السبت، مايو 23، 2009

كل تلكيكة و فيها خيرة

أكثر شىء بيستفزنى هو التلاكيك اللى ملهاش لزمة حتى لو من غير قصد ،
واحد يجى يتلكك مثلاً عشان يهرب من حوار او مناقشة ،
او مش عاجبه الكلام يقوم يقولك طب و الله هو حيحصل بس انا بقول لو كان
،
عشان كدة انا لغيت نشر تدوينتى عن النقاب ، عشان شغل التلاكيك الغريب ده
جه مدون بعتز بيه و بحترمه و قال بكل إحترام حبقى اقرا الكتاب و بعدين ارد ان شاء الله

ثم جاءت مدونتان و قالت إحداهما – و بالمناسبة اول مرة ييجوا مدونتى

شكراً على الكتاب حبقى احمله و اقراه ، و الثانية قالت : إمممم طااايب
!

و ده كله بالنسبة لى شغل تلاكيك مالوش لزمة و يفقع مرارة اللى خلفونى
يعنى ايه حقرا الكتاب و بعدين ارد


اولاً : انا حاطط الكتاب عشان اللى حابب يقراه ، مش عشان حضرتك تيجى تقوليه حبقى اقراه ،

لأن الكتاب مش بيتكلم عن النقاب غير فى المواضع اللى انا اشرت ليها يبقى حضرتك تتفضل تقراها و بعدين تناقشنى
لكن تقولى حقرا الكتاب
يالا بقى يديك و يدينا الصحة و طولة العمر ، لحد بقى ما انتظر حضرتك اما تقراه الكتاب من الجلدة للجلدة و تفليه و بعدين تناقشنى
.

يمكن حد يشوف رد فعلى ده غريب
لكن انا فاهم كويس ، الكل عنده استعداد لو جبتله كتاب يقول النقاب فرض و فضل و سنة
انه يرد و يتكلم ، غير كدة تبلع لسانك و تقول لى اممممم طااااااايب
!

الأخت اللى جات تقول اممممم طاااايب
حضرتك مش عاجبك الكلام و مش موافقة عليه تناقشينى فيه .
الكتاب مش مفروض من حضرتك تقراه كله عشان تفهم رأى الشيخ الغزالى فى النقاب

و كمان حقولك حاجة لما تلاقى تدوينة تتكلم عن ادلة وجوب النقاب
حتلاقى ما شاء الله الكل بيشيد و ايه الكلام الجميل ده

الا ما حد قال مثلاً حضرتك جايبة الكلام ده منين
تقول و الله من الكتاب الفلانى او العلانى
المفروض يرد يقول طب حبقى اقراه و ارد
زى ما حضراتكم عملتوا تلكيكة و خدتوا ديلكوا فى سنانكو
!
لكن على طوول كله قال امييين
.
---
و احب اعتذر لأى حد ممكن يضايقه كلامى ده
خاصة الأخوة اللى اشرت الى تعليقاتهم
انا متعودتش احتد كدة ، بس الصراحة مرارتى اتفقعت بالقوى .

هناك 16 تعليقًا:

مواطن مصري يقول...

يا حج بدراوي هتاخد من دة لما تهاجم الاسلامين او تنتقدهم


هما خلو الدين في حتى نقاب

مش في المضمون


و انا قولتلك رائي عن النقاب

Unknown يقول...

مواطن مصرى
----------
انا موقفى واضح ، و انا مش بهاجم لا الإسلاميين و لا حد
انا بتكلم عن رأى شرعى فى النقاب

عشان بس محدش يفهم من تعليقك كلامى غلط

mimi يقول...

هدي نفسك ... مش كده ... معندناش استبن مرارات اليومين دول ...

ولا إيه؟؟

Desert cat يقول...

ههههههههههههه
اتقالك كدا وبس
امممممم طايب هبقى ارقاه
طيب كويس اوى انه مش اتقالك يا زنديق وياكافر وياملحد ويا علمانى وانت مين اللى بيقبضك علشان تنشر كتاب زى ده اكيد انت بيمولك الغرب الكافر والقائمة طويلة اوى من الاتهامات
ده انت ياراجل تبوس ايدك شعر ودقن

إيمان هلال يقول...

انت مضايق نفسك ليه اهداء كده واشرب لمون واحلف الاول انك مش هتضرب


طيب
مالموضوع اللى هما عملوا دا ليه فايده وهى انك عملت الموضوع دا ومررتك اتفقعة وانا سمعت امبارح الدكتور فى التليفزيون بيقول فقع مررارة بدراوى مفيد للصحه والمفتى كمان


طنش تعش تنتعش

هو الواحد عنده كام مرراره

Ramy Wasel يقول...

المشكله ليست فى موضوع النقاب
المشكله فى سوء حاله الحوار
نحن وصلنا لمرحله عدم الاستماع للاخرين
واصبحنا جزر منعزله
لا نقبل الفكر الاخر
حتى ولو كان صحيحا
ولحاله الفراغ الى ملئت البلد
تطرف الناس فى كل شئ
فى الدين
وفى المشاعر والاحاسيس
وفى الحزن وفى الفرح
وليس الدين فقط
وكلما حاول احد ان يتناش بعقلانيه
لن يجد غير انصاف المثقفين للرد عليه
واصبحنا نختصر الدين فى النقاب
وتركنا جوهر الدين

غير معرف يقول...

ههههه
علشان كده لما حاولت ادخل على الموضوع النهارده ما عرفتش
هدى نفسك....امال لو حد شتمك هتعمل ايه؟
المهم طيب ممكن تنزل البوست تانى ولا ايه.....اصلى ما فهمتش.....بس اللي اعرفه ان النقاب فضل موش فرض.....واللي نفسها تلبسه ماشى....واللي موش عايزه ماشى....لا ضرر ولا ضرار.....وبعدين المظهر شىءيكمل الجوهر ولا يدل عليه
هدى نفسك
دمت بخير....تقبل مرورى

Unknown يقول...

انا من رايي التجاهل التام ........ و لو حد رد بتعليق كويس مفيد يبقي ترد عليه !

غير كده اعتبره هوا

بلاش فضايح يقول...

بدراوى ازيك
معلش انا بقالى كتير مبدخلش ومش متابعة
معلش هو كتاب ايه دة ؟
فين دة ؟ انا حاولت اجيبه من تدويناتك بس ملقيتهوش
ياريت تحطلى اللينك بتاعه

شكرا

الشعب لابد له من حكومه تشكمه يقول...

انا اللى قلت امممممم طيب...انا مش مكسوفه انى قلتها ومش شايفه ان فى حاجه كانت تدعو للى عملته ده ومش هقف عند كلامك اللى انت قولته فى البوست ده ومش هعلق اصلا عليه...

وعندى ليك سؤال؟
مسألتش نفسك هم ليه اصلا اهتموا انهم يردوا ؟؟؟؟ممكن كانوا قفلوا الصفحه بتاعتك بكل بساطه...
دا معناه انهم اهتموا بالموضوع وان ليهم عوده والا مكانوش ردوا عليك اصلا
فسيبت تعليقى وكنت جايه ارد عليك انهاردا.

ماعلينا من دا كله ومن كل التريقه اللى انا سمعتها وماعلينا من كلامك برضه اللى بتقوله على ناس انت نفسك بتقول انهم اول مره يزوروك يعنى انت متعرفهومش علشان تحكم عليهم .
وللعلم
انا مش منتقبه وعارفه كويس جدا اراء المشايخ اللى انت عرضتها...تقولى عرفتى منين اقولك ان اعز صاحبه ليا اخدت قرارها بلبس النقاب وكنت معاها ثانيه بثانيه من لحظه التفكير والبحث عن الادله لمرحله المقارنه بين ادله الوجوب وادله عدم الوجوب واخيرا مرحله استفتى قلبك وان افتوك..
زى مافى كتب فيها ادله عدم الوجوب فى كتب فيها ادله الوجوب
زى كتاب محمد بن صالح العثيمين...والكثير من الادله فى القران والسنه....التى يطول عليها الكلام...
والكثير والكثير من الكتب التى لو اردت منى سردها هى والادله سأسردها لك..دا من الناحيه الشرعيه اللى انت اتكلمت فيها..

لكن وبكل امانه مش ده السبب اللى خلانى من البدايه حبيت انى ارد واعلق عندك مش لانى من مؤيدى النقاب وكذلك انا لست من معارضيه.
بمعنى انت ليه مهتم جدااااا اذا كان حد لابسه او قالعه واذا كان ده فضل او فريضه.؟؟؟

دى حريه شخصيه وده السبب اللى خلانى عاوزه اتكلم فيه من البدايه...!!!
ياسيدى لو هو مش فرض اهى واحده ترغب فى التقرب اكثر الى الله وبتحاول تعمل اى حاجه علشان ترضيه..ليه احنا نصادر حقها فى ده...
دا انت ادامك الست هيفا وميلوتى هيتس كلها على بعضها كل شويه حد بيقلع ومحدش قالهم انتو قالعين ليه؟؟؟

انت جاى تحاسب واحده لابسه انتى لابسه ليه..وتقولها لا على فكره فى ادله عدم وجوب...
وسيبت واحده قالعه وقلت عليها حريه شخصيه..!!!!
مع ان الحجاب فرررض وده كلنا باه متفقين عليه ولا ايييه؟
وايه اصلا وجه الاستفاده من مناقشه النقاب لبسه او قلعه...؟
هم مش عاملين ذمب واحنا واجبنا اننا نطهرهم ونفوقهم منه..
ولا المفروض اننا كلنا نمشى ورا المقوله اللى بتقول باسم الحريه اقلعى الهدوم المستخبيه...

انا هنا مش بكلمك فى نقطه وجوبه من عدمه لكن بكلمك فى نقطه كل واحد وحر..
زى مبتحاسبش اى واحده ماشيه من غير حجاب او بكت او بنتاكور او ستومالك.ياريت منروحش للمنتقبات وندور على ادله وجوبه ولا دا مش فرض..

اسفه على الاطاله
وعموما انا اسفه جدا على الزياره اللى اتسببتلك فى كل الاعراض اللى حصلتلك دى وياسيدى مش هكررها تانى لو تحب كمان...مع انى متمناش كده...

واخيرا الاختلاف فى الرأى لايفسد للود قضيه..
وعلى فكره انت ظلمتنى بكلامك اللى شويه جرحنى:)

الشعب لابد له من حكومه تشكمه يقول...

حاجه نسيت اقولهالك..
انا اامبارح كان مودى مش تمام ولما قريت كلامك صدقنى حاولت اكتب بس مقدرتش وفى نفس الوقت مقدرتش مردش..تقدر تقول انى مش بعرف امسك نفسى فكتبت الرد ده كاثبات حضور ..
وكنت داخله انهاردا اتكلم باه وارغى ونتخانق على باب المدونه وتقولى متجيش وانا اقولك لاهجى.وفوجئت انهاردافى وشى اول مدخلت بكلاشينكوف فى وشى ودددددددددادادادادادا..

روستوك روستوك على راى هنيدى:)

مهندس مصري بيحب مصر يقول...

تصدق بالله أنا لسه واخد بالي من البوست ده دلوقت

أولاً : أنا بأحترمك جداً لأنك لحد دلوقتي لم تظهر من الكتابات على النت غير ما يستوجب كل إحترام

ثانياً : أنا ما كنتش أعرف إن الصفحات اللي حضرتك حاططها هي اللي بتتكلم عن النقاب بس في الكتاب كله
و حضرتك ما قلتش كده في التدوينة اللي فاتت
و أنا مش حأخمنها و أعرفها لوحدي

ثالثاً : أنا ما إتعودتش أبدي رأي في شئ قبل ما أفهمه لإن رأيي في الحالة دي حيكون منقوص و غالباً خطأ

و على هذا الأساس انا قررت أقرأ الكتاب الأول و بعدين اتكلم علشان أكون عارف أنا بأتكلم في إيه

لإن عالم بحجم الشيخ الغزالي مستحيل واحد زيي يرد عليه من مجرد كلمتين قرأهم

أنا الرأي الشرعي المرتاح له قلبي حالياً هو إن النقاب سنة من فعلتها لها أجرها و من لم تفعلها فليس عليها وزر

و أنا لسه ما خلصتش قراءة الكتاب و إن كنت مستمتع بيه جداً و بأشكرك عليه

لما أخلص قراءة الكتاب ساعتها بس حأتكلم معاك و أنا على قدر كويس من الفهم لإنت بتتكلم عن إيه

:)

أنا والله لا كان قصدي أهرب من النقاش و لا أفقع مرارتك و لا حاجة من دي خالص

شوية حسن ظن يا بدراوي
:)
إجتنبوا كثيراً من الظن
إن بعض الظن إثم

احمد سعيد يقول...

بص يامعلم بدراوى

طالما بقيت مدون

لازم تستئصل مرارتك

وتستبدلها بمرارة كاوتش

او حديد صلب ان امكن

وياحبذا ان كان حديد عززززز ياوزززز


عادى يعنى

انا شخصيا مرارتى مفقوعه خلال اربع شهور

بتاع ست سبع مرات

كبر دماغك يامعلم

ومتخليش حاجه تحرق دمك

لانك انت اللى هتخسر فى النهايه

الكلام دة مش ليك انت بس

دا ليا انا كمان

D:


________________________


الشعب لابد له من حكومه تطلع افلاسه


اولا ومتزعليش منى انتى عنوان مدونتك مستفز

اينعم دى حريتك

ومحدش له حاجه عندك

تمام

بس العنوان بيخلى اى حد يقرا تعليقاتك عندة ما يشبه التربص والاستفزاز ...

حتى ولو كنتى كاتباها على سبيل السخريه

اظن الموضوع دة بان شويه فى تعليقاتك عند نوارة



ثانيا

الموضوع مترجم غلط

انا شايف ان بدراوى مش بيهاجم فى اتجاة خاطىء ولا سايب هيفا وامثالها وماسك فى المنقبات ولا حاجه من دى خالص

ودة اصلا مش هجوم على النقاب

دا دفاع

دفاع عن حاجه بدراوى وغيرة معتقدين انها حق

الموضوع مش هجوم

اللى عايزة تتنقب هى حرة

دى حريه شخصيه زى ما قلتى

ومحدش له عندها حاجه

بس فيه نقطه

لما الصورة تتقلب ويبقى الحجاب فرض وحتمن ولازمن ولابد كل مسلمه تلبسه وان ملبستوش تبقى مذنبه ومقصرة

لا

يبقى هنا لازم نقف

ونتكلم

وندافع عن ناس تم اتهامها بالباااااطل انها مذنبه ومقصرة

وندافع عن عقيدة كل مدى بتضيق وبتتسطح وبتتعقد على معتنقيها

وكل دة بسبب مجموعه من الجهله اللى مسميين نفسهم مشايخ

زى الاخ اللى قلتى عليه دة

طبعا حضرتك بتحترميه

انا شخصيا لا احترمه لا هو ولا امثاله

اظن دى حريه شخصيه

وشىء ميزعلش .....



اللى عايزة تتنقب تتنقب

هى حرة

بس ياريت محدش ييجى ويقول الحجاب مش كفايه

انا قصدى طبعا على الحجاب الشرعى

مش الحجاب المصرى

يعنى النقاب مش فرض

ومش من حق اى حد يهاجم الست اللى مش منقبه ويتهمها ويؤثمها كمان

فهمتينى

مافيش حريه من جانب واحد

يعنى مش نزعل لما الناس يهاجموا المنقبات بينما احنا كمنقبات نيجى ونهاجم اللى مش منقبه


مش كدة ولا ايه ياعم بدراوى

رحلتنا في الحياة يقول...

مكنتش متخيلة ان ردى هيزعل كده انا مكنتش عايزة اقول رايى الشخصى غير لما اقرا الكتاب واجمع كل الاراء علشان مينفعش اتكلم على حسب هوا شخصى بس علشان كده متكلمتش عن رايى فى النقاب وقولت هقراه ان شاء الله
على العموم مش تزعل لو كان ردى ضايقك فى حاجة المرة الجاية ان شاء الله هعلق ومش هسيب رد عقيم زى اللى سبته ده

احمد سعيد يقول...

بس فيه نقطه

لما الصورة تتقلب ويبقى الحجاب فرض وحتمن ولازمن ولابد كل مسلمه تلبسه وان ملبستوش تبقى مذنبه ومقصرة


___________________________________


العبارة اللى فوق دى حصل فيها لبس

يعنى انا غلطت فى الكتابه

كان قصدى اقول :

لما الصورة تتقلب ويبقى النقاب فرض



انا غلطت وبدل ما اكتب النقاب كتبت الحجاب


وشكرا على التنبيه يا بدرو

مجرد مدونة يقول...

أنا تفاجأت لما لقيت الموضوع اتشال وكنت كتبت تعليق على ردك .. مش عارف أكتبه ولا لا ! ويا رب مرارتك تفضل سليمة ((:
التعليق اهو:
بدراوي
أنا اسف أنا بكتب من هاتف محمول ومش متاح لي كمبيوتر مع الاسف الشديد لظروفي الشخصية .. فمش قادر اجيب لك النصوص اللي إنت عاوزها بالإضافة إلى ان الشيخ المقدم عامل المجلد الثالث في كتاب عودة الحجاب كله بعنوان "أدلة الحجاب" جايب فيه أدلة وجوب النقاب والردود المتسمة بالأدب الشديد على العلماء القائلين باستحبابه .. وعلى رأسهم طبعا في هذا العصر العلامة الألباني .. باعتباره كان من كبار أهل العلم في العصر ده -رحمه الله- ..
فموضوع اني أنقل الرد كده في التعليقات مش بالبساطة المتصورة لأن الموضوع فيه مباحث متفرعة جدا وأصول من الكتاب والسنة واللغة في معنى الحجاب والخمار بالإضافة إلى أسباب نزول آيات الحجاب .. فالموضوع كبير اوي .. خلاصته ان الموضوع فيه خلاف سائغ معتبر زي ما قلنا .. فلا ينبغي ان ينكر القائل باستحباب النقاب على القائل بالوجوب ولا العكس الا على سبيل المناظرة العلمية ..
وبالتالي ما ينفعش واحدة بتاخد بالرأي اللي بيقول بالوجوب تنظر لأختها اللي تاخد بالاستحباب باحتقار !!
حتى لو كان مفيش غير رأي واحد !! عسى أن تكون خيرا منها .. !
......
بالنسبة للاخوة اللي بيقولوا ان السلفيين بياخدوا بالأحوط أو بالتشدد .. الكلام ده مش صحيح اطلاقا الفكرة كلها ان السلفيين رجعوا النقاب مثلا أو اللحية أو اظهروا حرمة التعاملات الربوية في البنوك في وقت غربة .. عشان كده الناس أخدوا عنهم فكرة التشدد في حين انهم لا يحلون حراما ولا يحرمون حلالا.. !!
لكن يتبعون الدليل حتى ان السمة المميزة للسلفية في وسط الاتجاهات الإسلامية المعاصرة هي الاهتمام بطلب العلم بشكل أساسي وبالتالي العمل والدعوة .. ده المنهج السلفي وإن خالفه أفراد ينتسبون إلى السلفية تقصيرا منهم ..
..........
تقبل احترامي الشديد ((: