الثلاثاء، ديسمبر 22، 2009

جزماتيزم

البوست ده كتبته منذ عام ايام ضرب بوش بالحذاء
و لم أنشره فى اى مكان و قولت انشره هنا بمناسبة مرور عام على الموضوع
و اههه اعتبروه بوست ساخر كمشاركة فى حملة إبتسم للحياة
----------------
1

ذهبت أمس لتلميع حذائى ، فى المحل الموجود بالقرب من منزلى
إنتظرت دورى حتى أتى ،
ثم جلست استعداداً للتلميع
الشاب الذى يلمع الحذاء
: المعهالك وش و لا وشين ؟

سمعتها : بوش و لا بوشين
الشاب : يا استاذ خلصنى ، لسة فيه غيرك واقفين
أنا : ايوا معلش مسمعتكش
الشاب : المعلك الجزمة وش و لا وشين ؟
أنا : بكلم نفسى ، تانى بوش و لا بوشين
صرخت فى الشاب ، لا لا انا مش حلمع خالص انهارده


2

ذهبت مشياً باحثاً عن أحد الذين يسيرون فى الشوارع لتلميع الجزم
فوجدت أحدهم
بدأت فى تلميع الحذاء
فأخرجت من جيبى بعض الفكة كى أتأكد اننى لم أنساها فى المنزل
نظر لى الرجل و قال : أنا بقبض بالدولار
قلتله : ليه بقى ان شاء الله !؟
الرجل : ايه يا أستاذ مشفتش بوش و هو بيضرب بالصرمة ، موسم بقى و ادينى بقلب عيشى .
قلتله : د ه انت اللى عايز تنضرب بالصرمة

الرجل : بتقول حاجة يا استاذ ؟
أنا : لا بقول فعلاً يستاهل
و مشيت .
فقالى : انت حر كنت حلمعلك الجزمة و أخليها أنظف من العلم الأمريكى بعد غسيله

3
ذهبت بعدها حتى وجدت مكان أخر لتلميع الجزم
قبل ان ينطق الشاب و يقول وش واحد و لا وشين
عاجلته سريعاً و قلت : عايزك تدهنلى الجزمة ديه كويس بس وش واحد ، سامع وش واحد .
اثناء التلميع ، كان صاحب المحل يشاهد قناة الجزيرة و هى تعيد مشهد قذف بوش بالحذاء ،
و ما ان جاء المشهد ، حتى هممت و قذفت بحذائى صوب شاشة التليفزيون
و الحمد لله ، الجزمة سليمة ، و لكن شاشة التليفزيون ادشدشت !!
حينها امسك بى صاحب المحل و الشباب و كل اللى فى الشارع ، و هاتك يا ضرب
خدت علقة مخدهاش بوش فى مؤتمر .
بس الحمد لله روحت البيت مدغدغ ، بس منتشى و فخور اووى بنفسى ، انى حصلت على علقة معتبرة زى منتظر الزيدى ، فقد كنت فى حالة جعلتنى اتصور ان من يضربوننى يقومون بذلك لقذفى بوش بالحذاء و ليس لقذف شاشة التليفزيون التى ظهر فيها بوش !

4
رجعت حكيت لأمى ، مسكت جبهتى ، انت سخن خالص ، طب خذلك كيتوفانه و نام و الصباح رباح .
صحيت الصبح بدرى لمشوار مهم ذاهب اليه ، ارتديت ملابسى
ثم أخذت ابحث عن الحذاء كى ارتديه ، فين فين ، مفيش جزمة ،

يا ماما ، فين الجزمة يا ماما !؟
ماما : لا ما انا حطيتهم فى الدولاب و قفلت عليهم بالمفتاح
أنا : ليه بقى ؟
ماما : انا مستغنية عنك ، امبارح جايلى سخن و مدغدغ ، يا عالم بكره ، تجيلى عينك طايرة ، و تجيلى متعور و لا حاجة ، معلش فترة و تعدى ، ابقى روح مشوارك بالشبشب

5
لبست الشبشب و نازل ، لقيت فى وشى جارى العزيز أسامة ، ركبنا الأسانسير سوا و احنا نازلين .
أنا : صباح الخير يا أسامة
أسامة : صباح النور
أنا و بنظرة لقدميه فوجدته يرتدى شبشب ،
ايه يا عم اسامة انت راخر نازل الشغل بالشبشب و لا ايه ، و ايه الكيس اللى فى ايدك ده ، تكونش خايف الأمم المتحدة تجى تفتش عندنا .
أسامة : و بأوطى صوت ليه ، هس هس ، وطى صوتك ،
أنا : هاضر وطيت صوتى اههه ، فيييه ايييييييييه بقى !
أسامة : أنا فى الأمم المتحدة مراتى اللى عندى فى البيت ديه ، كل يوم تصبحنى بعلقة و تمسينى بعلقة ، ما صدقت حركة الجزمة ديه ، خلتنى اعرف اقنعها ، نرمى الجزم لا البرادعى يجى يفتش .
أنا : و الكياس ديه بقى فيها الجزم ، عشان تخلص منها .
أسامة : أيوا كل الجزم .
أنا : و راح فين أبو وردة ، هو فيه زيه !

تمت

هناك 13 تعليقًا:

R-H-S يقول...

انا سمعت ان منتظر الزايدي واحد حدفه بالجزمه هو كمان يظهر بوش اجر واحد علشان يرد علي منتظر وميسبش حقه

قلم رصاص يقول...

هههههههههههههه

بوست جميل

منتظرين جديدك

ملحوظة:

منتظرين ..جمع منتظر

^_^

ستيتة يقول...

انا اكدب عليك يعني؟
مش قادرة اقرأ بوست طويل لأني مهيسة
عقبال أملتك كنت في اجتماع من اهم اجتماعات الهنود الحمر تحت اسم مؤتمر علمي

عارف خلاصة المؤتمر اللي كنت فيه ايه؟
خلاصته سوء تنظيم وفضيحة امام الأجانب ومرسي فعلا عاوز كرسي بس في نفوخه

الهنود الحمر وكسات لا تنتهي
مفيش فايدة يا بدرا

تحياتي

dr.lecter يقول...

والله كان نفشي ان الجزمه تترمي علي اللي بالي بالك هو والحاشيه بتاعتهم مش عمك بوش الغلبان

انا مره فعلا رميت الكوتشي علي التي في لما اخينا المبارك طلع في مؤتمر الحزب من عامين

كلمات من نور يقول...

ولا يكون عندك فكرة عندي ليك مقال خاص بمسابقة حدف الشباشب
زورني في مدونة لحظة نور واحترس وانت داخل علشان داه عن الشباشب الطائرة

http://la7zetnour.blogspot.com/2009/12/blog-post.html

تحياتي

غير معرف يقول...

هههههههههههه

انت كتبته ازاي ده

بوست حلو اوي

تحياتي

اقصوصه يقول...

looooooooool

حلو وايد :)

يــوم جــديد يقول...

:)
ربنا يبعد عننا أبو وردة وأم رباط

well يقول...

مشهد الجزمة عندما نتذكره ...بنرفع من روحنا المعنوية .
بالمناسبة فى اجتماعات الحكومة الجاية..هيدخل الصحفيين من غير جزم ....واللى هيكون لابس جزمة اعرف انه مباحث

تحياتى

Unknown يقول...

عمل جيد

MaNoOoSh يقول...

ازيك يا بدراوي
البوست دمة خفيف جدااااااا
في وسط روح الاكتئاب اللى منتشرة ولا انفلونزا الخنازير دي

sal يقول...

اعجبتنى فكرة الكتابة بعد مرور الذكرى السنوية !!!!؟
مفيش حاجة بتتغير دا لو سيادتك قريت كتاب طبائع الاستبداد اللى كتبه الكواكبى منذ اكثر من قرن حتحس كأنه بيتكلم عن واقعنا اليوم ....
اتمنى لمدونتك النجاح الدائم

Unknown يقول...

التدوينة السوداء
ادعوا كل المدونين الشرفاء الى عمل تدوينة سوداء يوم 15/1 اعتراض على الجدار الفولاذى جدار العار والخزى

نهر الحب