السبت، أغسطس 01، 2009

ياريت كل الناس زيك
















أنا شخص حساس جداً كما قال فتاة من الصعيد فى تعليق على البوست السابق
لذلك كلمة قد ترفعنى للسماء من الفرحة ، و كلمة أخرى احتمال تجيبنى الأرض من الحزن او الضيق ، او تجيبنى الأرض من الضحك المتواصل
هذا ما حدث بعد قرائتى لتعليق ديالا على البوست السابق
قالت :
ديالا تقول...
انت استحاله تكون مصدر ازعاج لاي حد ياابني ياريت كل الناس زيك ربنا يبارك فيك

ظل كلمة ياريت كل الناس زيك تتردد فى اذنى مع صدى صوت متكرر لها طيلة الأيام الماضية
ياريت كل الناااااس نااااس زيك زيك زيك و هكذا ............
و انا متفهم تعليقها


استحالة اكون مصدر ازعاج لاى حد ، ماشى فهمنا ، ربنا يبارك فيك أمين يارب ، انما ياريت كل الناس زيك
ديه كلمة على قدر ما اسعدتنى و جابتنى السماء على قدر ما جبتنى الأرض ضحكاً

أرجوك تخيل معى لو تم عمل نسخ مكررة من العبد لله - بدراوى :

- نصف بنات مصر لن يتزوجن ، حيث ان بدراوى ضد الزواج ، و بالضرورة الحب ،لأن الحب يفضى الى الزواج
و سوف ينتعش سوق الأطباء النفسيين لعلاج النساء من امراض العنوسة .

- سوف يكون التفاعل بين الناس افتراضى فى الغالب ، اذن ان بدراوى علاقته بالمجتمع سطحية جداً (سوف اكتب عن هذا الموضوع البوست بعد القادم )

- سوف ترتفع نسبة البطالة بشده ، و ربما اذا وصلت العدوى البدراوية لأهل الحكم ستجد الرئيس يجلس على قهوة البورصة او التكعيبة بالقاهرة او قهوة التجارية بالإسكندرية و هو يتفحص باب وظائف خالية بالأهرام و ينتظر كل اثنين صحيفة الوسيط الإعلانية .

- سوف تنتهى الدنيا فى ظرف سنتين اتنين على الأكثر ، و ذلك لأن بدراوى سوف يقوم بقتل كل النسخ الموجوده منه و التى سوف تكون قد استعمرت الأرض كلها ، و قامت بقتل ثلاث ترباع سكان الأرض ، و يقوم بدراوى بقتل الربع المتبقى ، ثم يطلق رصاصة الرحمة على نفسه و ينتهى .

- سوف تتحول نصف اندية كرة القدم بمصر ان لم يكن كلها الى مزرعة مواشى ، اذن ان بدراوى يرى ان كرة القدم لا معنى لها فى وطن لا يفعل شيئاً ثم لعب الكرة و الفرحة الطاغية لدرجة العبط بها .

- ستفكك العلاقات الإجتماعية ، اذن ان بدراوى يحسن الظن بالناس و لكن لا يحسن الظن بنفسه مع الاسف الشديد
و هذا سوف يؤثر على علاقته بالأخرين ، و تخيل معى حين يتعامل بدراوى و لنسميه بدراوى 1 مع بدراوى 2
و يسىء كل منهما الظن بنفسه امام الأخر .

- من الإيجابيات سوف يحدث كساد فى سوق ادوية الأرق و القلق ، اذ ان بدراوى ما ان يضع رأسه على المرتبة فينام سريعاً - او هكذا كان و الأن هو ينام نوم متقطع .

- سوف يحدث ازدهار لصناعة ورق المناديل ، اذن ان بدراوى عنده جيوب انفية دوماً و يقوم بالعطس يومياً ما لا يقل عن 10 عطسات فى الدقيقة !!، كما انه كثير البكاء .


- سوف و سوف و سوف و سوف............
بقول كفاية كدة
و رجاء من اخت ديالا بلاش حكاية ياريت كل الناس زيك
-----
ملحوظة :
لما بكتب موضوع ساخر عن نفسى ، مش بيبقى سخرية للسخرية لكن بيبقى بجد مشكلة بعانى منها و بحاول اتغلب عليها بالضحك
يعنى ضحك كالبكا .

هناك 17 تعليقًا:

مواطن مصري يقول...

انت عامل زي على فكرة

ستيته حسب الله الحمش يقول...

في يوم ها يفك بدرا الإعتصام والإضراب عن الجواز وها تجيب رجله بنت ها نقعد نحييها في الجمعية سنة وها نعمل لها تخفيض اشتراك "يعني انت اعند من مين؟ هع"
وساعتها ها نستنسخ بدرا علشان نحل مشكلة الجواز المزمنة
وطبعا هي لما تيجي ها تكون قدم سعد عليك وها تشتغل
وبكده مصر ها تبني السد العالي تاني نظرا لتوفر العمالة البدراوية
واما عن مشكلة الجيوب الأنفيه فدي ها تكون مفيدة
لأن نص الشعب بدرا يبقى ها يعطس في نفس واحد يطلع صوته لحد اسرائيل يرعبها
هع
اديني حليتها لك
مبروك

فتاه من الصعيد يقول...

ههههههههههه
ليه ضد الجواز بس ...... العمليه موش ناقصه مضربين

أنت طلعت حساس زياده عن ما تخيلتك

ويا ريت نستنسخ منك كتييييير علشان انت عمله نادره ....... الطيبه ومراعاه مشاعر الاخرين شيء جميل

البطاله دي حال الشعب كله.....وان شاء الله تشتغل في حاجه بتحبها

يا ريت كل الناس تكون ...... زيك :)))

سبهللة يقول...

بكرة تقع يا جميل
ولازمن وحتما ولابد
تتشنكل فى واحدة تجيبك بالضرية القاضية
كلهم قالو كدة زيك
اخويا وزوجى كاناو من اكتر المعارضين للجواز
طبعا اخويا اتنيل وجاب ينت والتانى فى السكة
وجوزى.. زى ما هو واضح من لقبه ..اتجوزنى وربنا رزقنا باتنين وعقبال الباقى ان شاء
هههههههههههه
قال مضرب قال
هههههههههه
كان غيرك اشطر

مهندس مصري يقول...

ههههههههههههههههههه
كل ده كتبته من تعليق بسيط
يا دماغك يا جدع
:)

ديالا يقول...

اولا هقول كلمه بجد وبعدين ههزر

بجد هعيد الكلمه تاني وبدل المره مليون مره

ياريت كل الناس زيك يابدراوي

ياريت كل الناس في طيبتك

ياريت كل الناس في اخلاقك

ياريت كل الناس في عقلك

ياريت كل الناس اسلوبها زيك

ياريت وياريت بس المشكله ان الناس الصح مش بنعرفها في الواقع بنعرفها في النت

بس برضه سعيده اوي بمعرفه حد زيك




بس تعالي هنا هه قولي انا شكلي هرجع في كلامي لما حضرتك صح معارض للزواج وتبقي كل الناس زيك الي زي ان شاء الل يتجوز ازاي

لا والف لا لو انت هتسبب العنوسه في مصر ده احنا نعمل انقلاب ياابني


وفعلا مصيرك هتدخل القفص يعني هتدخله لا مفر منه ياابني

وكل مكتوب والمكتوب لابد يحصل وربنا بقي يعينك ونفرح فيك ياااااااااارب

ده احنا هنشمت فيك شماته

بجد بجد ربنا يكرمك ويسعدك في حياتك وياريت كل الناس زيك

Israa El-sakka يقول...

هههه
أنت معقد ولا إيه ؟؟ شكلك زي العبدة لله عندك كلكيعة من الزواج و كل ما قد يفضي إلى الزواج ههه بالنسبة لنومك المتقطع فده أعراض إكتئاب حادة لازم تروح لدكتور لنلاقي نشاط في سوق مضادات الإكتئاب و أدوية القلق بص أنا عن نفسي بحب الموضيع اللي بتعالج المشاكل بسخرية يعني بدل ما تصحك المشاكل علينا و تبهدلنا إحنا للي بنضحك عليها
فكرة حلوة ؟
صح
تحياتي و مستنية جديدك
و على فكرة التصميم الجديد للمدونة أحلى من القديم
تحياتي

mimi يقول...

أنا بجد مش عارفة أقوللك إيه؟

mimi يقول...

لو كل الناس زيك ... هلاقي كل الصور في التعليقات واحد بيبص من خرم في الجورنان


لو كل الناس زيك ... هضحك أوي من قلبي ساعات

وهزعل أوي من نفسي ساعات

لو كل الناس زيك ... زي طيبة قلبك .. مش هيبقي فيه عنوسة خالص

كل البنات هتصعب عليك ...

لو كل الناس زيك ... مفيش بطالة خالص عارف ليه ؟

كلهم هيشتغلوا في صناعة مناديل الورق وتوزيعها وتسويقها


وعلي رأي ديالا :
ياريت كل الناس زيك

.

mimi يقول...

لو فيه استنساخ أنا عاوزة منك نسخة ماليش دعوة

الحجز من دلوقتي ...

لذلك وجب التنويه

الشعب لابد له من حكومه تشكمه يقول...

احم احم طبعاااااااااا انا راى معروووف:)يجعلك ذخرا للوطن يا احمد:)
متقلقش هتيجى على بوزك هتيجى على بوزك بس اصبببررررررررررررر...
وبعدين انت نسيت حجات كتير جدااااا هاااااا اعد ولا بلاااااااااااش:)
فين مستر بدراوى المنفعل دائما لو لوحد قاله صباح الخير شوفت رشدى اباظه وهوبيقول لشاديه وكمان بتقولى صباح الخير طب دبببببببببببب:)
طبعا بهرج معاك..
على فكره انت قلبك ابيض ودلا كفايه وبعدين عامل بوست على تقعد تقول انا وانا وانا والناس تقولك لا انت حلو جميل طعم كميله والله:)) سوسه انت..
متشوفش نفسك كده:)

المعلم محمد صاحب المطعم - طعمية سخنة يقول...

ازيك يا بدراوي
لو كل الناس زيك
كان الرجالة كلها هيبقي اسمها بدراوي
طيب و الستات !؟
عاوز اجابة !
البوست عجبني حتي لو كانت سخرية كالبكا

لأني بحب نوعية ماذا يحدث لو دي

mimi يقول...

قلبت المدونة رأسا علي عقب معرفتش مين بنت المحظوظة دي

عاااااااااااااااا

بدراوى يقول...

معلش بس حرد على
mimi

هى مين بنت المحظوظة ديه
انا مش فاهم حاجة
؟!

اقصوصه يقول...

امممم

اعتقد انك من النوع

اللي يتاثر كثيرا بكلام الناس

او كلام اللي حواليه

انا عاد لو كان كل الناس مثلي

يعني على الدنيا العفا

يعني الناس كلهم حيكونو عصبيين

والطب النفسي سيعيش ازهى عصوره

لووووووووووووووول

ديالا يقول...

بدراوي

الحق ميمي شكلها كده دبستك في بنت محظوظه

يانهار ابيض

لا بجد ياميمي بنت محظوظه مين

ده بدراوي بيقول انه عامل اضراب ومش هيتجوز تقولي انتي بقي بنت المحظوظه

يلا معلش بقي

كلمات من نور يقول...

تسجيل دخول يا بدراوي ولكن لمعلوماتك الخاصة أنا لما بادخل المدونات باقفل السماعات علشان بعض الناس يضع موسيقى والبعض الآخر يضع أغاني و أحيانا أناشيد و قرآن و أنا أساسا باكون مشغله قرآن في إذاعة القرآن الكريم من المملكة أو من نابلس فلسطين

فتلاقي يحصل تشويش بالطبع يبقى مينفعش

وبالنسبة للبوست بتاعك فالحمدلله إن إنت مافيش منك اتنين

ههههههههههههههههه دعابة يا فتى تقبلها من والدتك على المنتديات

وخلي بالك إنك تكون ضد الزواج داه معناها إن نصف رجال مصر حتعدد وزوجاتهن يدعوا عليك