة ربنا وصفها انها متاع يعني شيء مالهوش أي لازمة :)) لكنها في نفس الوقت متوقف عليها مصيرك الأبدي فلازم تستغلعا استغلال أمثل وإلا تخسر كل شيء.. التوازن مطلوب ....

احساسك عالي جداً ..تحياتي :)