الجمعة، مايو 08، 2009

تاج البدراوية



التاج ده جالى من الصديق حسام غانم و ساعتها مكنتش فاهم يعنى ايه تاج فى المدونات ، لأنى التاج ده مصطلح ليه علاقة بالفيس بوك ، و لكن لما لقيت ناس كثير بتعمل الموضوع ده قررت اعمل انا كمان تاج

اسمك ؟

أحمد بدراوى

المشهور بيه وسط أصحابك ؟
بدراوى او بدرو

سنك ؟

24 الطبيعى

17 الشكلى

الحقيقى لسة انا متولدتش اصلاً

او بمعنى اصح : اذا كانت الأعمار تُقاس بالسعادة فإكتبوا على قبرى مات قبل أن يولد .

اسم مدونتك ؟

طعم البيوت ده الإسم اللى اخترته منذ معرفتى بإسم البوم محمد منير ، و كان ليها اسم قديم حاضر يا زهر

و هى أغنية أخرى لمحمد منير أيضاً

مجال دراستك ؟

إعلام

الصورة الرمزية لمدونتك بتعبر عن ايه ؟

واحد بيقرا جرايد كثير و ده انا ، بس الفترة الأخيرة مليت من قراية الجرايد و حسيت انى المفروض انوع فى قراياتى و ارجع اقرا كتب زى زمان

هل فكرت فى إغلاق المدونة ؟ والسبب ؟

اه فكرت أخرها امبارح ، و السبب كنت مضايق قوى.

ايه رد فعلك لو حد قل أدبه عليك في التعليق ؟

يعنى حشيل تعليقه و خلاص مش حعمل حاجة تانية .

أسوأ مدونة ؟

المدونات اللى بتدعو الى اخلاقيات و سلوكيات غير محترمة ، او المدونات اللى تصميم خلفيتها اسود !

مع كامل احترامى لأى حد عامل كدة فى مدونته ، بس انا مش بتكلم على المضمون فى الناحية ديه

انا بتكلم على التصميم لان انا بيبقى متعب ليا اوووى قراية شىء خلفيته سودة ، لكن لو مدونة تستاهل بتغاضى عن ده

و بتابعها على سبيل المثال العنبر اللى فاتحه الأخ أحمد سعيد .

هيحصل ايه للإيميل بتاعك بعد ما تموت ؟

حيموت هو راخر ، يارب حسن الخاتمة

أديت الباس وورد لحد قبل كده ... ؟
لأ

السفر بالنسبة لك ؟

تجربة ظريفة ، و لكنها محفوفة بالمخاطر ، و تجربة كثيراً ما احتاجها لما اكون مضايق ، لكن بصفة عامة انا مش بتاع خروجات و لا فسح .

المود بتاعك ؟

مخنوق و مضايق و بينهما بعض الضحك و السخرية اللى تدارى ضيقى .

بتعمل ايه فى وقت فراغك ؟

قول بتعمل ايه فى وقت مش فراغك !! ، لأنى مع الأسف بعانى من الفراغ الى الأن لأنى لسة ملقتش شغل ، بس باخذ كورسات تفيدينى و تعلى فرصى فى الشغل .

الأكلة المفضلة ؟

مكرونة فرن (البشاميل )

الرقاق اللى هو cousin أو ابن عم خالة المكرونة البشاميل

محشى ورق العنب – المحشى ورق العنب هو المحشى المعتمد لدى هو البريمو و الباقى ترسو

اللحمة المسلوقة مع الرز اللى بيصارع الغرق فى الشوربة و الاقيه بيكلمنى يقولى ابوس ايدك طلعنى قبل ما اغرق!

الكمونية ، البسلة ، صينية البطاطس ، الرز بالخلطة ،الفراخ البانيه ، كشرى مصر ، الحواوشى

البيتزا ، الفطائر بأنواعها

الرز بلبن ، الكنافة ، الكاستر ، الكريم كراميل ، الشيكولاتات ، البسبوسة

----

ملحوظة انا رفيع مش تخين خالص :-(

الصفات التى ورثتها من والدك ؟

العصبية .

الصفات التى ورثتها عن والدتك ؟

انى طيب بهبل ، القراءة .

أكتر ست حاجات بتكرهها ؟

الظلم ، الحسد ، انى محدش يبقى فاهمنى ، الوحدة ، الإدمان لأى شىء – لأنى بعانى من ده

علم التنمية البشرية

عشان بحسه نصب فى نصب ، و مش بعترف فيه

أكتر ست حاجات بتحبها ؟

الصداقة

الإخلاص

الحب

المودة و العواطف

الحنية

الدموع

الحزن

شخصيتك نوعها ايه ؟

شخصية بلا ملامح ، لسة معرفتش نفسى خالص ، شخصية غريبة كثير ، بتحب تبقى لوحدها .

لماذا دخلت عالم التدوين ؟
عشان عندى شىء اقوله ، و لأنى من صغرى بحب الكتابة اووووى ، كنت اشطر مادة فيها مواضيع التعبير ، كمان عشان لقيتها موضة بقى و حبيت اجربها لأنى كنت بكتب و مش بلاقى حد يقرا كلامى او بمعنى اصح مكنتش بكتب كثير الا ايام الدراسة و المدرسة و بس ، و النت و الفيس بوك نمولى موهبتى كثيييير .

أجمل كلمة قيلت فى وصف مدونتك ؟

مش عارف .

أهمية التعليق بالنسبه لك ؟

شىء مهم جداً ، و من غيره مقدرش انى اكتب اى شىء ، التعليق بالنسبة لى بيحسسنى ان فيه ناس بتشاركنى ما اكتبه ، ناس عندها استعداد انها تقدرنى ، بتدينى امل شوية فى اى شىء ، لأنى لو ملقتش تعليقات و بقيت بكتب لنفسى و بس ممكن اطق اموت ابقى كأنى بكلم الحيطان

:-(

أحسن بوست كتبته وليه ؟ ضع اللينك

أحسن بوستات اللى عن استاذ مجدى مهنا الله يرحمه

و كمان البوستات ديه

أنا و الفيس بوك

الله يرحمها أيام

سامحينى

أضيئوا الشموع

عيد الرياضة

أفضل بوست قرأته ؟وأفضل مدونة؟

أعترف و أقر - مايكل

سرداب الحياة – Appy

النسيان – فتاة من الصعيد

كنا و أصبحنا – أحمد الصباغ

جميعنا حواديت – دعاء مواجهات

هو فيه تدوينة عجبتنى جداً عند الأخت العزيزة بسمة عبد الباسط

دورت عليها عندها ملقتهاش كانت عن النهار – ان شاء الله اقولها تحطها فى المدونة لانى قريتها على الفيس بوك

بس هيا ليها تدوينات تانية جميلة منهم ديه

لا يا صديقتى


أفضل مدونة ، معظم المدونات اللى بقراها

تستحق انها تتقرا

بس كإعلان غير مدفوع الأجر

انصحكوا بجد تشوفوا مدونة محدش بيموت ناقص حلم

بجد مدونة ممتازة و مختلفة ،

و مدونة فوق فى السما صاحبها

شاعر موهوب و ان شاء الله يبقى ليه مستقبل

هو جديد فى التدوين

و اتمنى انكوا تتابعوا اشعاره .

مع كامل تقديرى لكل اصدقائى المدونين .

الإنترنت بالنسبة لك ايه ؟

إدمان نفسى اقدر أتخلص منه

تمرر التاج لمين ؟

مايكل

محدش بيموت ناقص حلم

بلاش فضايح

مواطن مصرى

مونى الشريف

هناك 20 تعليقًا:

مواطن مصري يقول...

انا اسمي جة في التاج ان ان انننن

بلاش فضايح يقول...

انا اتفاجئت والله
واتحرجت جدا
شكرا يا احمد
بس ليه ليه ليه
اعمل انا ايه دلوقت
ايه اللخبطة اللى انا فيها دى

شكرا يا احمد

بسمه عبدالباسط يقول...

يا خبر يا أحمد بجد مش عارفة أقول إيه لما تذكر أسم تدوينتين ليا ده شرف كبير ليا يا فندم وهدور على الموضوع بتاع النهار وهنشره على المدونة أنت تؤمر يا فندم

:))

Unknown يقول...

مبروك عليك التاج يا سيدي
و ادينا اتعرفنا عليك اكتر
بس ليا عتاب عليك
كنت عاوزك تدبس ناس اكتر :D
بس كفاية دبست مايكل هههههه

حسام غانم يقول...

الله عليك يا بدراوي

شكرا على قبول التاج

وربنا يوفقك يا سيدي وتلاقي شغل

بس حلو موضوع الدورات اللي بتاخدها ده

أحسن ما تقعد عالقهوة :)

Unknown يقول...

لالالالالالالالالالالالالالالالالالا
مليش في التاج ده
انا شخصيتي زيك الي ابعد مدي
بس كده انا مدبسشي
و حالا هضيفك في الرول

Unknown يقول...

بس كإعلان غير مدفوع الأجر


ماشى يا بدراوى


كده يبقى انا عازمك
على ورق عنب مع فته

عند.....((بلبع.... فى الدور التانى))لما اجى اسكندريه فى الصيف ان شا الله

تانى حاجه

اجاوب انا على السؤال اللى الناس
بتقول ايه على مدونتك

الناس بتقول

(((طعم البيوت)))

دمت بخير

مواطن مصري يقول...

مكرونة فرن (البشاميل )

الرقاق اللى هو cousin أو ابن عم خالة المكرونة البشاميل

محشى ورق العنب – المحشى ورق العنب هو المحشى المعتمد لدى هو البريمو و الباقى ترسو

اللحمة المسلوقة مع الرز اللى بيصارع الغرق فى الشوربة و الاقيه بيكلمنى يقولى ابوس ايدك طلعنى قبل ما اغرق!

الكمونية ، البسلة ، صينية البطاطس ، الرز بالخلطة ،الفراخ البانيه ، كشرى مصر ، الحواوشى

البيتزا ، الفطائر بأنواعها

الرز بلبن ، الكنافة ، الكاستر ، الكريم كراميل ، الشيكولاتات ، البسبوسة


طلعت زي في الاكل بس مش بحب البسلة

غير معرف يقول...

بجد شكرا....والله احرجتنى ...موش عارفه اقول ايه؟
طيب مريسى...ثانك يو....وبعدين دمك خفيف موت يا احمد.....بس ليه بتحب الحزن والدموع
دمت بخير.....تقبل مرورى

MǿиY El-Shreef يقول...

ايه كل ده اكل يابني :D

ع فكره انا جاوبت ع التاج ده قبل كده :P

سلام

همس الاحباب يقول...

الف مبروك التاج
وجميلة اجابتك
صادقة وعفوية جدا
دمت بكل ود

بسمـــة مســـــلّم يقول...

السلام عليكم اخى العزيز يسعدنى المرور بجد شخصيتك جميلة لانك لسه مصر على قراءة الكتب والجرايد كل يوم حتى بعد ما اكتشفت الواقع ياريت كلنا نبقى زيك تحياتى لك واعلم ان ما قرأته سيظل انيسك الى الموت تحياتى لك

micheal يقول...

يا باشا..الله يخليك وربنا يوفقك..صدقني أنت إنسان محترم وده لمسته من أول قعدة لينا ع البورصة..لو عاوز مني أي نصيحة في مواضيع الانترفيو والشغل..أؤمر بس
بخصوص التاج..أنا مبطل تاجات من زمان
:)
تحياتي

maha zein يقول...

تاج بسيط
وبيتهيقلي انت اخر واحد حله
لان بيتهيقلي بردو ان كل المدونين حلوه من يجي خماشر سنة
كل الاكل اللى كرته هو اكلي المفضل جدا وانا بردو رفيعة ومش تخينة
لاني باكل منه عينات

اشكرك علي تعليقك عندي واتمني طبعا التواصل لان اسلوبك المهذب اجبرني اسمعك
وانا رديت علي حضرتك في الشات بوكس

A. M. El-Saeed يقول...

ربنا يخليك يا بدراوي
والله دي إشادة أعتز بيها
خصوصاً إنك من أول 4 اللي زاروا المدونة بتاعتي
تفتكر يا بدراوي ممكن يزورها 4 كمان قبل ماموت
ههههههههههههههههههه

مهندس مصري بيحب مصر يقول...

حلوة إجاباتك يا بدراوي
:)

maha zein يقول...

اخي الفاضل بدراوي

كنت سيبتلي تعليق في الشات بوكس
وذكرت فيه لينك لموضوع انت كتبته بعنوان الثقافة المصرية المايعة

دخلت أقرأ الموضوع وانا مقتنعة تمام الاقتناع انه سيكون مقال ساخر عن بعض الافكار الخاصة بالملتزمين او المنتقبات
وهيأت نفسي لسماع كلام من هذا القبيل

و بالفعل اول ما بدات قراءة الموضوع كنت معتقدة انك هتأيد استاذة لميس
وهيأت نفسي لذلك
وهكون صريحة معاك كنت بقرأ لامي رأيك في الشات بوكس
و طلبت ني اني اقرألها الموضوع بتاعك بتاع الثقافة
و في بداية الموضوع وانا بقرأ للاميس كلامها كنت بتوقف واقول لامي "ما يبصوا للبس العاري والثقافة الاوروبية والامركة و الكنتكة والجينز"
وعند بداية ردك
اشهد الله اني كنت في حالة زهول فكري انا وامي
كنت معتقدة انا وامي انك سوف تؤيد رأيها وتضيف عليه بأسلوباً ساخرا
ولكني اشهد الله اني شعرت بقشعريرة ونظرت لامي وقلتلها
"يا ماما ده رأيه هو اللى انا بقراه ده"
بص خليني اقولك اني برغم اني احترمت اسلوبك المهذب جدا عندي في الشات بوكس
الا اني اتشكلت عندي فكرة انك بكتب ذي بعض المدونات اللى بيهاجموا النقاب او الملتحيين بشكل مباشر
و كأن الناس دي اصلا فتحت مدوناتهم عشان يهاجموا المنتقبات فقط
وكأننا اجرمنا حين انتقبنا

كنت معتقدة ان حضرتك بتتميز عليهم في انك بتهاجم النقاب في حد ذاته ولكنك بتحترم المنتقبات من باب انه حرية شخصية وحضرتك بتحترم الحريات الشخصية

لكني واشهد الله انني تغيرت فكرتي تمام التغير عن فكرك
انا دلوقتي فهمت تركيبة فكرك
انت حد جواه خير شديد
وفطرتك طيبة بعكس ما اعتقدت
بدليل انك رديت علي مقال لاميس بنفس الكلام اللى كان علي لساني وعلي لسان اي حد محترم ومهذب وفيه خير

غيرك كان ممكن استغل الفرصة واعد يسب ويسخر من الستات اللى بيلبسو الاسدال او الملحفة
وما يصدق يلاقي فرصة يهاجم فيه المنتبقات اللى لابسين ملحفة او اسدال
لكن حضرتك رديت ردود بسيطة و مقنعة تمام الاقناع

بس حضرتك بردو في كلامك عن النقاب انا فهمت دلوقت ان اكيد حضرتك بتجد بعض التصرفات من المنتقبات مش بتعجبك وانت بتتناول التصرفات دي بشكل من النقد
ذي ما انا بردو ممكن ميعجبنيش سلوك شخص ما او سلوك واحد ملتحي او مش ملتحي واتكلم عنه وانتقده
بس اللى بيميزك انك بتقول رأيك ونقدك بأدب
كمان حضرتك مش بتنكر النقاب ولا بتحرمه ولا بتقول انه عادة او بدعة ذي ما ناس كتير بتقول وبتنادي بده
لا حضرتك بتاخد براى الغزالي في انه سنة
او حتي لو انت بتاخد برأى اي حد بانه فضل كمان ولا سنة ولا فرض
يعني الاهم انك مش بتنكره اصلا ولا بتاهجمه لمجرد الهجوم

احترمت دماغك جدا
واسفة لاني ظنيت لوهلة انك ممكن تكون مدون ذي بعض المدونات اللى بتسب علني النقاب واكيد حضرتك عارف كويس انا اقصد انهي مدونات
انا بعتذر عن اي ظن ظنيته لوهلة
رغم احترامي ليك بس هدوء حوارك وادبك
وبفتخر بمعرفة مدونتك اللى هتفيدني كتير جدا
وبشكر علي ردك الرائع علي الاستاذة لاميس
وانا في انتظار بوستاتك اللى بتحاول تعالج فيها فكر خاطىء بطريقتك المهذبة البسيطة المقنعة
ربنا يبارك فيك ويعزك

دعاء مواجهات يقول...

اية دة انا اسمى مكتوب ؟؟

بجد شرف كبير ليا ان اكون واحدة من التدوينات اللى عجبتك

بدراوى يابنى انت طمر فيك العيش والكشرى
ههههههههههههههههههههههههه

بيس

(صندوق الدنيا) يقول...

إجابات صريحة
ولا شك أننا جميعا نعرف ملامح شخصياتنا
فقط أحيانا لا ندرك كيف نصفها للآخرين
بارك الله فيك اخي الكريم

maha zein يقول...

اذيك استاذ بدراوي
اشكرك علي تعليقك عندي
بس حضرتك ذكرت ان ده الجزء اللى حضرتك معترض معايا فيه واللى حضرتك مش مستعد تقتنع بيه

والله انا معرفتش هو انهي جزء بالظبط
عوزة اعرف جدا ايه هو جزء الاعتراض في البوست بتاعي اللى حضرتك مش مقتنع بيه

في انتظار تعليقك وتوضيحك عشان نفكر سوا واشوف رأيك وافهمه
واتمني فعلا ان ذي ا حضرتك قلت انك هتعمل بوست بأجزاء من كتاب الغزالي

اتمني تكون بينا ذي مناظرات مهذبة
استفيد من حضرتك وتستفيد مني
وجزاكم الله خير