الأحد، مايو 31، 2009

أوباميات

البوست ده حنشره بعد الحاح من الصديق مهندس حر
و هو عشان خاطره حنشره
و يالا اهه دماغى روحت رشيت عليها مبيد حشرى
و شلت الصراصير اللى فيها
:-)
اه و مش رحت عملت تحليل مرارة طلع انى معنديش مرارة اصلاً
و انى مولود كدة فبسأل الدكتور طب و فقعة المرارة اللى جاتلى ديه منين
قالى لأ انت صباع رجلك الصغير بيدوحس لما تتضايق .

و بعدين لو انا مخنوق مش لازم اخنق على اللى حواليا
يعنى خليهم يضحكوا حيبقى بدراوى و مصر عليهم

اه و بالنسبة للبعض اللى زعلت من تعليقاته فى البوست اللى فات
انا مش زعلان من اى حد خالص ،
بس معلش اصل انا مقولتش لحد انى شخص حساس اوووى
و دمعتى على خدى ، و اى موقف ممكن يضايقنى ، فإنسوا اللى حصل
انا بعتز بيكوا كلكوا .

يالا جهزوا بقى الترمس و اللب و السودانى و الببس و فيه حد حيعدى بكشاف نور دلوقتى
اللى حاجز كرسى غلط يقول من دلوقتى عشان منقوموش فى نص البوست
ممنوع التدخين ، السرعة مراقبة بالرادار ، تصحبك السلامة

--------

1

أوباما ياس وى كان

بينما كنت امشى فى احد الشوارع
مرتدياً تى شيرت عليه صورة اوباما
و تحتها كلمة

Yes we can و

كلمة

The Change we need

و هما اشهر شعارات لحملة أوباما

استوقفنى احد الأشخاص اللى سحنته مدياه على مخبر
و الحقيقة هو مش استوقفنى ده هو عبطنى

و قالى ايه يا روح امك اللى انت لابسه ده
و ايه قلة الأدب و الأباحة اللى انت كاتبها ياد يا امور يا نايتى

طبعاً أنا استغربت بيعرف انجليزى ازاى

طلع انه لفت نظره صورة اوباما

و قاللى صورة مين الأخ اللى على التى شيرت ده انا بشبه عليه شبه واحد صاحبى بيشتغل بواب

رديت قولتله : لا سيادتك ده اوباما

قاللى : اوباما و راح مكلم فى اللاسلكى الضابط اللى فوقيه و قاله يا فندم قبضنا على واحد حاطط صورة واحد اسمر اسمه اوباما و بيقول كلام افرنجى كدة باينه كلام ابيح و قلة ادب و مسخرة .
---
-

نعم يا فندم ايوا نقبض عليه ؟ الضابط رد : هاته معاك من قفاه

قولتله سيادتك ده اوباما ،
قاللى ماليش فيه : عيب اختشى بقى بأم الكلام الأبيح اللى انت فرحان بيه ، انت ياض باينك لا مؤخذاة و لا ايه ،
و قام بالبصق على الأرض و قال قايل اسفوخس عليك حتروح من ربنا فين

!

و انا عمال اشرحله أن الكلام المقصود بيه ، احنا نقدر و التغيير اللى احنا عايزينه
يقولى : انت باين عليك حتودخنى معاك .

و انا اقوله يا جدع : ده اوباما الرئيس الامريكى ، طبعاً قولت اما ألبس تهمة العمالة للخارج ، أحسن ما ألبس تهمة الدعوة للإنحلال و الفجور و الخروج عن الأخلاق .

قاللى المخبر : امريكى كمان ، تلاقيك عايز يبقى فيه حقوق للتيييت و قال كلمة فيها حرف الخ

طبعاً أيقنت انى لابس التهمتين لابسهم

وقفت واحد فى الشارع شكله محترم و متعلم و الأهم ان شكله راجل لحسن عمك المخبر يقولك ده واحد من اياهم

قلت للمخبر طب إسأل الأخ ده و هو يقولك

قالى ماليش فيه : أوباما بينا على البوكس ياض

!

بعدما شد و جذب بينى و بين الضابط ، قالى انا حفرج عنك ، بس اياك اشوف الكلام الأبيح ده
تغيير و نعم نستطيع ناقص تكتب حامد يا جامد ، احنا شعبنا زى الفل مش محتاج تغيير

!

خرجت من عنده و قوم اول حاجة عملتها روحت البيت حرقت التى شيرت ، و نزلت اشتريت تى شيرت عليه صورة هيفاء و لزقت عليه بالمكواه نفس عبارات اوباما .

Yes we can
The Change we need


كدة بقت قباحة رسمى

!!

و من يومها كل ما اشوف حضرة المخبر اياه يضحك بسخرية و يغمزلى ويقول ايوا يا عم ياس وييى كان – ميكونش ليه – اااااااه البت هيفاء ديه لخبططلى مخى ، و بفكر اتجينش الولية اللى فى البيت .

!

---------

تم كتابتها قبل زواج صاحبة الصون و العفاف هيفاء بنت وهبى ، عشان ديه اعراض ناس

!

--------

2

أوباما فى جامعة القاهرة

و أثناء دخوله الجامعة الضابط على البوابة قاله رايح فين حضرتك ؟
قاله انا اوباما رئيس امريكا
الضابط قاله لو كنت رئيس كوبا حتى طلع الكارنيه يا اموور

قاله كارنيه ايه بقولك انا باراك اوباما ياس وى كان
الضابط قاله كان ، قول الزمان ارجع يا زمان


و بعدين قال لرئيس الحرس يا باشا عايز يخش الكلية و معاهوش كارنيه ادخله؟
رئيس الحرس قاله هاتهولى ابن الفقرية ده
اما اشوف ايه حكايته
طبعاً ماسكه شتيمة و تلطيش و قلة قيمة
و قاله اهاليكوا بيصرفوا عليكوا عشان تيجوا تتصرمحوا هنا يا ولاد الكلب نسيت الكارنيه يا امور

!!
نسيت تأكل نسيت تشرب و كمان لا معاك ورقة و لا قلم و لا كشكول من ابو سلكة و بعدين راح تافف فى وشه

و قاله اركن على جنب لحد اما افطر و اشرب شاى و اشوف ايه حكايتك بلاوى بتتحدف علينا من انهى نصيبه
و بعدين بعد كدة افتكر اوباما انه معاه الحافظة بتاعت دفع المصاريف فطلعها للضابط و دخل الكلية

يدوبك لحق خطاب الرئيس فى اخره
لولا انه غمس عم سيد اللى كان قافل باب المدرج
ببريزة عشان الريس رافض حد يخش بعديه
كان اوباما اتاخذ غياب


بس اللى شافوه قالوا انه اول ما دخل الريس شخط فيه و قاله
جاى متأخر و بتتكلم كمان طبعاً قال للى جنبه ورق و قلم بسرعة الحق انقل اللى فاتنى فقاله يا عم فكك منى
حبقى اديك المحاضرة تصورها برة


فى الريست بقى
طلع ضرب سنتدوتشات كبدة مع أخت كدة اتعرف عليها فى المحاضرة
و جاله عسر هضم و باطنه سابت و ملحقش يعمل مباحثات ثنائية مع الريس

لأنه قضى يومه كله فى حمام الكلية المقرف بعد ما كان عايز يخش حمام اساتذة الجامعة و قال للواقف على باب الحمام معلش يا عم انا واخذ ماجستير من جامعة هارفارد


قاله فين الشهادة اللى تثبت طلعها و روح ادفع 5 جنيه خدمات تعليمية فى الخزنة و بعدين 75

جنيه مصاريف فى البنك و بعدين روح اختمها من شئون الطلبة
و بعدين ادخلك الحمام
طبعاً اضطر يخش حمام الطلبة
اتقفش جوا من الامن كان بيلف سيجارة مارجوانا
---
و بعدين بعد ما خلص
شاف العيال اللى بتحب على روحها فى الجونينة
قال ده شىء هايل جميل أنا فى غاية السعادة
ثم قبل ان يغادر الجامعة قال بلغة عربية واضحة ميتين ابو التعليم و اللى بيتعلموه

هناك 22 تعليقًا:

مهندس حر يقول...

يا سيدى متشكرين ألف شكر ..

ههههههههههههههه

حلوة طحن الحتة بتاعة ربة الصون و العفاف .. تصدق لو الواحد حب يعمل مظاهرة يوزع التى شيرت ده فى ميدان التحرير و هاتلاقى تلات تربع شباب البلد جايينلك و قاعدين يهتفوا : ييس وى كان .. و يشيلوك على الأعناق كمان .. وشوية و هاتلاقى واحد بيشدك من رباط الجزمة و يقولك:
- كابتن .. هى ها تغير إمتى؟

أيوة كده يا راجل .. و متشكرين على رجوع تدوينات النقاب إنشاء الله يلاقى فيها ناس كتير أشياء تفيدهم ..

أشوف وشك على خير بعد أسبوع كده إنشاء الله .. عايز آجى ألاقيك مكسر الدنيا بموضوعات جديد ..

مواطن مصري يقول...

و من يومها كل ما اشوف حضرة المخبر اياه يضحك بسخرية و يغمزلى ويقول ايوا يا عم ياس وييى كان – ميكونش ليه – اااااااه البت هيفاء ديه لخبططلى مخى ، و بفكر اتجينش الولية اللى فى البيت .



ههههههههههههههههههههههههههههههههههههههههههههههههههههه


مش قادر ابطل ضحك

ايوشة يقول...

ههههههه عجبنى اوى البوست ده بس انت قلبت ليه على اوباما فى اخر البوست كده وهو فى احلى من مصر وجامعات مصر واهل مصر مصر دى تتحب بكل حاجة فيها بسلطاتتها بابا غنوجها
فعلا لو انت بتتكلم عن التغير والكلام الكبير ده هتتاخد فى الرجلين خليك هايف وتافه فى البلد دى تعرف تعيش :)

ستيته حسب الله الحمش يقول...

هههههههههههههههههههههههههههههههههههه
كنت ها افطس حرام عليك

يعني اوباما طلع ضرب سندوتشات من عند صبري كمان

والله العظيم ده كان استمخ وادى صبري جرين كارد
ههههههههههههههههههههههه

وبعدين هيفاء هيفاء هو المخبر ها يعترف "بشرعية" مين غير هيفاء وسوزان تميم

ايوه كده ياعم اديها بوستات وسيبك من المرارة

طبعا انا مناخيري طويلة نزلت جرييييييييييي قريت بوستات النقاب
ده انا كان الفضول ها يجنني

ربنا يكرمك ويبارك فيك ويلهم طريق الرشاد
لأن اصلا كلنا بنهتدي بهدى من عند الله
لا بفيزا من حد ولا بمعارضة حد

اللي يزعلك عاقبه واقفل الكومنتس

تحياتي

سبهللة يقول...

واد يا بدراوى
انا مش لسه كنت هنا امبارح
انت كتبت امتى السبع بوستات اللى فاتوا؟؟
دة انت كدة تفوقت على نوارة فى عدد البوستات
واحدة واحدة يا بنى
هو حد بيجرى وراك

د. ياسر عمر عبد الفتاح يقول...

بالنسبة لموضوع أوباميات فهوه دمه خفيف حقيقي جداً


************
إنت مش عاوز تتكلم عن النقاب تاني
مفيش مشكلة
لكن أنا رجعت اقرأ كل الكلام تاني علشان اشوف حد حصل منه تجاوز في الحوار ... مقلتش
عامةً أنا برضه مكنتش ناوي أرد تاني علي المناقشة لأني قلت كل اللي عندي خلاص والكلام مكنش هيفيد بحاجة بعد كده لأن من الواضح إن محدش كان ناوي يغير رأيه ....

بس كده ...

لكن مبحبش أسيب ابواب ورايا مفتوحة
ومبحبش أزعل حد مني
لو الشخص اللي زعلك ده أنا
أو لو أسلوبي ضايقك ..
(وهنا أقصد الأسلوب مش الفكر نفسه)
فأنا أسف جداً جداً جداً

يا أخي الكريم أنا نفسي أهون علي من نعل حذائي وأنا أحب ألا أغضب لنفسي إتباعاً للرسول صلي الله عليه وسلم

بدراوى يقول...

د. ياسر عمر عبد الفتاح
---------
لا يا دكتور - انا مش بتكلم على تدوينات النقاب - انا بتكلم على التدوينة اللى فاتت على طووول

و انا مش زعلان ، عادى محصلش حاجة
نورت المدونة
:-)

تامر علي يقول...

انت بتقول فيها .... والله أوباما لو حاول يدخل الجامعة من غير موكب كده على رجليه ليعملوا فيه أكتر من كده .... دا احنا كنا بنعمل مغامرات وخطط وخطط بديلة علشان ندخل :)))

بس هو لو أكل كبده هيقضي بقيت عمره في عين شمس التخصصي يتعالج من فيروس سي :)

........

بالنسبة للبوست اللي فات فأنا بلوم عليك انت أكثر من أي شخص لأنك بدل قررت تتعرض لموضوع ولك رؤيتك الخاصة فلازم تعرض موقفك ولاتتأثر بالآخرين حتى وإن هاجموك بضراوة (وأنا كنت ناوي أهاجمك بضراوة )

أما ضراوه ..ضراوه ...أما ضراوه
فاكر الأغنية دي:)

المعلم محمد صاحب المطعم - طعمية سخنة يقول...

ههههههههه بدراوي
بص يا عم اولها كده الحكاية انك لما تكون مخنوق مش تخنق علي اللي حواليك لأ تحاول تدور علي حل بدون ما تتخنق و بالنسبة لموضوع الحساسية ده اتنرفز بينك و بين نفسك و اعمل بارد ..... مجربة و بكيد بيها العزال !!!

هتروح من ربنا فين هههههه الناس دي بتعرف ربنا اوي


طبعاً قولت اما ألبس تهمة العمالة للخارج ، أحسن ما ألبس تهمة الدعوة للإنحلال و الفجور و الخروج عن الأخلاق طبعا غلطان الانحلال و الفجور بيجيبوا احسن فلوس و بزنس جامد اوي .. بص علي قنوات الكليبات

نعم نستطيع ناقص تكتب حامد يا جامد هههههههههه

و هيفا ...... هههههه كويس انك فهمتني اصلي بقرا جزء جزء و اعلق عشان اول مرة اشوف موضوع كوميدي عندك

ميتين ابو التعليم و اللى بيتعلموه ..... هههههه لا تعليق

Appy يقول...

لا مش قادره اصدق فيه حد بيفهم الانجليزى كده
ولما اللى مكتوب اباحه امال اللى البنات والاولاد بيلبسوه ايه

شكلك حلو فى الكوميديا دى لى فكره

ابو المفاصل الواصل يقول...

احرص على التعلم من كل الناس حتى الســـــيئين منهم
فبســــوئهم تكره الســـــوء وتبتعد بعيــدا عنهم
الافاقين رافعين شعار الشــــــرف وهتلاقى القرف منهم
الذين يدقوا الاوتاد فى طريق العباد وده عمل يشينهم
وبيدينوا كل الناس ومش لاقـــيين حد يرجعهم ويدينهم
وتعلم من الطيبين الخيرين كل ما يجملــــــهم ويزينهم
على قدر المستطاع تكون واحد ماشى على دليلهــــــم
وتكون عامل مساعد وواخد بيد ضعيفهــــــم وعليلهم
وتعلم من غير هؤلاء الاعتدال والبساطة وخليك فى ديلهم
واجعل التعلم والتعليم اسلوب حياة لان الجهلة ياويلهم
وتكون بقعة ضوء تنير ظلام ايامهـــــــم وليلهـــــم

مى يقول...

بوست رااااااائع يا بدراوى


بيثبت إن جواك شخص كوميدى دمه خفيف .. و إن كان مفرط الحساسية.. و ديه حاجة جميلة جداً .

هيه بس المشكلة بتبقى فى اللى بتتعامل معاهم .

بمعنى :إن لو كل واحد منهم قبل ما ينطق بالكلمة شاف و حس بردة فعل الآخر عليها .


أكيد كانوا حيفكروا مليون مرة قبل ما يكتبوا أو ينطقوا كلمة تزعله أو تجرحه.



لو كل واحد حس إزاى حيجيلى نوم و أنا مزعل حد أو جرحه!!

أكيد أكيد مش حيتصرف أى تصرف يضايق .


يعنى العملية محتاجة منهم شوية محاسبة للذات فى الأول ...و بعدها حيبقى ده السلوك العادى و الطبيعى بتاعهم ... و أبداً أبداً مش حيجرحوا و لا يعادوا بعدها .

اعقل مجنونه يقول...

هههههههههه
تصدق هعيط علشانه من كتر البهدله
بس هو اللى يستاهل عمال يتسرمح على كل تى شرتات البلد
وكمان فى الاخر عايز يدخل الجامعه من غير كارنيه


الا صحيح هو كان كلية ايه

Ramy Wasel يقول...

كنت عاوز تحرمنا من الكلام ده يا راجل

وبعدين المخبر عنده حق
هو يعنى سى اوباما ده سيد امه يعنى

كويس ان المخبر مقالش we will rock you
وادينى فى الهيفا
وانا احبك يا نننس

ومين يعنى اوباما علشان يدخل الكليه من غير كارنيه

يعنى ياكل حق الدوله ويدخل بلوشى
هى فوضى

منتظرين موضوعاتك دايما

فتاه من الصعيد يقول...

انا زعلانه جدااااااااااااااااااا
لانك شلت التعليق بتاعك من عندى.....كنت هموت واعرف كاتب ايه فيه؟
وعلى العموم آسفون لو زعلناك ....بس عايزاك تعرف انى بعمل كده مع كل اخواتى .....يعنى شويه حزم وحسم كده من باب انى استفزك.....بس ما كنتش اعرف انك حساس كده
بالنسبه للبوست ده رائع.....ضحكنى ع الاخر......بس الواد اوباما ده طلع فاشل جدا.....علشان كده بقا مسكوه امريكا
يلا دمت بخير.....تقبل مرورى

غير معرف يقول...

انا جييييييييت
تسالىىىىىىىىىىىى
انت أصلك قولت هاتوا التسالى
انا اصلى بحب التسالى ودى مدونتى من غير مدونة هى تعليقات وبس
موضوع مدونتى زى ما انتو شايفين انا عابر سبيل بستمتع جدا بيكم وبأفكركم وبرأيكم
وشعارى كلمات ابونا صلاح جاهين
«غمض عينك وامشي بخفة ودلع..
الدنيا هي الشابة وانت الجدع..
تشوف رشاقة خطوتك تعبدك....
لكن انت لو بصيت لرجليك تقع...عجبي!»
اهتماماتى
الازأزة .. يعنى .. لب وسودانى حمص وترمس وحب العزيز
ولما بكون متريش فستق هاهاها
انا بضحك لأنى دايما على الحديدة بس بردوا بلاقى
تسالىىىىىىىىىىى
لكل المدونين أوعو تنسوا انا اسمى تسالى

الشعب لابد له من حكومه تشكمه يقول...

امممممممم طاايب:))
انت بوظت الشعار اللى كان عاجبنى شخبطلى عليه ربنا يسامحك كنت بحبه (نحن فى حاجه الى التغيير)..
بس برضه انا معجبه جداااااااااااااا بأوباما بجد بحب اسمعه وهو بيتكلم جدااااا.:)
تفتكر ليه يامستر بدراوى احنا معندناش اوباما مصرى؟؟؟؟

mimi يقول...

يا سلاااااااااام؟؟؟؟
انت مش كنت عاوز بقي تنشر البوست الجامد ده؟

ده حلو جدا وساخر واسلوبك فيه ... خلاني اقرا الكلام مرتين ...

شكرا مهندس حر ...

تحياتي

عجبني اوي اخر خمس كلمات في البوست ...

mimi يقول...

ما ترد علي الراجل بتاع تسالي ده ... ولا انت جايبه يبيع الترمس و اللب و السودانى والبيبسي ؟

بدراوى يقول...

هههههههههه
انا شاكك انه انتى
هههههههههههه
ده برده دخل فى بوست ماتش الإعتزال و كتب البقين دوول
هههههههههههههههه

دودو يقول...

طيب بذمتك يابدراوى
كنت عايز تحرمنا من البوست العسل دة

وزى مامهندس حربيقول
عايزينك تعمل تدوينات تكسر الدنيا

بدراوى

كنت قلت فى البوست اللى فات ان مدونيين كتير من المنصورة

لاومعلقين كمان

ياريت تقولى على مدونات بلدياتى اللة يخليك

Soul.o0o.Whisper يقول...

السلام عليكم و رحمة الله و بركاته

ايه البوست داااااااا؟؟؟
فظيييييييييع

بجد جامد
بس ياريت يتعمل فيه ربع اللى انت قلته دا
هههههههههههههههه
كنا شردناه والله

بس مدام الحكاية هيفا
يبئا بكل تأكيد
yes we can
هههههههههههههههه

the change we need


خالص تحياتى لقلمك

و الحمد لله ان ماعدتش فى زعل
:)