الثلاثاء، أغسطس 04، 2009

روحوا اسألوا مصر هيه عندها الإجابات

هذا البوست رداً على بوست أ/سبهللة الذى كتبته رداً على رئيس جمهورية نفسه الذى كفر بالوطن كما قالت.
و أرجوكم لا اريد مزايدة وطنية علىّ او على اى شخص ، ياريت يكون النقاش بشكل عقلانى اكثر منه عاطفى .
(1)
قلت للضابط فى الكمين (مصر هيه أمى)، فسألنى (ودى يعنى حاجة تفرح؟).
أ/جلال عامر – المصرى اليوم


- تفتكر البلد ديه معندهاش حاجة تديهالنا و لا احنا اللى مش عارفين نأخذ منها حاجة ؟
طب و تفرق ايه ما كدة كدة محدش واخذ منها حاجة .
- تفرق لو العيب فينا يبقى متفرقش البلد ديه عن غيرها ، إنما لو العيب فى البلد يبقى مش عيب
ان احنا ندور على بلد تانية صح و لا لأ ؟!

عارف يا يوسف الفرق بين البلد ديه و غيرها ان البلد ديه محجوزة بوضع اليد لناس تانية ،
و انا و انت ايدينا مش طايلة ، عشان كدة مالناش فى خيرها نايب .
مشهد من مشاهد فيلم قص و لزق

حينما أسأل شخص لماذا تحب مصر يجيبنى بكل سذاجة اصل مصر ذُكرت فى القرآن مرتين !!
، و مع كامل احترامى لتلك المكانة التى تتمتع بها مصر فى القرآن ، و لكن اصرفها منين يعنى
هل هذا الكلام يأكل عيش ، يعنى هل المواطن الفرنسى او البولندى او الماليزى بيحب بلده عشان مثلاً
ذُكرت فى القرآن ، يعنى ده سبب غير واقعى مثل التمثيل المشرف ، هو نيشان جميل ، لكنه لا يمكن
ان يكون سبب وجيه لحب مصر .
(2)
مشهد محفوظ عن ظهر قلب فى افلام الأبيض و الأسود
أم عاقر لا تلد ، و أم تلد الكثير ، تبيع الأم التى ولدت احد أطفالها للأم التى لا تلد ، ثم تودعه بقُبلة بريئة قائلة له : معاها حتكون احسن انا مش حقدر على تربيتك .
بعد عشرين عاماً يصبح الطفل شاباً يافعاً جميلاً يفرح القلب ، و ان كانت بنت تصبح عروس جميلة يسعى الكل لخطب ودها و تصبح جميلة من الجميلات ، تشاهدهما الأم التى ولدت
فتصرخ فجأة مطالبة بحقها فيهما ، تصرخ و تقول هم ابنائى من دمى
انا اللى شلتهم فى بطنى 9 شهور و تعبت فيهم ،
و لكنهما لا يعرفانها هم لا يعرفون سوى ام واحدة التى ربت و علمت و كبرت ، سيصفهما الناس بأنهما جادحان لأمهما التى ولدتهما ، و لكنه ليس جحود بكل ببساطة هما لا يدينان لها بأى فضل ، هى بالنسبة لهما سيدة غريبة تحاول ان تمارس تطفل بغيض عليهما ،

بالطبع انت لست فى حاجة لأن أقول لك ان الأم التى ولدت هى مصر ، و لكن الفرق انها هى التى ربتنا تربية شوارع كما يقولون ، اذا كانت غير قادرة على تربيتنا كان لها ان تترك تلك المهمة لأمهات أخرين ، لكنها لم تربى ثم حينما كبرنا قالت لنا اعطونى حقى من الحب و الحنان و صارت كلمة متقولش ايه ادتنا مصر قول حندى ايه لمصر شعاراً للمرحلة .


و فى هذا قال الفنان محمد صبحى فى حوار منذ حوالى عامين لبرنامج العاشرة مساءاً وانقل كلامه من الذاكرة فقط أن فكرة متقولش ايه ادتنى مصر هى فكرة خاطئة فالأم هى التى تعطى ثم تنتظر ان يرد لها ابنائها الجميل و العطاء ، اما الا تعطى شيئاً ثم تنتظر عطاء الأبناء فهى فكرة خاطئة ، ثم قال ما هو المنتظر من ابن أهملت أمه فى تربيته ، و كانت دايرة على حل شعرها او سهرانة فى البارات و صاحبة كاس و رمياه فى الشوارع ، بالتأكيد لن يعاملها سوى بكل قسوة لن يعطيها شيئاً .

(3)
استفزنى رد أ/سبهللة على رئيس جمهورية نفسه فى تعليقها على بوستها – و يمكن ده السبب الرئيسى لكتابة البوست ده كله من اوله لأخره حين قالت

وبعد ما يوضح
ينزل على تراب مصر يبوسه عشان مصر تصفح عنه
اصله ما جربش غيرها
وممكن يسأل اخونا المدونين اللى متغربين بره
بيموتوا فى ترابها
والله انا جوزى قالى واحنا راجعين اخر مرة فى الطيارة
الود ودى انزل ابوس ارض المطار ماكنش مصدق انه رجع تانى
لاحلى بلد واحلى ناس


انا لا ادافع عن رئيس جمهورية نفسه هو بالتأكيد الأقدر ان يدافع عن وجهة نظره ، بس يمكن لأنى فى نفس الإتجاه ، فقط أسأل سبهللة
من الذى يصفح انا ام هى ، عشان مصر تصفح عنه ، هذا على اعتبار اننا اخطأنا فى حق مصر و المطلوب ان نطلب منها الصفح و السماح
، لماذا حين تعاملنا امهاتنا بقسوة و بعقوق نصمت لأنهم افهم و اعقل منا ، بينما حين نعاملهم نحن بالمثل يجب ان نتنظر صفحاً منهم
، هم لهم ما بدا لهم من طريقة تعامل ، بينما نحن الأبناء الجاحدين الوحشين اللى بيعلوا صوتهم على امهاتهم ، و اقصد هنا الأم بمعنى مصر الوطن بالطبع .
و جوز حضرتك مكنش مصدق انه رجع تانى لأحلى ناس اه طبعاً ، انا احلى ناس بالنسبة لى فى مصر ، لكن احلى بلد ديه فيها كلام .


(4)
و لى سؤالان اتمنى الكل يجاوبنى عليهم

هل الإنتماء يكون للأم التى ولدت ، ام الأم التى ربت ، و ما المشكلة ان احب اى دولة اخرى طالما اعطتنى قيمتنى كإنسان و عاملتنى و اعطتنى فرصة للترقى فى العمل و التعليم ، و عملت ما تمليه واجباتها علىّ كإبن لها ، و لماذا دوماً هناك فكرة ان الأم التى ولدت هى الأحق بكل مشاعر الحب حتى لو لم تفعل شيئاً ثم ان النُطفة تشكلت فى رحمها و فقط ؟!

لكل من يحب مصر ، قول لى لماذا يحبها ؟! و ارجوكم بلاش اجابات من عينة اصل مصر فيها أهلى و فيها مراتى او فيها بنتى او فيها او او او ..... ، عايز اجابات عقلية اكثر منها عاطفية .
----------
يا أهل مصر اسمعوني، والكلام أمانات
قلتوالي بتحب مصر فقلت مش عارف
روحوا اسألوا مصر هيه عندها الإجابات


من قصيدة للشاعر تميم البرغوثى

--------
الصورة اللى مع البوست
مش تصويرى و لا اى شىء
ديه صورة وجدتها من فترة حوالى
سنتين على النت و احتفظت بيها

هناك 26 تعليقًا:

اسماء واحلام فى وجدانى يقول...

كنت هنا

وانت تعرف لماذا صمتى

mido يقول...

طبعا احنا غلطانيين فى حق مصر

لأننا ساكتين على الخصيان دول انهم يحكمونا و يسرقونا

احمد سعيد يقول...

بوست هايل يا احمد واحييك عليه

من اجمل البوستات اللى شوفتها عندك

تحياتى

احمد سعيد يقول...

تفتكر البلد دى معندهاش حاجه تديهالنا ولا احنا مش عارفين ناخد منها حاجه ؟؟؟

_________________

لا هى عندها وعندها كتيييير

بس هى مش بتدينا حاجه

ولا احنا اخدنا منها حاجه

ولا حتى بنحاول ناخد منها حاجه

احمد سعيد يقول...

مصر ذكرت فى القران مرتين !!!!

______________________

طب من باب اولى بقى نحب الكفار اكتر

لان الكفار ذكروا فى القران كتير

ونموت فى دباديب ابليس

لانه اتذكر اكتر

الشعب لابد له من حكومه تشكمه يقول...

بما انى من ضمن اللى شافو بره مصر فلااااااااازم نفرق بين انك بتحب مصر وانك بتنتقد اوضاعها وتتمنى تشوفها زى البلاد التانيه.....
اقولك حاجه من يومين بالظبط كنت بتفرج على فيلم لا تسألنى من انا ؟ تعرفه؟ شاديه قالت جمله رهييييييييبه قالت طول مافى فرق طول ما الناس هتبيع عيالها ولحمها,انا بعت بنتى علشان ولادى يعيشوا..اتفرجوا على الفيلم وانتو تشوفوا الوش التانى لمصر..

احمد سعيد يقول...

احب احييك بشدة على مشهد الام

بصراحه التشبيه خرافى با بدراوى ومعبر جداااااااااااااااااااااا

______________

احب اقول نقطه

الانتماء للوطن والتضحيه علشانه مش مجرد ضريبه مفروضه على كل مواطن ومطالب بادائها بدون مقابل ولا قيد او شرط

لا

دى الفكرة اللى روجها ( اللصوص ) اللى نهبوا البلد من اول السادات الله يحرقه الى الان

اى بلد لازم تحسسك بقيمتك وتحميك وتدافع عنك وتديك
تديك علم وتربيه وعلاج وتعمل منك انسان
بلد تكون فى كل شبر منها لك ذكرى حلوة تفتكرها

دة هو الوطن

ودى البلد اللى انت مطالب تديها وتضحى علشانها

انما بلد لا بتديك تربيه ولا تعليم ولا اى حاجه
ولا حتى بتعمل منك انسان
بل بالعكس
دى بتحولك لمجرد حيوان

حتى لو كان عندك اى شىء كويس او موهبه , بتضيعها وتسلبها منك

يعنى حتى بتاخد منك


اعتقد انك غير مطالب تجاهها باى حاجه

احمد سعيد يقول...

نقطه اخيرة بس احب اوضحها

البلد

البلد اللى هى ايه ؟؟؟

البلد تقصد بيها الارض ؟

ولا البشر اللى فوقها ؟؟

لو الارض فانا اختلف معاك

البلد دى بلد عظيمه وكلها خير

واعدائها شهدولها بكدة قبل اصدقائها

وعلشان كدة الكل كان ومازال طمعان فيها

البلد دى فيها خير كتير اوى ياجماعه والله

بس من كتر الفساد والسرقه محناش حاسين بيه

متظلمش الارض يابدراوى

لان الارض اساسا مظلومه بمن هم فوقها



اما بقى لو تقصد الناس
اللى هما الشعب والحكومه
الاغنيا والفقرا

فانا اؤيدك

لان لو دول هما البلد

فانا ميشرفنيش انتمى للبلد دى


لان الاغلبيه الساحقه منها دلوقت
فاسدين ومرتشين ولصوص وبلطجيه

ومحدش يقولى الناس لسه بخير ودى ظواهر واقليه وشغل الافلام دة

لا

دول مش اقليه

دول اغلبيه ساحقه

دول هما اساس البلد دلوقت

من اول الشحات والراجل السايس والبياع , اللى بيحاولوا ياخدوا منك اكبر قدر من الفلوس باى شكل

مرورا بالموظف الفاسد اللى بيسلك امورة بالفلوس والسجاير

وزميله اللى بيعمل اسقاط على خلق الله ويوقف مصالحهم ويزل اللى جابوهم متقمصا دور رئيس الجمهوريه

الى ( عليه القوم ) وانتوا عارفينهم كويس

معلش ونا اسف انى بقول الكلام دة

بس دة لان كلام سبهلله استفزنى جدا , لما قالت احلى ناس !!!!!!

احنا مش احلى ناس

احنا اسوأ ناس

اينعم مش كلنا

اينعم فينا لسه الكويس والممتاز

بس دة دايما هتلاقيه قرفان , ومخنوق , ومحارب فى اى مكان يروحه

ودول قله

اسماء واحلام فى وجدانى يقول...

اخى الفاضل

كل ما قصدته هو اننى لست احب السياسة او مشتقاتها لانها بلا قلب او رحمة
وقد قلت لك قبل ذلك هذا الراى وتعليقى الاول ما كان الا تذكرة لتعليق قديم ولكن يبدو ان حضرتك نسيت
اعتذر عن هذا السوء التفاهم

Unknown يقول...

أحمد (أسماء و أحلام)
انا اسف انا اللى نسيت
و بعدين انا بقالى حوالى
3 بوستات
بكتب بعيد عن السياسة
و رغم كدة حضرتك معلقتش
عموماً حصل خير

اسماء واحلام فى وجدانى يقول...

بين الاخوات مفيش اسف وبعدين لو حد اللى مفروض يتاسف يبقى انا
واكيد فى حل لمشكلتى هاشوفها وارد عليكى عاجلا ام اجالا

Kalimalhus يقول...

ياريت تخطف رجلك تقرى الرد اللى كتبته عند سبهللة و بعدين إرجع كمل..

سؤال .. هل ياترى لو سبع هجم على بقرة فرتكها و أكلها تلوم السبع و ألا البقرة..

الإجابة.. لا السبع و لا البقرة .. مفيش أحكام أخلاقية تتعلق بإن السبع يبقى سبع و لا إن البقرة تبقى بقرة .. آكل و مأكول .. مجرم و ضحية..

إيه علاقة ده بموضوعنا؟ .. علاقتها هى الهندوسى .. عابد البقرة .. اللى مفكرش يتدخل و ينقذ بقرته المحبوبة من أنياب السبع .. مفيش لوم على السبع و لا لوم على البقرة .. لكن يا الهندوسى يبين أمارة على إيمانه يا يكفر و يريحنا..

ملعون أبو كل عبدة البقر اللى دم البقرة مطرطش على وشهم و هدومهم و غرق الأرض و وصل لمناخيرهم و لسة بيتمايلوا يمين و شمال و يترنموا بأهازيج الحب للبقرة ..

البقرة ماتت ياولاد التيت..

mimi يقول...

بدراوي

تحياتي علي الكلام الجامد ده

مصر ... الوطن ... تعريفه وإحساسه بيختلف من فرد لفرد ومن شخص لأخر

يعني محدش بيحب أمه علشن أسباب لو شبهنا الوطن بالأم

ولو قلنا الوطن حكومة ... يبقي العيب فينا ... معرفناش نمارس حقنا في السياسة ومعرفناش ناخد حقوقنا

إجابتي علي السؤالين
=====================

1) ـ الأنتماء للإحساس ،، يعني فيه حنين بياخد الشخص لحاجة معينة بيحس فيها بنفسه

2 ) - أنا بحب مصر علشان أتربيت فيها .. وحفظتها ... عرفت مزاياها وعيوبها

ومعنديش عقد نفسية وبقول إني ممكن بعد العمر ده كله أحب وأنتمي لبلد تاني

فين المشكلة ؟

mimi يقول...

وبعدين إحنا كلنا اتربينا تربية غلط

محدش علمنا إحترام الأخر واحترام مشاعره

العيب فينا مش في مصر ولا في الزمن

mimi يقول...

ده أحلي بوست قريته من زماااااااااان

ياريت كل الناس زيك

هههههههههههههههه

Me7'o يقول...

هل الإنتماء يكون للأم التى ولدت ، ام الأم التى ربت؟؟

الإنتماء للأم اللى ربت طبعاً مع عتاب شديد اللهجة للأم اللى ولدت وباعت وفى نفس الوقت ما أقدرش أقسى عليها ولا أخونها فى يوم من الأيام بس الأولوية فى قلبى للى ربت

---------------

لكل من يحب مصر ، قول لى لماذا يحبها ؟

بحبها علشان بأشفق عليها
بحبها علشان العشرة ما تهونش غير على ولاد الحرام
---------------

بس يا بدراوى أنا مع سبهللة قلباً وقالباً
الواحد لما بيسافر ويرجع والله العظيم بيبقى هاين عليه فعلاً إنه ينزل يبوس أرض المطار

مصر بتوحشنى قوى يا بدراوى
قوى

د. ياسر عمر عبد الفتاح يقول...

المشكلة إنك بتتعامل مع مصر زي ما بتتعامل مع البنك
هات وخد ,,
مصر دي مش كيان منفصل
مصر هيه أنا وإنت
ويوم ما نبقي أنا وإنت كويسين أوي
هتبقي برضه مصر كويسة أوي


علي فكرة الأم اللي حملت
برضه ليها حق في إبنها
لأنها تعبت في حمله وولادته

مصر دلوقت مريضة
مش قادر تدي ,, مريضة بسبب وجود فيروسات وباكتيريا مخلياهاها متكتفة وطريحة الفراش
فاهمني طبعاً
يبقي هنا الدور علينا إننا نحاول نعالجها ,, مش نقلها ادينا دلوقت

مبشككش في وطنيتك أبداً
لأني متأكد إن لو واحد من أمريكا أو أي بلد تاني
شتم مصر قدامك
هتكون أول واحد بيدافع عنها

Me7'o يقول...

آه صحيح يا بدراوى

مصر أتذكرت فى القرآن خمس مرات مش اتنين بس

تفتكر نحبها زيادة؟؟؟

هههههههه

غير معرف يقول...

كنت نفسي اعلق عند رئيس جمهوريه نفسي عن تدوينه كفر ....... بس حكايه الفيس بوء دي بتعميللي حساسيه

مصر هي امي اللي ولدتني واللي بتحبني ..... الوطن ملوش علاقه بالتربيه ..........

ملهاش دعوه هي ان اخواتي الاشرار سرقوها وهما بيسرقوها سرقوا حقي معاها

والمفروض اني احاول ادافع عنها ..... واخللي اخواتي يبطلوا يسرقوها ويسرقوني ....

لو عالم دين انصحهم ...... لو مثقف اوجههم ..... لو موش قادر اعمل حاجه احاول اطبطب عليها ...... ملعنش سلسفيل اللي جابوها

ونهايه ..... حب الوطن واجب ديني ...... يعني لو حتى من منظور ديني خلينا نحبها

وبعدين السؤال ليه بنكرهها ....... هي موش ذنبها انها خلفت ولاد عاجزيين

غير معرف يقول...

اولا البوست جميل جدا وتشبيهاتك فيه ممتاز وفعلا من اقوى البوست اللى قراتها عندك
بس انا يمكن كلامى مش هيعجب شوية انا مش هعرف ارد على سؤالك احنا ليه بنحب مصر ولا نقدر نخليها بشكل تانى احنا ليه مرغمين على حب مصر
ربنا بيخلق الانسان وجوه غزائر معينة وافتكر حب الوطن غريزة منهم لو انت اتولدت فى كالالمبور كنت هتحب البلد هناك عشت واتربيت وشفت الحلو والمر فيها
فكرة انها زى الام اللى معرفتش تربى اولادها وياما تبعهم او تربيهم تربية شوارع منقدرش نشبه مصر بيها بدرجة كبيرة لان اللى حصل مش كده هى مقدرتش تربى فباعت ولا هى ربت تربية شوارع هى كانت مقهورة زى الام اللى اتجوزت بعد موت جوزها براجل مفترى معندوش اى رحمة ولا ضمير بيعذب ولادها وهى واقفة تتفرج ومش عارفة تتصرف ويكبر الاولاد مع مرور الوقت بدل ما يحاولوا يغيروا الواقع يفكروا فى الانتقام مفكروش وبتدوا يلؤموا الام على اهمالها ليهم وهما مش فى بالهم انها ارغمت على كده وعلى الجوازة دى كان فى اعتقدها ده هيكون احسن ليها ولاولادها
عارف حتى لو الام قاسية وبتعق ابناءها احنا مطالبين اننا نفضل بردو جنبها ومطالبين اننا نحبها لاخر لحظة
ومطالبين كمان نخلصها من جوزها المفترى مش نكبر ونبعد ونقول هى اللى اختارت وهى اللى تتحمل
الجريمة مشتركة بين الام واولادها وهى لو لقيت فى اولادها تمسك وفضل الطفل يصرخ متسبنيش انا عايزة ومهما يكون وباسوء ظروف هتسيبه هى فكرت ان دى مصلحته بس نسيت مصلحتها للاسف واحنا وقولنا نبيع زى ما هى باعت

اسفة انى مشفتش البوست اول مانزل


ايوشة

Me7'o يقول...

آيوشة

إنتى آسفة إنك ما قرتيش البوست أول ما نزل

وأنا آسف إنى ما قريتش رأيك قبل ما أكتب تعليقى

حقيقى برافو عليكى

وتحياتى لصاحب المضيفة الأخ بدراوى

سبهللة يقول...

اظن يا بدراوى الناس اللى هنا كلهم ردوا عليك ليه بيحبوها

بس انا كما هارد عليك
بالنسبة للسؤال الاول
الاتنماء للام اللى ولدت ولا اللى ربت؟؟

اولا بالنسبة لى انا
مصر هى امى اللى ولدتنى واللى ربتنى
وربتنى تربية محترمة مش تربية شوارع يا بدراوى
عشان كدة مش عارفة اكرها بعد ما عجزت وما بقتس قادرة تدينى حاجة فى القوت الحاضر
المفروض لما امى تقع وقعة مرض افضل جنبها لحد حاجة من اتنين يا اما تخف وتقوم بالسلامة يا اما يقضى الله امرا كان مفعولا
وبما ان مصر امى مرضت كتيييير اوى قبل كدة فانا مفروض انى افضل جنبها لحد ماتقوم بالسلامة زى ما قامت قبل كدة
واهو التاريخ ابتدا يعيد نفسه والاقطاع ابتدى يرجع تانى وبشراسة
والفرق بين طبقة الاغنياء والفقراء بتوسع
وعليه فأنا ممنتظرة ثورة زى ثورة الاضباط الاحرار
يمكن نموت قبل ما تحصل
بس هى اكيد هاتحصل امتى بقى الله اعلم

سبهللة يقول...

بالنسبة للسؤال التانى
انت طالب مننا اجابات عقلانية
ليه احنا بحب مصر؟؟؟
للأسف الحب غاليا ما فيهوش عقلانية
لكن انا هحاول اجاوبك بعقلانية على قد ما اقدر

صحيح انا قرفانة جدا من اللى حاصل فى البلد
وكل بلد بيجيى عليها فترات زى اللى احنا بنعانيها حاليا وبتقف على رجلها تانى ودة مش عيب مصر عشان اكرهها او ألعنها
دة عيبنا احنا
احنا المفروض نلعن نفسنا

اكتر من نص الشعب شباب ومع ذلك لا بيودى ولا بيجيب ولا ليه لازمه خالص
عايش حالة من الخنوع الرهييييييب

ودة مش عيب الام دة عيالها الجاحدين
مافيش واحد حاول يغير الواقع
ولو ان حاليا فى فئات ابتدت تتكلم وتحاول تدافع عن نفسها وا تدفع ظلم وقع عليها
والاضرابات كترت فى البلد
ودة دليل على ان الناس هاتبتدى تفوق يمكن الموضوع ياخد شوية وقت بس مسيرنا هانفوق وندفع الظلم الواقع علينا

بالنسبة لحبى لمصر واسبابه

يمكن انا كان حالى افضل من غيرى كتير
ويمكن لانى بحن دايما للماضى فى كل حاجة

يعنى احب امشى فى شوارع قديمة احب اسمع اغانى قديمة احب اقف قدام اى بناية قديمة واتأمل فيها سواء كانت عمارة فخمة او فيلا او حتى بيت قديم
دة طبع شخصى فيا مالوش علاقة غير بيا انا لوحدى

عشان كدة لما قريت البوست بتاع محمود وهو طالع نازل يقول ملعونة
دمى اتحرق مش من محمود لأ من كل الشباب اللى بيفكر زى محمود

اتحرق دمى انى اشوف حد بيلعن حاجة انا بحبها خاصة ان انا مش عايزة اشوف مصر الحالية اللى انا شايفاها فى كبوة وهاتقوم منها زى ما قامت قبل كدة كتير ..
انا ما فيش فى عينى غير مصر اللى انا بحبها بشوارعها وناسها
ناسها مش حراميتها

لكن مصر الحكومة .. ماليش دعوة بيها لان دى مش مصر .. دى كبوة وان شاء الله هانقوم منها

اقولك بقى بحب مصر ليه
اولا
الحمد لله ان اتعلمت فى مصر أيام ما كان فى تعليم وكان فيه وزارة اسمها التربية والتعليم
يمكن انت عشان صغير شوية وماعاشرتش اللى انا عاشرته
ذكرياتك فى مصر مش ولابد
لكن انا كل ذكرياتى حلوة فى مصر

بحب فى مصر مدرستى فى ابتدائى فى حلوان القديمة اللى كانت كلها قصور رائعة الجمال
صحيح حلوان حاليا بقت خرابة
بس انا مش عايزة اشوف غير زمان

بحب مدرستى اللى كل ما اعدى جنبها لازم دموعى تنزل حتى بعد ما كبرت واتجوزت وخلفت

بحب فىها ان الحمد لله ربنا رزقنى بدل الشغلانة واحدة واتنين وتلاتة واربعة وعد لحد ما تزهق

الناس بتشتكى من البطالة وانا الحمد لله كنت بتنقل من الشغلانة دى للى بعدها على مزاجى

ليه؟؟
اولا لانى ما استنيتش القوة العاملة
ثانيا لانى كنت بسعى كويس اوى فى موضوع الشغل دة ومش بسكت الا لحد ما الاقى الافضل

وكل ما حد يقول قدامى انه مش لاقى شغل
اقول لأ مصر فيها شغل بس عايز اللى يدور

بحب فى مصر جوها اللى مهما ساء عن زمان فمازال جو مصر حلو جدا مقارنة باللى حوالينا والبلاد اللى زرتها
ومقارنة بكل دول العالم
صحيح حاليا جوها كله تراب وعواصف
بس اكيد الاعصار دة هايعدى والغشاوة هاتزول وهاتحلو تانى مصر
وهايحلو تانى اهلها
اهلها اللى هم اهلنا وناسنا
مش اللى ساريقنها
لان مافيش ابن بار بيسرق امه مهما كان

يمكن اكون ما عرفتش اعبر كويس عن اللى جوايا
بس مش قادرة غير انى احب مصر
وابقى روح اسمع الاغنية اللى عندى
ولو دموعك ما نزلتش انهار يبقى لك الكلام
ولو نزلت دموعك اعرف انك بتحبها وصعبان عليك حالها

بدراوى
كامل احترامى ليك ولمهندس حر
مع اختلافى معاكم
بس اختلاف الرأى لا يفسد للود قضية

مهندس مصري بيحب مصر يقول...

أظن إنت شفت ردي عند سبهللة

رئبال عبدالله يقول...

احبها لانها اعطتني او لاني في مزاج للحب ..
اكرهها لانها حرمتني او لاني في مزاج للكره ...

"م ص ر" احرف لا تغير واقعها العواطف بشكلها المجرد .
تماماُ كالنوايا الحسنة بدون ارادة لوضعها موضع التنفيذ.

مصر ليست اماً ولا اباً ولا اخاً،
هي كيان سياسي - اجتماعي - ثقافي -جغرافي يجمعنا بالام والاب والاخ والصديق وكل مانحب ونكره .
"هي" ليست موضوع للحب او الكره، هي ميدان للفعل والانفعال وقطف الثمار التي زرعنا بذورها .

رئبال عبدالله يقول...

شكرا استاذ احمد