السبت، سبتمبر 05، 2009

ليلة القدر

البوست ده تفاعلى يعنى التعليقات فيه اهم من البوست
نفسه ،

هى فكرة و قولت اجربها

كل الحكاية ان ليلة القدر او العشر الأواخر قربوا
و كل واحد اعتقد مجهز دعوات و امنيات معينة
حيطلبها من ربنا فى الليلة ديه

فإيه المانع لو كل واحد يدعى للثانى انه ربنا يحققله امنياته
ازاى ؟!

يعنى يخش فلان يعلق و يقول انا ادعو بربنا بكذا و كذا و كذا و كذا
قوم انا او فلان او علان و هو بيدعى يدعى لنفسه بأمنياته و امنيات الأخرين
حد فاهم حاجة ؟
!!!!

و طبعاً اللى حيلاقى حرج انه يقول اسمه فى التعليق
ممكن يخش بغير معرف

لو الفكرة لاقت قبول ياريت كل واحد يكتب عنها فى مدونته
على اساس ان فيه مدونات ما شاء الله معروفة عن مدونتى

طبعاً انا حقول الامنيات و الدعوات اللى بتمناها و كل واحد يشيلها تحت باطه
اوام و يدعيلى بيها و هو بيصلى ها و الا !!!

ادعى ربنا انه يرضى عنى
يوفقنى فى محاولاتى للسعى فى الحياة
يحبب فيا خلقه
يكرمنى بالهدوء و الراحة النفسية
يمن عليا بالصحة و العافية و الستر
الاقى شغل يناسبنى


طبعاً سامع حد بيقول منفسكش فى عروسة
لا يا عم الامور منك ليها
ههههههههههههههههه

هناك 19 تعليقًا:

adel يقول...

هو ينفع انا ادعي كمان :):)

انا هاكتب و السلام و اللي يفتكرني يبقي تمام قوي

نفسي يارب في .... و كمان .....
و ياسلام لو ..... يبقي كده تمام قوي :)

اصلها طلبات سرية :)

لا بجد
نفسي مصر تبقي كويسة
ونفسي اتخرج بقي
ونفسي اشتغل في السيما
واول دعوة بس تكتبي الاخر عشان تاخد اكتر دعاء

يارب يوسف يرجع لماما فاتيما (ماماتي برضه)

اما دعوات الصحة و الزواج فهي من عند ربنا و انا راضي باي شئ :)

ادعوا ياجماعة يلا

يا بدراوي ياولادي ... انت مصر كلها بتدعيلك ياعم :)

مسدس صغير يقول...

اللهم بلغنا ليلة القدر
ربنا يحقق لك ما تتمناه واكثر
وايانا
احييك على الفكرة
جزاكم الله خيرا

ستيتة يقول...

ربنا يكرمك يا بدراوي بكل اللي دعيته ويتقبل منك
والفكرة حلوة قوي قوي
انا طماعة
عاوزة سعادة الدارين الدنيا والآخرة
ربنا آتنا في الدنيا حسنة وفي الآخرة حسنة وقنا عذاب النار
كل عام وانت وجميع اللي علقوا بخير
ملحوسة: وحياة طنط ظاظا لأدعي عليك انت وعادل بعرايس
آه "لازم تيشيرب" انت وهو
بالذوق بالعافية لازم تلحقوا بسنن الأولين
امال تفضلوا كده مرتاحين

*البت المشمشية *حلوة بس شقية * يقول...

حلوة الفكرة
جدا
اولا
ربنا يحقق لعادل كل حاجة حلوة فى الدنيا عشان بنى ادم طيب اوى
وربنا يحققلك كل اللى نفسك فيه وصلاح كمان وستسته
وربنا يرزقنى الزوج الصالح
ويهدى اهلى
ويهينى
ويارب انجح فى حياتى

*البت المشمشية *حلوة بس شقية * يقول...

ويارب يوسف يرجع لفاتيما وزينة لكريم

غير معرف يقول...

الفكرة جميلة وهايلة
وغير الدعاء لانفسنا فالدعاء بظهر
الغيب من الدعوات المستجابة
ربنا يتقبل كل دعواتك ويحقق كل امنياتك يااحمد
وادعو الله ان يتم عليا الصحة والعافية
وان لايحوجنى الله لاحد
وان يبارك لى فى عمر زوجى وينعم بالسعادة عليه وعلى اولادى
وان يجمعنى ان وجميع المدونين
اللى جمعنا الحب فى الله فى ظله يوم القيامة
ومعلش يابداروى من عندك اسمح لى
اقول لستيتة
عارفة والله ياستيتة انا كنت قاعدة
قبل الفجر وبستغفر وبدعى وكنت لسة
بدعى لك ان يبارك لكى فى زوجك واولادك
ويشفى والدتك
وقمت بعدها وجدت هذا البوست
وربنا يبارك لك ياعادل وتخلص دراستك علىخير ويكتب لك الخير فى حياتك
واضم صوتى لصوتك برجوع يوسف لحضن امه
ويكتب لك الخير ياصلاح ويحقق امانيك
ويرزقك الزوج الصالح يامشمية
ويحقق امانى كل اللى حيعلق بعد كده
ويجمعنا دايما فى الخير
وصحيح دكتور ياسر هو مش معلق لسة
لكن لسة داعية لك ياياسر مع الدكتورة
بالخير كله
ربنا يكرمك يااحمد
تحياتى

الفراغ يقول...

عجبتنى الفكره قوى
وان شاء الله هادعوا بها فى مدونتى
جزاك الله كل الخير وجعله فى ميزان حسناتك
وبلغك ليلة القدر ووفق الى العتق من النار انت وجميع القارئين
ورمضان كريم

الشعب لابد له من حكومه تشكمه يقول...

اولا عاوزه اعلق على البوست اللى فات مع انى كنت من اوائل الناس اللى شافوه بس وقتها حسيت انى كتبت كومنت كئيب لابعد الحدود فمسحته ومشيت بس انا عاوزه اقولك انى بعمل كده علطول بدخل عند شيماء شيكو والفارس الملثم وقعد اقرا الكلام واقول دا كلام ناس مش بينا دلوقتى وممكن اكون انا اللى بكره كده..البوست للى فات عجبنى جدااااا واحييك عليه..

البوست ده ربنا يتقبل يارب ويحقق لكل واحد احلامه وامنياته يارب..

شوكولاتة يقول...

فكرة حلوة يابدراوي وربنا يتقبل منا جميعا دعانا
أنا بقى نفسي ... خليك معايا كده
أولا ربنا يعتقني من النار
ثانيا ربنا يحبب فيا خلقه
ثالثا ربنايباركلي في أهلي وكل الناس اللي بحبهم ويحبوني
رابعا نفسي ماأشوفش ولا واحد مريض في الدنيا كلها ويرجع يوسف لمامته
خامسا نفسي ربنا يهديني ويرضيني بقضاءه
سادسا نفسي ربنا يرزقني الزوج الصالح والذرية الصالحة ويجعلني من الصابرين

كفايه كده بقى علشان الناس تقدر تحفظ

جزاك الله كل خير

غير معرف يقول...

بجد فكرتك جميلة جدا وعلى فكرة انا باعملها كل يوم قبل الفطار بافضل ادعى لكل اخواتى المدونين بالاسم واقول يارب بكل اللى نفسى يتحقق لهم مش هاضحك عليك ممكن انسا حد وده لانى بشر بس بردة النسيان له حل عندى اخر ما باتعب باقوم مجمع كله واقول دعوة لكل المدونين مرة واحدة بس ربنا يتقبلها منى يارب وعلى فكرة انا بادعيلك انت كمان وبالاسم كمان لانى قريب منك او انت قريب منى ما هو انا الراجل اللى مش بيحب ؟؟؟!!!! خليها فى سرك بقى

كل سنة وانت طيب يا احمد
ورمضان او اللى باقى منه كريم

Kalimalhus يقول...

طبعا الناس الطيبة اللى دخلت كلهم وقعوا فى الخدعة اللى إنت عاملها لأن غالبا حضرتك عامل حسابك إن فيه ناس ربنا راضى عنها و دعاها مستجاب فقوم لما يدعولك يبقى هتنول المراد .. و طبعا أن هأستغل الفرصة عشان أطلعلى بدعوتين ينفعونا..

أنا مش هاقول بالتحديد لأن ربنا أعلم باللى فى نفسى و دعوتى أن يستجيب الله لما فى نفسى إن كان فيه خيرى و خير الناس فإن لم يكن كذلك فأدعوا الله أن يصرف عنه نفسى فلا أتعلق به و أرجوه..

و إطمئن إنى ها أدعيلك بكل اللى طلبته بس برضه ها أزود عليه إن ربنا يرزقك الزوجة الصالحة و البنون اللى يكفروا سيئاتك .. مفيش يابنى أحسن من إن حد يعذبك و يبقى على قلبك زى العسل و مع ذلك برضه تاخد بيها حسنات .. أمال إنت فاكر الجواز نص الدين ليه؟؟

"أحلام حقيقية" يقول...

فكرة جميلة بجد وربنا يحققلك كل اللى نفسك فيه يارب اللهم امين يارب العالمين اما دعوتى اللى ان شاء الله هدعى ربنا ان الخير والعدل يسودوا فى الدنيا من تانى هدعى بالعزة للمسلمين والعرب من تانى هدعى بالهداية لكل ظالم وكل عاصى وهدعى بالصلاح لكل شباب مصر وبناتها وحاجات كتير ومش هدعى لنفسى غير بالهداية مع ان جوايا احلام وحاجات كتير عايزاها من ربنا بس يمكن تقصيرى معاه هيخلنى اخجل ادعى لنفسى بحاجة غير الهداية

"أحلام حقيقية" يقول...

ونسيت وان شاء الله هدعى ان يوسف يرجع لمامته علشان بجد نفسى فاتيما تفرح شوية بقى

"أحلام حقيقية" يقول...

ومش حد ينسى يدعى بالرحمة للمدونين الى ربنا توفاهم وبالجنة اللهم امين يارب العالمين

غير معرف يقول...

انا دايما بدعي بدعاء اللهم اغنني بحلالك عن حرامك 000 واغنني بفضلك عمن سواك

ده دعائي المحبب في اي وقت

حلو موضوع البوست 000 وهدعيلك ربنا يتقبل منا ومنك

حروف يقول...

يارب اهديني الي ماتحبة وترضاة
وتعيني علي حمدك وطاعتك وحسن عبادتك
ويزقني زوج من نفسي
وتجعلني من اهل الجنة
يارب ابعد عني كل شر وفرح قلبي واجعلي سبب لفرحة اهلي وينجحني
يارب فرح وادخل الفرحة فقلب كل واحد محتاج انة يفرح
ويكرمك يابدرواي ويوفقك عشان الفكرة دية
دمت بالف خير

mimi يقول...

أنا هدعي وقولوا أمين:
======================
اللهم دم عليّ نعمك الكثيرة
اللهم استرني فوق الأرض وتحت الأرض ويوم العرض عليك
اللهم توفني وأنت راض عني

اللهم أسألك الجنة ونعيمها

اللهم ارزقني رزقا وفيرا ووفقني لما تحبه وترضاه

أسألك اللهم العفو والرحمة

اللهم ثبت قلبي علي إيمانك

اللهم تقبل مني سائر الدعاء

اللهم تقبل دعاءنا جميعا
وأجعلني مقبولة الدعاء

أامين يارب العالمين

mimi يقول...

اللهم انك عفو كريم تحب العفو ... فاعفوا عنا واغفر لنا وارحمنا ... أنت مولانا فانصرنا علي القوم الكافرين



اللهم ارحم موتانا

واشفي مرضانا

واهدنا



ياااااااااااااارب العالمين

دودو يقول...

يارب حقق لنا كلنا كل ما نتمناه
واعنا على طاعتك

وارفع عنا الظلم
ولاتحكم فينا ظالم
واعفو عنا واغفر لنا