الاثنين، مايو 25، 2009

النقاب عادة لا علاقة لها بالإسلام 1-2

ملحوظة
1)
لينك الموضوعين المشار اليهم عند الأخت مها مش حيفتحوا لأنها أغلقت مدونتها لفترة ، فمعلش اقرا التدوينة بدون التفكير فى ما قالته الأخت ، يعنى اعتبرها تدوينة منفصلة لا علاقة لها بكلامها
2)
فيه لينك للكتاب سايبه تحت
اللى حيقولى حقراه الكتاب و بعدين ارد مش حرحمه
الأجزاء اللى متكلمة عن النقاب هى بس اللى قايل عليها
يعنى سيادتك اتفضل اقراها
عايز بقى واحد كمالة تقرا الكتاب كله
مع نفسك بقى ده شىء ماليش فيه
--------------
كتبت الأخت العزيزة مها زين فى مدونتها تدوينتين عن النقاب أحدهما عن أدلة وجوب النقاب و الأخرى عن النقاب و وزير الصحة و أنفلونزا الخنازير

و قالت فى التدوينة الثانية : ده اصلا اساساً جموع العلماء أختلفوا في النقاب حول انه سنة او فرض وقليل اوي اوي قالوا انه فضيلة واصلا الشيوخ اللى قالوا انه سنة ذي الغزالي والالباني رحمهم الله قالوا بانه سنة ولكنهم جعلوه فرض في زمن الفتن





و الحقيقة بعيداً عن رأيى الشخصى فى النقاب - و الذى سوف أطرحه بإذن الله فى تدوينة خاصة - ان الشيخ محمد الغزالى لم يقل ان النقاب سنة ، و بطبيعة الحال لم يقل انه فرض ، و لم يقل أنه فضل حتى ، و لكنه قال انه عادة بدوية .


و إليك بعض الدلائل من كتابه هموم داعية و قد قمت بعمل تظليل على الكلمات التى اقصدها بالضبط مع مراعاة القراءة الكاملة للوصول للمقصود كاملاً و للتكبير قم بالضغط على الصورة
--
لتحميل الكتاب كاملاً إضغط على اللينك




















هناك 22 تعليقًا:

مواطن مصري يقول...

انا ليا رائي بخصوص النقاب ناس تقولك انها حرية شخصية في الشارع نعم من حق اي شخص يلبس الي على مزاجو و لكن اذا طلب منها رجل الامن ان تكشف وجهها و اذا رفضت تحاسب و تعاقب

زيها زي غيرها

انما يكون الاماكن الحكومية او الجيش لو ممنوع في بعض الاماكن الدخول فيها سواء كان لابس نقاب او راهبات

يبقى القانون يحترم

و بعدين عيب ان الناس تخلي الدين في نقاب

الدين مش نقاب او لبس

إيمان هلال يقول...

الحقيقه انا اللى اعرفه انه سنه بس مش هفتى فى حاجه مش عرفها

Ramy Wasel يقول...

هذا ليس رأى امام الغزال فق
ولكن اجتمع الفقهاء فى مصر على ان النقاب ليس سنه
واذا كانت المرأه فى الصلاه امام الله لا تلبس النقاب
فلماذا تلبسه امام الناس
والحالتين الذين من الممكن قبول الحجاب فيهما
اما ان تكون المرأه جميله جدا وتخشى الفتنه
او وحشه جا وتخشى تعليق النس
ومن تريدان تحتجب
فالاحسن ان تحتجب فى بيتها
لان الان الحجاب م الممكن ان يستغل بشك سئ
من المجرمين والارهابين
وضره اكثر من نفعه
والحجاب هوالسنه
وليس النقاب
الفرق كبييييير

مواطن مصري يقول...

تعجبني

رحلتنا في الحياة يقول...

طيب انا مش هتكلم فى فقه وهل هو فرض ولا سنة ولا حتى فضل
لان فى اختلاف فى الاراء ومادام فى اختلاف فى الاراء يبقى كل انسان حر يتمسك براى معين وينفذه ويتبعه ومع الاخذ فى الاعتبار ان الاراء التانية صحيحة برضو مش رايه بس هو اللى يكسب يعنى
بخصوص رايى الشخصى فى النقاب ده شئ جميل وطيب لو الانسانة عايزة تلبسه والله جزاها الله خيرا وبارك الله فيها هتواجه عقبات كتير فى حياتها بس ربنا ان شاء الله يجعل ده كله فى ميزان حسناتها
بس مش هنعملها بتميز علشان هى منتقبة بمعنى لا هنتساهل ونسيبهم مثلا لو فى اماكن طلبوا كشف وجها علشان يتاكدوا مثلا منها وده لو كان الضرورة تستدعى ذلك ولا اننا نخنقهم كل شوية وتحجج بحجج فاضية ونعمل ضدهم تصرفات عنصرية علشان هما اتلزموا
واللى مش عايزة تلبسه والله ده برضو بحريتها هى اخذت براى تانى خالص ولكن مش معنى كده انها تنتقد اللى لبست النقاب لا
انا عن نفسى مش منتقبة وافتكر الفكرة مش بعيدة عنى بس مش عندى الجراءة اخد الخطوةولا السبب المقنع اللى يخلينى البسه لكن فى نفس الوقت مش ضد اى واحدة عايزة تلبسه ومش مسببين لى ازمة يعنى لما بشوفهم فى شارع ولا بتخض منهم ولا الحجج الفارغة اللى الناس بتتحجج بيها علشان تكرهم فى النقاب
اما بالنسبة للاخت مها انا قريت التدوينة بتاعتها وهى بصراحة كانت بتتكلم عن القرارات التعسفية اللى فرضت على بعض النساء اللى فى مهن معينة انها يرفض تمام لبس نقاب فيها زى الممرضة مع انى انا اعرف دكاترة لبسه نقاب يعنى مفيش قانون صريح بكده
وده حق من حققهم ليه بقى نعمل قوانين تحد من حريتهم
اشمعنا البنات تتدور على حل شعرها فى لبسها ونقول دى حرية شخصية ولما واحدة عايزة تلتزم نتتقدها

Unknown يقول...

معلش انا حرد على بعض الأراء
مش كلها
لأن فيه اراء ردى عليها حيكون فى تدوينة خاصة برأيى كاملاً ان شاء الله فى النقاب

Unknown يقول...

Ramy Wasel
هذا ليس رأى امام الغزالى فقط
ولكن اجتمع الفقهاء فى مصر على ان النقاب ليس سنه
واذا كانت المرأه فى الصلاه امام الله لا تلبس النقاب
فلماذا تلبسه امام الناس
والحالتين الذين من الممكن قبول الحجاب فيهما
اما ان تكون المرأه جميله جدا وتخشى الفتنه
او وحشه جا وتخشى تعليق النس
ومن تريدان تحتجب
فالاحسن ان تحتجب فى بيتها
لان الان الحجاب م الممكن ان يستغل بشك سئ
من المجرمين والارهابين
وضره اكثر من نفعه
والحجاب هوالسنه
وليس النقاب
الفرق كبييييير
--------
حجاب ايه اللى سنة يا استاذ رامى
انا مقتنع ان الحجاب فرض
اعتقد انك تقصد ان من تريد ان تتنقب
تنتقب فى البيت

و ان النقاب من الممكن استغلاله فى شىء خطر

الحجاب فرض كما انا اؤمن
و ليس سنة!!!

و بعدين انا مش بناقش الحجاب دلوقتى
انا بناقش النقاب

maha zein يقول...

بدراوي

انا قرأت وبحضر ردي طبعا هيكون رد صغنن
عقبال بقه ي ما قلتلك اقدر افتح مدونتي واكتب بوست بردو يعني فيه رد علي راى الغزالي

استناني كده خمسة وجاية

ردك رائع علي استاذ رامي

استني بقه عشان انت فرحتني بجد

Soul.o0o.Whisper يقول...

السلام عليكم و رحمة الله و بركاته

أولا بأسجل بس حضور

و بأشكرك على فتح هذا الباب للحوار بينك و بين مها

و أتمنى لو تسمح لى بالمشاركة

أنا قرأت البوست و طبعا قرأت الصفحات اللى وضعتها من الكتاب

و حقيقى الشيخ الغزالى شيخ جليل
و من الناس اللى حقيقى بأعتز بعلمهم
ربنا يعلمنا جميعا يارب
و يغفر له و يرحمه


طبعا دا مش رد
دا تعليق مبدئى
و لى عودة إن شاء الله



دمت بود

maha zein يقول...

هقول بقه رأى صغنن وطويل في ذات الوقت يا بدراوي

اولا يا سيدي
انا قلت ان الغزالي و الالباني قالوا انه
سنة
وهنا بقه يبقه انا اخطأت لان من خلال ما كتبت بعض من كلام الغزالي فهو مقالش عليه سنة
يبقه اولا بعتذر عن معلومة خاطئة

ثانيا بقه نيجي للأجزاء اللى مست النقاب في الاوراق اللى نشرتها
اولا انا كده بردو مقرتش ادلة الغزالي في النقاب
يعني ايه ادلته في انه مش فضيلة حتي

لو انت تعرف مكانهم في الكتاب يا ريت تنشرهم ذي ما نشرت الاوراق دي
احسن ما احمل الكتاب واعد ادور واصلا انت عارف ان ظروفي مش هتسمح دلوقت

انا بقه عوزة اعرف ادلته عشان اشوف استدل بأيه من القرأن و السنة

طبعا مش بحاول اتفلسف واقول اني هشوف الغزالي قال ايه وانقد والكلام ده

لا
انا مقتنعة بحاجة

يمكن اقتنعت بيها بعد كده

محمد حسان كان سبب اقتناعي بيها

قال في فتواه علي النقاب

قال ان موضوع النقاب موضوع اختلف العلماء حوله
انقسموا ثلاث اقسام

قسم قال ان النقاب فرض
وهما الاكثرية
والفريق ده ليه حججه الواضحة الصريحة

وفريق قال ان النقاب سنة
وبردو ليه ادلته الواضحة الصريحة
و بعضهم قال انه فضيلة
وليهم ادلتهم في كده

هو قال فتواه في الرد علي سؤال عن اذاي الألباني قال ان النقاب فضيلة
فقال اولا انه يشهد الله ان النقاب فرض وانه سوف يحاسب امام الله علي فتواه هذه ثم
رد وقال
شيخنا الفاضل لا نستطيع ان نقلل من قيمة فتواه ابدا

الاصل في اي فتوي
هو اما ان يكون هناك نص صريح من القرأن و السنة
او ان يكون هناك نصوص تحتاج الى تفسير

ومعني اختلاف العلماء في امر ما
ده بيعني ان العلماء اختلفوا في تفسيرهم للأدلة او الايات

مش معني ان الالبلاني فسر الادلة بشكل هو فهمه بيه يبقه هو غلط
لا
هو ليه ادلته المبنية علي ادراكه وفهمه للايات
اللى ممكن تكون مقنعة لغيره وممكن تكون لا

وذكر ان الالباني رغم رأيه بأن النقاب مش فرض
الا انه قالها بأنه ملبس اهل بيته كلهم النقاب
وقال ان النقاب يصبح فرض في زمن الفتن
يعني في الزمن اللى تخرج فيه المرأة من بيتها فلا تامن الفتنة
يعني متأمنش ان حد يبصلها نظرة بشهوة او نظرة سيئة


ورجع يأكد
ان كل فريق له ادلته
وكل فريق له متبعين
ومينفعش نقلل من فتوا افتا بها اي شيخ
لكن في نفس الوقت

كل فريق له ادلته
وانا أقرأ الاراء
واذا اقتنعت براى احدهم اخذ به
وطبيعي طالما اخذت برأى ما اكيد هكون من المدافعين عنه
وادلة الفريق التاني مش هاخد بيها

وخاصة لما اكون اخترت الأختيار الصعب و الاقوي واللى هو اني اخترت اصعب رأى وهو اني البس النقاب

يعني عارف
انا لبست النقاب مثلا اهه
ده اصعب خطوة
واصعب راى
من رحمة ربنا بيا
ولاني المفروض ازيد في الدين و مقلش عمري ما هقتنع بان النقاب فضيلة
ولا عمري هفكر اقلعه مثلا

لكن مثلا لو شخص شايف ان النقاب فضيلة
وجيت قلتله لا النقاب فرض ولازم تلبسه
هو طبيعي هيعافر شوية ويقولي لا
ويدافع عن ادلته
ويحاول يثبت
لان معني انه يقتنع برأى معنى ده انه هيقتنع بانه لازم يلبس النقاب
ومعني انه يلبس النقاب انه هياخد خطوة صعبة اوي
هو ممكن يخاف يقتنع بأدلة وجوبه لانه خايف يكون مضطر ياخد الخطوة الصعبة بالنسبة له دي

لكن نرجع ونقول
ان الشخص اللى يقول ان النقاب حرام او انه عادة ومش عبادة
ده انسان بيقع في الخطأ

ومش هطول في النقطة دي
ومش هشرحها هنا
لان النقاب عمره ما يكون عادة او حرام

وخاصة ان زوجات الرسول صلي الله عليه وسلم كانوا منتقبات بأدلة صريحة وواضحة ومنها احاديث صحيحة

خلي التفاصيل تبقه في البوست اللى هبقه اكتبه

اجي بقه لجزء تاني يا بدراوي

الجزء الخاص بالغزالي

واللى قال فيه

"ملابس البداوة إمارة علي التقوي...وعدم البصر لا غض البصر اسا العلاقة بين الجنسين...
هو صراحة مقالش انا اقصد النقاب بكلامي ها
ممكن قصد الجلابية
او الازار
او الشال
او اي حاجة خاصة بلبس البدو
او حتي النقاب بتاع البدو
يعني مذكرش هنا انه بيقصد النقاب
عشان كده بقولك لو تقدر تعرض ادلته ورأيه كاملا عشان اقدر افهم بس الصورة كاملة
يعني دي نقطة

maha zein يقول...

تاني نقطة

الجزء الخاص بانه قال ان وجه المراة وصوتها ليس بعورة وان مفيش في كتب الله وسنته الكلام ده

فأحب ارد هنا بحاجة
هو اولا الرسول صلي الله عليه وسلم في حديثه الصحيح
قوله رسول الله عليه سولم في الحديث الذي رواه الترمذي" المرأة عورة فإذا خرجت استشرفها الشيطان"
وفي هذا الحديث العظيم لم يستثن صلي الله عليه وسلم منها شيئا بل قال انها عورة

و الرسول هنا يقصد ان المرأة بتفتن الرجال وده طبيعي
وان الشيطان يستخدم جماله المراة وحب الرجال لها ليفتنهم بها
او يوقع بها هي في المعصية
بس الرسول لم يقصد ان المراة لا تخرج
ولا تتحدث
لكنه يقصد ان يحذرها ويحذر الرجال
يقول لها احذري فانت فتنة
ولو خرجتي كوني حذرة واتقي الله فيما تفعلين لان الشيطان يستغل حب الرجال لكي ليوقعهم في المعصية

اما بعض الناس اللى تقولك ان صوت المرأة عورة
فهذا حديث ضعيف
وصوت المراة ليس عورة
النص صريح بأن المراة لا تخضع بالقول
يعني مترققش صوتها ولا تدلع ولا تلينه
بس يعني
لكن النساء علي ايام الرسول صلي الله عليه وسلم
كانت تتحدث عادي جدا


وهذكرلك بقه بخصوص ان وجه المراة عورة ولا لا في الجزء القادم في تفريقي لأراء الائمة الاربعة


فالغزالي يقول

ان في ناس فسرت الايات علي هواها
وهذه التفاسير لم ياتى بها احد من الائمة الاربعة
واحب هنا اورد اقوال الائمة الاربعة
لاني وجد اختلافا في هذا القول مع ارائهم
عشان كده طلبت منك تضع ادلة الغزالي عشان اقدر اشوف فين نقطة الاختلاف بالظبط

maha zein يقول...

هقول رأى الائمة الاربعة
ذي ما ورد في كتاب ففروا اللى الله، جمع وترتيب أبي ذر القلموني، دار التقوى للنشر و التوزيع، 2000، ص 118

مذهب المالكية: أنه لا يجوز النظر إلى شىء من بدن المرأة لا الى الوجه و لا الى الكفين و لا الى غيرهما، ولا يجوز للمراة إبداء الوجه ولا الكفين للأجانب، وقد صرح ابن المنير المالكي بذلك فقال إن كل بدن الحرة لا يحل لغير الزوج، و المحرم النظر إلى شىء منها إلا للضرورة كالمعالجة و تحمل الشهادة.


مذهب الشافعية: انه لا يجوز النظر إلى شىء من بدن المرأة لا الوجه و لا الكفين ولا يجوز للمرأة إبداء شىء من بدنها للأجانب إلا للضرورة
قال الامام النووي: يحرم نظر فحل بالغ إلى عورة حرة اجنبية، وكذا إلى وجهها و كفيها عند خوف الفتنة، وكذا عند الامن علي الصحيح

مذهب الحنابلة: انه لا يجوز النظر الى شىء من بدن المراة لا الوجه و لا الكفين ولا يجوز للمرأة ابداء شىء من بدنها للاجانب الا للضرورة
قال احمد ظفرها عورة، فإذا خرجت فلا تبين شىء ولا خفيها فإنه يصف القدم و أحب أن تجعل لكمها زرا عند يدها

مذهب الحنفية: انه يجوز للمرأة كشف وجهها و كفيها عند أمن الفتنة
وجاء فيه كذلك وتمنع المرأة الشابة من كشف الوجه بين الرجال لا لانه عورة بل لخوف الفتنة

فأصل مذهب الامام ابي حنيفة جواز كشف المراة وجهها في الحالات العامة على وجود المجتمع المسلم العفيف في رجاله ونسائه. اما إذا تغيرت الحالة العامة و لم يؤمن فيها من الفتنة فيجب علي المراة ان تستر جميع بدنها ووجهها وكفيها سدا لذرائع الفساد و عوارض الفتن

فحكم وجه المراة وكفيها في المذهب الحنفي في مثل ايامنا هذه هو كحكمه في باقي المذاهب الاربعة وهو حرمة كشف المراة وجهها لغير ضرورة و الله اعلم



ده كان رأى الائمة الاربعة موثقة في الكتاب بكل المراجع الخاصة بها

الكلام واضح وصريح جدا

والله اللى تقدر تاخد خطوة النقاب بهدا ربنا هتلاقي ربنا فتح قلبها لأدلة الفرضية

ولو هي مش قادرة تاخد الخطوة
هتلاقيها انها بتتشبث برأى سنية او فضيلة النقاب

انا كنت واحدة من الناس دول
كنت بحاول اقنع نفسي بانه فضل او سنه
عشان مكنش عندي الدافع اني البسه
واول ما دعيت ربنا كتير
وبقه جوايا الدافع وهو هدا ربنا
لقيتني قلبي بيتفتح لانه فرض

وخشيت يوم يحاسبني الله ان اكون مقصره وانا بخماري او بحجابي

يوم القيامة بجد مش وقت مراهنات
ولا وقت ان اللى كنت مقتنعة بيه يطلع صح ولا لا

انا اعمل اقصا حاجة وربنا سعاتها يرحمني برحمته

وفيما يخص النقاب
النقاب مش غاية ابدا
ولا عمر المظهر كان غاية
بل المظهر مع الباطن

وصدقني ما يحمي اللب الا القشرة

وعمر ما الانسان يكون من جوة كويس
الا لما برة يكون كويس

والعكس بردو


وبخصوص الناس اللى بتقول بان المنتقبة حرة بس لو الامن قالها انه عاوز يتاكد منها في اي مكان

من واجبها انها تكشف نقابها لكن تكشفه لواحدة ست ذيها
عشان اللى عاوز يتأكد ويطمن منها يطمن
ولا ضرر ولا ضرار
و المنتقبة لازم تكون مرنة
وتستجيب لواقع الحياه
ولو علي مشاكل النقاب واللى يقولوا عليه خطر

فالمجتمعات العربية
ذي السعودية واليمن
سواء لابسين النقاب لانه عادة ومن غير تدين او سواء لابسينه تدين
الا ان الحياه هناك حلوة وماشية ومحدش بيطلع يقول قلعوا الستات النقبة لان الحرامية كتروا ولا لان المرضي بيشتكوا

لا خالص

حاولت اكتب راى بسيط الى حين اكتب بوست ان شاء الله يا بدراوي وهبقه اقولك قبلها

ادعيلي بقه ذي ما قلتلك

وبجد رأيك علي رامي عجبني

احنا بنتكلم عن الحجاب ولا النقاب هنا

انا يا جدع دماغي لفت

يلا سلام عليكم

Unknown يقول...

Maha zein
----------
طب ممكن حضرتك تنتظرى لبكره
حنشر الجزء الثانى
ان شاء الله
حوالى 11 بليل
و تشوفيه

بس عايز اقولك هو كلام الشيخ الغزالى
فكرى اكثر منه بحث بأسانيد و ادلة
يعنى قصدى ده الكتاب اللى قريت فيه و لقيت بيقول ان النقاب مش فرض و لا ليه علاقة بالإسلام
و أعتقد انه لو ليه كتب تانية بأسانيد بتقول ان النقاب فرض كما ذكرتى من الأئمة الأربعة
مكانش حيقول مثلاً و انا اسف
ارجو الكلام ميضايقكيش
مكنش حيقول ان النقاب زى الشبح
هو قال كدة
انا اسف

غير معرف يقول...

كده كنت عايز تحرمنا من التدوينه دى
احييك يا بدراوى جهد موفق تشكر عليه
وانا قلت رايي قبل كده......بس راي الفقيه اولى ان يتبع.....ولازم اقرا الكتاب كله
المهم انا شايفه ان فى مصالح ما ينفعش ان المرأه تلبس النقاب زي المستشفيات....وانا بشوف ان المريض لازم يشوف الطبيبه او الممرضه اللي امامه.....علشان منع الخلط والنصب اللي سهل جدا.....ولكن لو قاعده فى البيت او شغلها مفهوش اختلاط واداء خدمه للناس.....تلبسه لو عايزه من باب الحريه او التمسك بالعادات او كما يقال هو فضل وليس فرض
ورحم الله الامام الغزالى
اخدت بالك من اداء الخدمه العسكريه وثنيه....ضحكت ضحك يا بنى....اتارى فى ناس مخها مقفول من زمااااااااااااااااان
دمت بخير.....تقبل مرورى

maha zein يقول...

بدراوي

انت انسان محترم علي فكرة
بتتأسف ليه
انت بتنقل راى الشيخ اللى انت بتقرأ ليه
وهل يعني هو قال عليا عفريت يبقه انا عفريت
لا والله انا منتقبة كل البنات لما بتشوفني
بتعجب بنقابي
وبتقولي انتي مظهرك حلو
ومفصلة فين
وبيبقوا عوزين يصاحبوني كمان

مش بس كده
3 من اصحابي لبسوا النقاب
والباقي بيفكر


مش شرط ان الغزالي قال كده يبقه هو كده

انا والله ما بزعل

عارف
انا مهتمة نكمل باقي المواضيع جدا

لاني اتوسم فيك خير

وده بان جدا من ردك علي رامي


اصل ردك ضحكني اوي وتخيلت معالم وشك و انت بتتكلم
مع اني معرفكش
يلا سلام عليكم

شد حيلك وهكون في انتظار الجديد
وهحاول افتح المدونة تاعتي قريا بقه

لاني بجد مستمتعة

Ramy Wasel يقول...

اخى العزيز
انا اقصد الاحتجاب فى البيت
وليس الحجاب
وانا اعرف انك تقصد النقاب
وليس الحجاب
وبالطبع الحجاب فرض
ولكن انا اقصد الاحتجاب بالبيت
وليس الحجاب الشرعى

Unknown يقول...

Ramy wasel
------------
معلش اصلى استغربت اووى
كلام حضرتك
بس ياريت توضح بالضبط
لأن محدش حيفهم خالص
موضوع الحجاب على انه احتجاب خالص
------
مع تحياتى

غير معرف يقول...

السلام عليكم ورحمة الله وبركاته
**************************سما سيف
في الاول احب اوجه شكري وتشجيعي للاخت مها زين صحبتي ورفيقتي في الجنة باذن الله وهي اللي دعتني ازور المناظرة الطيبة هنا يااخ بدراوي جزاك وجزاها عنا خير الجزاء ربنا يوسع مداركنا ويعلمنا ما ينفعنا وينفعنا بما علمنا احب اقولك يامها الله عليكي ربنا يبارك فيكي كتبتي فأفضتي فابدعتي فوفقتي باذن الله ربنا يزيدك من فضله وعلمه ويثبت الايمان في قلبك....
وبشكر الاستاذ بدراوي لنقله لرأي الغزالي
بس ليا تعليق لفت انظاري للاخ
ramy waselبرغم ان حضرتك رديت عليه بس ليه بتقارنوا صلاة المرأة والحج والعمرة يجب ان تكشف وجهها اما بارئها خالقها عز وجل لكن تستره عن البشر طبعا وهل نعامل الخلق كما نعامل الخالق عز وجل طبعا لا وهل نضمن الفتنة في عصر التحرشات وهل نضمن الا يعود الرجل او الشاب او حتي الصبي بنظره لاي فتاه بمجرد انه شعر انها فتاة الن يلتفت لها مرة واثنان وربما علق تعليق مش ظريف عليها حتي لو كنت محتشمة ولاداعي لان يدعي احد ان المحتشمة مبتتعاكسش الرجال والصبية الغير محترمين الذين لايخافون الله لايفرقون بين المحتشمة والغير محتشمة يكفيهم انها امراة او انثي حتي لو فرخة...
وقاية بقي للبنت الحلوة ولا الوحشة ولا البنت في حد ذاتها كأنثي ان تستر نفسها عن اعين الذكور ولا تتسبب في فتنة احد فربما تتخيل ان فتاه جميلة جدا غيرك كثيرين يرونها عادية للغاية ساعتها بقي تلبس النقاب في شوارع اه وشوارع لا نحن في عصر الفتن ...فلنسئل الله ان يتوفانا مسلمين غير فاتنين ولا مفتونين
وقال ربنا عز وجل قل للمؤمنين يغضوا من ابصارهم ...وقل للمؤمنات يغضضن من ابصارهن...يعني البنت وهي مستخبية عن اعين الذكور مافيهاش ضرر بالعكس ديه بتطيع ربنا وبتساعد الشباب يغضوا بصرهم مش هيلاقوا حاجة يبصولوها ولا ماكياج بقي ولا سفور ولا تبرج وغيره وغيره ربنا يعافينا ويعفو عنا نسئل الله الستر والهدايه..
اللهم رب جبريل واسرافيل وميكائيل اهدني للحق فيما اختلف فيه كثير من خلقك اهدني لصراطك المستقيم:)

مع تحياتي ودعواتي اختكم سما سيف

استمروا...........

Unknown يقول...

سما سيف
-----
شكراً لتعليق حضرتك
و كويس انك اوضحتى
ان التحرش لا يفرق بين المحتشمة و غير المحتشمة
بس اللى بيغيظنى ان الأخوات اللى بيريدوا عدم الإحتشام بيتخذوا ذلك حجة
و يقولون اذن الإحتشام لم يقى الأنثى
اذن لا لزوم
له و هو قول خاطىء
لأن حضرتك بتعاملى ربنا
و بترتدى لبس محتشم عشان ربنا امرك بكدة
مش عشان وقاية من تحرش
----
عندى اعتراض على فكرة و هى مستخبية عن اعين الذكور
لأن ربنا قال يغضوا و يغضضن
يعنى لو وسيلة البنت ان الراجل يغض بصره
انها تستخبى كدة
يبقى الصراحة المعاملة بالمثل و هى ان يستخبى الرجل لكى يقى الفتيات من الفتنة
لان المعاملة بالمثل
و ربنا بيحاسب كل انسان بالعدل
سواء ذكر او انثى
مع اعترافى ان فتنة البنت للولد اكثر من الفتنة بالعكس
---
مع تحياتى

Ramy Wasel يقول...

الاخت العزيزه سما سيف
من يريد ان يترحش باى فتاه
فلا يفرق معه محتشمه او لا
والقرأن وضح الزى الشرعى للمرأه
وبأن تكشف الكف واليدين
وهذا فى الصلاه
او فى الحياه العاديه
اما النقاب فهو عاده قبليه
وليس فى الدين
والمهم ان تحتشم المرأه
ولا تنظر الى رده الفعل من الناس
فالانسان المحترم لن يلتفت للفتاه او يتحرش بها
سواء كانت متشمه او لا
اما غير المحترم
لن يتركها حتى ولو كانت منقبه

.............

والى اخى العزيز بدراوى
انا اقصد انه من تريد ان تتنقب فمن الاحسن ان تحتجب فى البيت
اى لا تخرج الى للضروره
ونحن اصبحنا فى عصر يستغل فيه النقاب اسوء استغلال
فكيف مثلا فى لجنه مروريه وطلب الظابط التأكد من شخصيه صاحبه الرخصه
او فى المصالح الحكوميه
وكما قلت
ضرره اكثر من نفعه
والنقاب ليس فى الدين من شئ
ولا حتى عاده مصريه
فما الفائده منه

هذا ما اقصده

اما الحجاب فهو الزى الشرعى وفرض على كل امرأه
وهذا ليس له علاقه بالنقاب
وانا اسف اذا فهم كلامى خطأ من قبل
وكنت اقصد الاحتجاب وليس الحجاب

وشكرا الى اخى العزيز بدراوى لطرحه هذا الموضوع المهم

مهندس مصري بيحب مصر يقول...

هو انا تعليقي راح فين ؟

طيب كلمة على جنب للأخت مها زين

بلاش كتاب ففروا إلى الله

الرأي اللي هو ذاكره للأئمة الاربعة لم أجده في مقررات الفقه للمذاهب الأربعة في الإعدادي و الثانوي الأزهري القديم
قبل ما طنطاوي يعدل المناهج و يدرس الفقه الميسر بتاعه و يلغي تدريس مذاهب الفقه الاربعة

المهم ياريت لو عندك رأي الأئمة الأربعة من كتبهم الفقهية نفسها ياريت تورديه
او من كتب شرح مذاهبهم نفسها

و انا حأدور من ناحيتي برضه
:)
بس أنا سألت بعض الشيوخ الأزهريين و بعضهم مالكي و بعضهم شافعي و نفوا إن راي مذهبهم يكون كده

ستيتة يقول...

بدراوي

انا علقت في البوست ده سابقا

الله هو احنا فينا من الحركات دي
طلع الرد بالتي هي احسن

استمتعت جدا بالحوار الدائر بينك وبين الأخت مها والأخت سما واللي في الآخر لا ها يغير وجهة نظر حد ولا ها يميل طرف للتاني

ببساطة شديدة لكل وجهة نظر وجيهة جدا

وبعدين مينفعش نجيب آراء المذاهب الفقهية الأربعة من كتاب لأبي ذر القلموني

المذاهب ناخدها من أهل علمها

وزي ما أحنا شايفين

ابو ذر "على فكرة ده راجل معاصر مش من زمان يعني" سلفي .. يبقى رأي السلفية والوهابية صح

الشيخ الغزالي راجل أزهري عالم ومجدد ومش وهابي فيطلع رأي ويبقى صح

اهم ما في الموضوع ان كلمة سلفية دي مش سبه ولا اتهام ولا خاصة بفئة من المسلمين دون الأخرى
كل من يحب سيدنا الرسول والسلف الصالح ويجعلهم قدوته ووجهته هو سلفي ومش لازم ياخد شكل معين ويقول لعموم المسلمين "انتم" ولما يتكلم على من هم بنفس المظهر زيه يقول "نحن" لأن دي تقسيمات جابت أجل الأمة

تحياتي