الخميس، يوليو 02، 2009

طعنات



جائتنى طعنة من أخت عزيزة ، و بالمناسبة هى طعنة إفتراضية فى واقع افتراضى لا حقيقى ، و بدل ما احرق فى دمى اللى اتحرق اصلاً ، قلت اقلبها هزار و اطلع شوية من السخرية اللى عندى اللى بستعين بيها لما موقف يعمللى كالوا فى دماغى ، فإتفضلوا الموضوع ده و بلاش حد يسن سكاكينه عليا ، و مفيناش من طعنات .

اذا جائتك طعنة من الخلف لا تقل لى اذن انا فى المقدمة ، و لكن بص بطرف عينك و شوف مين طعنك عشان تحترس منه بعد كدة ، و كلمه قوله لو سمحت انت طعتنتى بمطوة و لا سكينة ؟
حيقولك سكينة
قوله ذات نصل حاد ولا ناعم ، مشرشرة و لا مستقيمة ، لون مقبضها اسود و لا بنى ، طويلة و لا قصيرة ، عريضة و لا رفيعة ، سكينة بيت و لا مجزر ، سنها بيلمع و لا بهتان ؟
اول ما يخلص اجابة قوله خلاص كدة المقابلة انتهت ، اتفضل بالسلامة غير مطعوناً عليك .

و بعدين نادى على اى شخص فى الشارع و قوله لو سمحت يا اخ ممكن تجيبلى قطنة و شوية بن من القهوة اللى هناك و بلاستر و شاش و ايدك معايا اكبس على الدم بشوية بن .

خلصت خلاص خذ السكينة فى ايدك و اطلع بيها على البيت اول ما تخش مراتك حتلاقى السكينة فى ايدك حترقع بالصوت او تكلم البوليس او ممكن تروح لجارتها تقولها لو سمحت ممكن استلف سكينتك اقتل بيها جوزى و ارجعهالك تانى حتقولها اه اتفضلى يا حبيبتى بس ياريت متغيبيش عشان جوزى قرب يجى و لسة مخرطش الملوخية و لا قطعتك اللحمة .

لو بقى مش متجوز و عايش مع الست الوالدة يبقى اول ما تخش حتلاقى والدتك حتقولك ينيلك يا مفعوص سكينة ايه ديه اللى انت جايبها هببت ايه ؟! طبعاً لن يصيب امك أدنى شك انك تحولت لسفاح معادى اخر و حتقولك الوداع يا ضنايا اشوفك بعد 45 سنة
- تم الحكم على سفاح المعادى بالحبس 45 سنة بواقع خمس سنوات لكل أنثى من التسع الذى قام بالتحرش بهن .

قوللها يا ماما مش كنتى طالبة سكينة لتقطيع الباستا فلورا و الكيك و البيتزا ادينى جبتلك السكينة ديه
حتقولك و مالها متعاصة دم ليه .؟!
قولها لأ ده بقايا كركديه اصل واحد صاحبى كان سالفها بيقطع بيها حزمة كركديه .

حتيجى تأخذ السكينة تغسلها قولها لأ ديه مش اى سكينة ديه عايزة معاملة خاصة جداً .
خش بقى فضى غسالة الأطباق من كل حاجة ، و حط السكينة على البرنامج السريع شفط بقى و بخار و تعقيم و كدة .

فى هذه الأثناء بقى تكون طلعت بطاطساية و طمطماية و فلفلاية و شرائح من الفراخ المخلية ، طلع السكينة و اديها تقطيع مع تشغيل شريط اه يا قفا اه يا قفا .

لا تنسى ان تلك السكينة هى التى تم طعنك بها ، عيش بقى و كل و رُم عضمك و قطع و اعمل اللى انت عايزه و قدامك السكينة ، خلص كل ده
و جيب السكينة بقى و حطها فى دولابك .

و هكذا سوف تستمر الطعنات و سيادتك تعمل اللى المذكور اعلاه مع كل طعنة ، لحد ما يبقى عندك قسم للسكاكين فى الدولاب
قوم ايه تعمل بقى حل من إثنين
تبيع السكاكين فى سوق السلاح الأبيض
او تجيب برواز و تبروز السكاكين كلها فيها و تقلعها فى اوضتك و اكتب تحتها هنا ترقد سكاكين حياتى كلها .
حيزوركوا قريب ثقيل فى بيتكوه حيقولك كل ديه سكاكين انت كنت بتعمل ايه فى حياتك ؟
قوله معلش اصل السكينة كانت سرقانى .

هناك 18 تعليقًا:

بسمه عبدالباسط يقول...

هههههههههههههههههههههههههههههههه


حرام عليك يا أحمد مش قادرة أمسك نفسى من الضحك

وسمعنى أحلى سلام للسكين وطعناته بقلم أحمد بدراوى

هههههههههههههههههههههههههههههههههههه

بولا يقول...

انت طعتنتى بمطوة و لا سكينة ؟
حيقولك سكينة
قوله ذات نصل حاد ولا ناعم ، مشرشرة و لا مستقيمة ، لون مقبضها اسود و لا بنى ، طويلة و لا قصيرة ، عريضة و لا رفيعة ، سكينة بيت و لا مجزر ، سنها بيلمع و لا بهتان ؟


رغم انو الموضوع صعب .. بس خليتو يبان فكاهي أكتر منو مؤلم
حلو أسلوبك أووووووي بدراوي :)

وسلامي ليك :)

ستيتة يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ايه الكوميديا دي
لأ العنوان لازم يناسب البوست
ده مش بوست ده قنبلة

promise is promise يقول...

السلام عليكم

هذه اول زياره لى وليس الاخيره ان شاء الله
والله البوست تحفه ومشكله فى نفس الوقت لاننا فعلا كده بناخد على قفانا كتير وبرضه بنتعامل بكل هدوء مع الموقف

فكرتنى بمشهد فى فيلم زكى شان بتاع البجامات المخططه اللى ماليه الدولاب بالظبط زى السكاكين

تقبل مرورى
والسلام ختام

The illusionist يقول...

ههههههههههههه
مساء الفكاهه
ايه يا عمى
طعنتنى بمطواه ولا سكينه
بتفكرنى بفيلم سكريم والله
بص هو حاليا اللى شغال مطاول
عشان المطاوى
بتخش فى الجيب
سهل
وانا فاكر ان المقوله بتقول
لو جالك شلوت من الخلف
اعرف انك فى المقدمه

يبقى المقوله الجديده تكون
لو جالك طعنه من الخلف
اعرف انك اهبل ومامنتش ظهرك
ودى مقوله عشان نابليون ميزعلش
ومساء الفل

MaNoOoSh يقول...

ولا يهمك اي طعنة
من خنجر ولا سكينة

طول محنا عايشين مش هنلاحق على المطاوي والخناجر والسكاكين اللي هنتطعن بيها

ديالا يقول...

احمد

المفروض فعلا اني اضحك

بس فعلا الحكمه الي فيها يحس بيها الي اطعن بسكينه قبل كده

وانا والحمد لله اطعنت بسواطير مش سكاكين ومن اقرب حد ليا

ولو اخدت بنصحيتك هبقي اكبر تاجر سلاح ابيض في المنطقه


احمد متخدش في بالك سيبها للي خلقك وربك بيعرف ياحد الحقوق كويس اوي

واكتفي فعلا بحسبي الله ونعم الوكيل

تقب مروري ورغي الكتير ده

مواطن مصري يقول...

انت فاكر سفاح مدينة نصر يا بدراوي

Unknown يقول...

معلش انا مش برد على اى تعليقات فى البوست واحد واحد

بس حابب ارد على

ديالا
-----
ياريت بس منحسبنش على حد
لأن ببساطة الطعنة ديه هى مجرد جرح ليا انا ، بسبب سوء فهم او اى ان كان
بس الشخص ده جرحنى لكن مظلمنيش
هو شخص محترم و انا مش عايز احسبن عليه
ببساطة انا اللى حساس اوووى
و مش بستحمل اى تصرف وحش من حد بعزه
فبلاش حسبنه لو سمحت
------
مواطن مصرى
-------
تقريباً فاكره

ديالا يقول...

احمد

الحسبنه مش دعاء وحش

ده انت بتقول يارب انت حسبي

يعني يارب انت وكيلي

يعني يارب ساعدني

احنا كده مبندعيش علي حد

بالعكس ده احنا بنخلي ربنا هو الي وكيلنا

مهندس مصري بيحب مصر يقول...

:))

غير معرف يقول...

المفروض اني اضحك ......... بس موش عارفه ولقيت نفسي عملت كده :(((

Ramy Wasel يقول...

شفت يا عم
نسيت تسأل اهم سؤال
هى السكينه معقمه ولا لا

علشان الميكروبات
احنا نموت اه
بس نتلوث بجراثيم لا
احنا نضحى بارواحنا فى سبيل القضاء على الميكروبات

ربنا ما يجيب طعن من الضهر تانى
ولا الوش

سارة نجاتى يقول...

ايه اللى جرالك يا بدراوى يا ابنى ؟؟ ما أنا كنت سايباك كويس ههههههه

micheal يقول...

ههههههههههههههههههههههههه..يا دماغك
بس ايه يا ابني التأملات الدموية دي
:))
تحياتي

الشعب لابد له من حكومه تشكمه يقول...

البوست دمه خفيف جداااا بس مش عارفه اضحك يمكن لانى حسيته جداااا وعارفه اد ايه الوجع اصلى ياماما وياماما جبت شاشا وميكروكروم يوووووه بس الحمد لله كله بيعدى وبتتعلم درس مفيد.
سيبك انت السكينه اللى متموتنيش اى نعم بتوجعنى بس بتعلمنى درس مفيد والله.
وبعدين يابدرواى انت تسكت تسكت وترجعلنا ببوست كده صمت دهرا ونطق سكاكينا.
فى حاجه عاوزه اقولك عليها بس طبعا دى حريه شخصيه بس تعتبرها مناقشه انت ليه مش بترد على كومنتات الناس؟؟
اولا بتحس ان فى تفاعل بينك وبينهم وفى اوقات بتكون مناقشه او عاوز توضح حاجه.او ياسيدى تغير المود وتضحك معاهم مش عيب:)
انت مثلا من الناس اللى لما بتسيب كومنتات عندى بتهتم انك تيجى تشوف انا هقول ايه على ردك صح؟؟؟؟؟
طب ليه متقولش ان فى ناس بتباه مستنيه تشوف ردك على ردهم؟؟؟؟
عموما زى مقولتلك دى حريه شخصيه بس كنت هموت واقولك الكلمتين دول وبعدين فى واحد يدخل يزورك تقوم متردش عليه؟؟؟؟؟؟؟؟ (بهز رأسى اسفا)
اوعى تنفعل انا بقولك اهو انا مجرباك اعصابك على طراطيف مناخيرك:)))

Soul.o0o.Whisper يقول...

السلام عليكم و رحمة الله و بركاته

بدراوى
كيف أخبارك؟؟
معلش آسفة على التأخير

و متشكرة جدا بجد على كلامك
ربنا ما يحرمنى من احلى اسرة تدوين

بس فى حاجة عاوزة أقولهالك
انت قلت ان انت اللى حساس اوووى
و مدام انت عارف كدا
حاول انت تتغلب او حتى تتأقلم على كدا

بس السكاكين مهما كانت علمتنى ان مانجرحش بيها مرتين

يعنى شوف ليه الموقف دا زعلك
و شوف الغلط منين
و حاول صلحه
و مدام شخص انت بتعزه
يبئا اكيد ماكنش قصده



دمت بود

Kalimalhus يقول...

شوف لما الموضوع بحس إنه خاص بصاحبه ببقى مش عايز أعلق لأن فى الحالات دى الواحد يا هيلبخ يا هايلبخ..

بس إنت بقالك مدة مش عاجبنى .. انا مش قلقان لأن الدنيا علمتنى إن كله بيعدى .. بيعلم علم و علامة بس برضه بيعدى .. المهم ماتضيعش وقت طويل و السكينة سرقاك .. السكاكين جاية كتير و منها اللى هاتكون حاطه بنفسك فى إيد اللى هيطعنك بيه و منها هتبقى شايف و عارف إنه من نصيبك فى يوم و هاتجز على شفايفك و تاخد الطعنة و تبتسم و تشكر كمان..

عايزك تتوجه بالشكر لمن طعنك و تفيه حقه من التبجيل لأن كل من يطعنك يعلمك درس من دروس الحياة يعنى يبقى أحد معلميك اللى علموك و علموا عليك و إنت عارف عمنا شوقى قال إيه فى حق المعلم عليك.. :)