السبت، يوليو 04، 2009

حق الرد

عاتبتنى الأخت شيما صاحبة مدونة الشعب لابد له من حكومه تشكمه
فى تعليق على البوست السابق على عدم ردى على التعليقات

كما يقوم بعض المدونين بالرد على كل تعليق .

و قالت :
فى حاجه عاوزه اقولك عليها بس طبعا دى حريه شخصيه بس تعتبرها مناقشه انت ليه مش بترد على كومنتات الناس؟؟اولا بتحس ان فى تفاعل بينك وبينهم وفى اوقات بتكون مناقشه او عاوز توضح حاجه.او ياسيدى تغير المود وتضحك معاهم مش عيب:)

انت مثلا من الناس اللى لما بتسيب كومنتات عندى بتهتم انك تيجى تشوف انا هقول ايه على ردك صح؟؟؟؟؟

طب ليه متقولش ان فى ناس بتباه مستنيه تشوف ردك على ردهم؟؟؟؟
عموما زى مقولتلك دى حريه شخصيه بس كنت هموت واقولك الكلمتين دول وبعدين فى واحد يدخل يزورك تقوم متردش عليه؟؟؟؟؟؟؟؟ (بهز رأسى اسفا)اوعى تنفعل انا بقولك اهو انا مجرباك اعصابك على طراطيف مناخيرك:)))

و امام هذا العتاب الذى امتد لمدونتها حيث ابدت استياءها الشديد
و فهمت انها كمن تقول
كيف لك ان تترك المدونين يصرخون فى البرية هكذا و لا ترد عليهم
كيف تترك لا يسمعون سوى صدى اصواتهم و اصواتهن !؟

فإننى مضطر اسفاً ان اقوم بالرد على بعض التعليقات ، فقط تلك التى تحتاج لتوضيح شىء ما

تعليق Soul.o0o.Whisper

بس فى حاجة عاوزة أقولهالك انت قلت ان انت اللى حساس اوووى و مدام انت عارف كدا حاول انت تتغلب او حتى تتأقلم على كدا بس السكاكين مهما كانت علمتنى ان مانجرحش بيها مرتين يعنى شوف ليه الموقف دا زعلك و شوف الغلط منين و حاول صلحه و مدام شخص انت بتعزه يبئا اكيد ماكنش قصده

دمت بود

الحقيقة يا دكتورة الموضوع كله انتهى خلاص و مفيش مشكلة خالص

و انا الموضوع مجرد صفحة و اتقفلت و مش عايز اكتب تانى فى الموضوع ده

عشان معدش له لازمة

تعليق مهندس حر

شوف لما الموضوع بحس إنه خاص بصاحبه ببقى مش عايز أعلق لأن فى الحالات دى الواحد يا هيلبخ يا هايلبخ..

بس إنت بقالك مدة مش عاجبنى .. انا مش قلقان لأن الدنيا علمتنى إن كله بيعدى .. بيعلم علم و علامة بس برضه بيعدى .. المهم ماتضيعش وقت طويل و السكينة سرقاك .. السكاكين جاية كتير و منها اللى هاتكون حاطه بنفسك فى إيد اللى هيطعنك بيه و منها هتبقى شايف و عارف إنه من نصيبك فى يوم و هاتجز على شفايفك و تاخد الطعنة و تبتسم و تشكر كمان..


عايزك تتوجه بالشكر لمن طعنك و تفيه حقه من التبجيل لأن كل من يطعنك يعلمك درس من دروس الحياة يعنى يبقى أحد معلميك اللى علموك و علموا عليك و إنت عارف عمنا شوقى قال إيه فى حق المعلم عليك.. :)

باشمهنس
انا خبرتى فى المجتمع و بين الناس قليلة يمكن عشان كدة حبيت اوضح انها طعنة افتراضية على مجتمع النت
لأن يمكن انا اصدقائى فى الواقع مش كثيير ، عشان كدة الطعنة ديه كتبت عنها بسخرية و بخفة دم
و مفرقتش معايا

اه و الموضوع ده علمنى بجد انى بعاملش حد بعشم زيادة عشان لو ضايقنى بزعلش اوووى
الطعنات الإفتراضية بتعدى
لكن الطعنات الحقيقية لسة مجربتهاش ، ربنا يستر بقى ساعتها ، بس حياتى تتنظم اكثر من كدة
و ساعتها كل الطعنات اللى حتجيلى مش حتفرق معايا
عشان حكون حاطط ايدى على اول الطريق و مفيش وقت بقى انى اركز فى الطعنات جاية منين

مش عارف وصلت ليك وجهة نظرى صح و لا ايه بالضبط ؟!
-----
ديه يمكن اهم تعليقات لقيت مجال للرد عليها
اما بقى التعليقات احب اشكر اصحابها كلهم
و احب اشكر كل من
الأخت
promise is promise
اللى لسة مزورتش مدونتها ، بس ان شاء الله حزورها
ده وعد منى
و الأخ THE illusionist
بس ياريت يقوللى اى مدونة هى الرئيسية ليه
؟!

هناك 8 تعليقات:

ديالا يقول...

بدراوي

طب مااهوانا زيك بالظبط مبردش علي تعليقات

مش معني كده ابدا اني مش مهتمه بتبقي ظروف

عادي اهم حاجه انا احنا نتواصل مع بعض ونعلق علي بوستات بعض

الشعب لابد له من حكومه تشكمه يقول...

مش بقولك لما تحب ترد على حد هتعمله بوست مخصوص:))

The illusionist يقول...

ههههههههههههههههههههههههههه
يا نهار ملون
بوست مخصوص عشان الردود
جديده والله
هههههههه
انا الاساسى الروقان مع الشاى
بس مكنش محتاج بوست عشان ترد
كفايه طعنه فى مدونه اللى رد عليك وكفايه

فاروق عادل يقول...

عادى كل واحد على حسب طبيعتة فى ناس بتحب ترد وناس بتكسل ترد زيى كدة عادى

غير معرف يقول...

بص يا احمد ممكن ترد ا لا ترد ..... وده حسب ما عودت اللي عندك

Kalimalhus يقول...

حكاية الرد على التعليقات شاغلانى اليومين دول .. أنا ما بقاليش كتير بدون و فى البداية كنت حريص جدا أرد على كل واحد يعلق و مازلت شايف إن ده أمر مطلوب من باب الذوق على الأقل .. لكن الحقيقة إن كل واحد مننا ممكن يعدى عليه أوقات ما يكونش قادر لأى سبب من الأسباب يرد على كل التعليقات.. ممكن ضيق وقت ممكن لأن التعليقات لا تستدعى رد يعنى الرد الوحيد عليها من نوع .. صح و نعم و معاك حق و أكيد يعنى ردك هيكون تحصيل حاصل..

فيه أحوال طبعا التعليقات ممكن تفتح حوار لكن حتى فى الحالة دى مش بأحس إن المكان مناسب .. يمكن لو كل مدونة بقى ملحق بيها منتدى يكون الشكل مناسب أكتر لفكرة الحوار و ده يبقى شيئ لطيف مع أنه هيبقى مبالغ فيه حبتين و مناقض لفكرة التدوين ..

أنا طولت فى الحكاية دى لأنها زى ماقلت شاغلانى .. المهم أنا شاكر ليك إهتمامك و فهمت ردك و أتمنالك حياة تخلو من الطعنات المؤلمة و لو شاطر إتعلم من الطعنات التى ينالها غيرك لتتجنب مايشبهها..

شريكة في المطعم يقول...

انا كنت كده برده...مش برد عالتعليقات
لاني كتبت كل الي عندي في البوست
اما لو في تعليق محتاج رد او توضيح
بس هو الي بعلق عليه
بعد كده لقيت معظم المدونين بيردوا
على التعليقات..فبقيت ارد انا كمان
عشان محدش يزعل ويفتكرها عدم اهتمام

كلمات من نور يقول...

المشكلة اني بقيت باتوه

يعني ما شاء الله بحب أدخل عند مدونيين ومدونات كتير

ومن كترهم بقيت مش عارفه أرد والا اقرا ردهم على ردي والا ارد على ردودهم عندي

ايه الرد والردود والمردود اللي انا باحكي عنه داه

بس الواحد بيحس بالسعاده لما تتجاوب مع الغير بس بالحق مش نظام جبر خواطر وزارني فلازم أزوره