السبت، مايو 30، 2009

البنات فى المنصورة و أشياء أخرى

1
لكل مدونى مدينة المنصورة
و اللى لاحظت انهم عاملين جالية منصورية كبيرة على البلوجر

فكل ما اجى اتعرف على مدونة لأخ او اخت الاقيه من المنصورة ايه الحكاية

فبدعوكم لحضور حفل التوقيع الثانى لكتاب البنات عايزة إيه للأخت العزيزة
بسمة عبد الباسط و صديقتها بدرية طه
و اللى حيكون فى المنصورة

الحفل إن شاء الله يوم الجمعة القادم 5 يونيو من الساعة 6 الى 9 مساءاً طبعاً و اكيد هههههههه
:)

فى المنصورة مكتبة
Books & Beans

7
ش جزيره الورد المشايه السفليه امام نادي الجزيره
------
2
أحب ادعوكم لزيارة مدونة أدى حال الدنيا و مدونة حكايا الأميرة
للأخت العزيزة أميرة ويلز

و مدونة قلم كحل للأخت العزيزة زينة مدحت

و بجد الكلام ده مش بس لأن مدوناتهم تستحق
لأ كمان لأنهم
من انبل و اعز و ارقى الشخصيات اللى ممكن تعرفها فى حياتك .
------
3
انا الفترة القادمة حتوقف عن التدوين - بس طبعاً حبقى اعلق فى مدونات الأصدقاء -
بعد معركة النقاب حامية الفطيس ،
و ده مش السبب الرئيسى للتوقف بالطبع لكن هو احد الأسباب المهمة ،
عشان يدوبك ألحق اعمل تحليل مرارة أشوفها اتفقعت و لا لسة

و كمان عشان التدوين ده مالوش اى لزمة اصلاً ،
انا عندى كلام اقوله اه مقولناش حاجة ،
بس انا بفضل اهرى و احط فى نفسى لحد ما اطق
و خلاص ، بلا تدوين بلا قرف ،

صحيح ان عالم التدوين هو عالم مهم بالنسبة لى كشخص
يعتبر الكتابة شىء مهم فى حياته ،
صحيح كمان ان على المستوى الواقعى
ماليش صداقات كثير او تقريباً مفيش ،
و ان معظم التواصل بينى و بين المدونين
هو تواصل بيحسسنى انى عايش و مش لوحدى

بس واضح كدة انى بيبقى عشمى زيادة اووووى فى الناس ،
فأستكمل رحلتى مع وحدتى و اسعى على مستقبلى لوحدى
زى ما انا طول عمرى لوحدى

و فى الحقيقة و الواقع كل حاجة فى حياتى
بعملها لوحدى حتى وسط اهلى ماشى و ليا دماغ لوحدى
بس خلينى كدة اريح ،
انا لما بتخنق مبعرفش اتكلم و لا اقول حاجة ،
فخلينى كدة افضل

اه نسيت قبل ما اخلص كلامى ،
كنت مجهز بوست ساخر عن باراك اوباما ،
بس بقول خليه مركون كدة احسن بلا نيلة .

هناك 22 تعليقًا:

Kalimalhus يقول...

لسة بدرى على الخنقة يا بدراوى ده إنت يا راجل بتقول يا هادى .. أمال بعد 12 13 سنة لمه تبقى فى عمرى كده هاتعمل إيه؟؟

أنا إنزعجت جدا لما لقيتك شلت التدوينات اللى عن النقاب .. و ما فهمتش السبب .. أنا نمت و صحيت لقيت القصة خلصانة ..

طبعا إنت حر تماما .. المدونة مدونتك و إحنا ضيوفك .. و أكيد إنت مش مدين لحد بتفسير .. بس لو تقدر توضحلى .. سواء هنا أو على الميل ها أكون ممتن ليك جدا ..

آسف لأنى إتكلمت بره الموضوع .. و الرسالة موجهة ليك وحدك و بالتالى تقدر طبعا تمسحها بعد ما تقراها ..

روق .. صدقنى مش مستاهلة..

Soul.o0o.Whisper يقول...

السلام عليكم و رحمة الله و بركاته

؟؟؟؟؟؟؟؟؟؟
!!!!!!!!!!!

فى ايه؟؟؟
حصل ايه بس خير يارب؟؟!!

مممممممممممم
شكلك مالكش اختلاط بالناس اوى و لا دخلت فى نقاشات و لا حورات قبل كدا

لا اجمد كدا
ايه بلا تدوين بلا بتاع

هو عشان كل واحد قال اللى عنده
يبئا كدا الدنيا قفلت و محدش عاد يسمعك بئا

لا بالعكس
أقولك أنا إن بجد الناس اللى دخلت معاها قبل كدا فى حوارات و نقاشات كدا
هما اللى استمر التواصل معهم

لأنهم بكل بساطة بيقولوا الحق من وجهة نظرهم و بكل احترام
و بالتالى ممكن أكتشف انى غلط
او ممكن هما يكونوا غلط
و بالتالى بنصحح لبعض
و عادى جداااااااا

و بعدين احنا مش بنتحاور عشان حد يقول انا الصح و انتوا الغلط
لا بنتحاور عشان نقول الحق من وجهة نظرنا كذا
واللى عنده أدلة بيقولها

اما بئا حكاية القناعات
فدى مسألة شخصية مالناش دعوة بيها


روق كدا
و هتعمل التحليل صدقنى
و هتلاقى المرارة طبيعية خالص
و شوف الضغط و السكر بالمرة
هتلاقيهم بردوا طبيعيين
بس أنت اللى بيتهيألك :)


ياللا مستنيين بوست أوباما
أوعى تكسفنى

mimi يقول...

انا نفسي أعلق عندك سبعين تعليق ... بس فيه حاجة كده منعاني ...

لا .... مش اللي في بالك ... بس علشان انا بقيت مدونّة مهمة في عالم اونكل بلوجر ... وتعليقاتي هتتحسب عليا بعد كده .. أو نو ... برستيج بقي

باركي بقي ...

برده مش اللي في دماغك ...

شوف اللينك ده

http://advsarab.blogspot.com/2009/05/blog-post_30.html?showComment=1243640467064#c1185598463335206973

وأنت تعرف

نياااهااااااااااا

mimi يقول...

هوا أنا علقت ولا لسة؟


ايه ده ؟

استقالة تااااااااااااااااااني ؟؟؟؟؟

لو انت مش موجوع في الريدر بتاعي هعملك بوست ... عودالينا

وأفقعك قصيدة من اللي هيا ... ترجع غصب عنك

مش برضاك أصلا ... ابسلوتلي

أما نشوف ...

اما عن تحليل المرارة ... انا اعرف معمل حلو اوي تحت السلم ... هيطلعك نتايج ايه........ عجب

mimi يقول...

انا بعتذر عن عدم قدومي للمنصورة ...
فين ابليكيشن الاعتذار علشان املاه؟

او نوووو سوفاج

برستيج بقي....

نياهاااااااااااا

مواطن مصري يقول...

لا تتنازل استمر في التدوين

انا متوقف عن التدوين عشان الامتحنات انت بقى عندك اية  

مواطن مصري يقول...

لو تهديد جالك قول كلنا معاك
:D

ستيتة يقول...

شوف فيه خمسين طريقة الناس بتنكد بيها على الناس

وفيه واحد وخمسين طريقة الناس بتنكد بيها على بعضها

الكتابة في المدونات دي مش لعبة بنسيبها ونرجع لها
دي نوع من الشفاء النفسي
التواصل الحسي الراقي بين الناس
كسر حواجز وافكار بتوصل وتتشعب وتكبر

ولعلمك انت مش ها تنبسط الا لما تنزل البوستات بتاعة النقاب تاني وفي نفس المكان وبمزاجك وتحس انك مش مضطر ترضي او تغضب حد

وبعدين اسلوب التجريح والتقريع ده بتاعنا احنا المصريين من قديم الأزل

ايام الفراعنة كان الكاهن يمسك الفلكة ويقول لك "ها هاتعبد آمون رع والا أمدك؟"

النهاردة كل واحد ليه نفوخ وعاوز الناس وراه وده مش صح يا باشا

قولي حلول يا سوتيتة
اووووووووووووووووووك


1- تنزل بوستاتك بسلاطاتهم ببابا غنوجهم وتقفل التعليقات والشات بوكس وتسيب الناس تهري وتنكت وانت مرارتك في السليم

2- تنزل بوستاتك بسلاطاتهم ببابا غنوجهم وتعمل رقابة للتعليقات واللي فيها يفقع المرارة او فيه تجاوز تدلت أهله وانت مغمض الأنف والأذن والحنجرة

3- تنزل بوستاتك بسلاطاتهم ببابا غنوجهم وتكون من القوة والجراءة والإلمام بموضوعك لدرجة انك تكون هاديء جدا وتوصل لكل بني آدم وجهة نظرك بهدوء واحترام حتى لو مكنش يستحقها ولما تاخد موقف تكون شجاع وتعرف تواجه مش تقولي رايح لدكتور.. قوم يا مصري .. العيش بقى ب 40 قرش

4- يؤسفني هذا الحل جدا .. تروح تنام وتقفل مدونتك وتاكل رز في احلامك وتشيل جواك حزنك وتكون أجبن من المواجهة .. والجبن ده ها يجيب توابع بكره كتير في حياتك وياما ها تلجأ له

اسفة لو تعليقي فيه تجاوز يضايقك بس اصل مفيش اوبشنز تانية فحبيت اقول لك سلسلة قانون الإحتمالات

تحياتي

رحلتنا في الحياة يقول...

ايه ده اول حاجة كنت اتوقعها انك تقفل المدونة مش عارفة ليه حسيت من الكام البوست اللى نزلتهم فى الفترة الاخيرة انك شخصية قوية جداااا وبتعرف توصل لهدفها
الاختلاف سمة بين الناس مش كلنا هنكون واحد يعنى وبما انك لم تجرد فى اى انسان ولا تسئ ليه باى طريقة خلاص انت حر تعبر عن نفسك وعن رايك باى طريقة
اسمع كلام دكتورة ستيتة وهى فترة وهترجع تانى ان شاء الله
بخصوص حفل التوقيع كان بودى احضر بس زى ما بقول دايما فى المواقف اللى زى كده انا فى بلاد المنفى :((
بس ممكن نبعت مدوبين يحضروا حفل التوقيع بدالى :)

Ramy Wasel يقول...

يا راجل ده كلام

تمتنع عن التدويبن ليه بس
وبعدين الفكره من التدوين انك تقول رأيك بحريه حتى لو كان يختلف مع الاخرين
ولكل شخص رأيه ويجب احترام ذلك
صحيح مساحه الحوار الان قد لا تسمحبحريه الاراء
بس ده مش معناه اننا نستسلم

اغذى الشيطان وارجع
وقول الله اما غذيك يا شوشو


يلا استهدى بالله كده وارجع عن اللى فى دكاغك

غير معرف يقول...

تسالىىىىىىىىىىىى
انا اصلى بحب التسالى ودى مدونتى من غير مدونة هى تعليقات وبس
موضوع مدونتى زى ما انتو شايفين انا عابر سبيل بستمتع جدا بيكم وبأفكركم وبرأيكم
وشعارى كلمات ابونا صلاح جاهين
«غمض عينك وامشي بخفة ودلع..
الدنيا هي الشابة وانت الجدع..
تشوف رشاقة خطوتك تعبدك....
لكن انت لو بصيت لرجليك تقع...عجبي!»
اهتماماتى
الازأزة .. يعنى .. لب وسودانى حمص وترمس وحب العزيز
ولما بكون متريش فستق هاهاها
انا بضحك لأنى دايما على الحديدة بس بردوا بلاقى
تسالىىىىىىىىىىى

مهندس مصري بيحب مصر يقول...

يا سيدي عمر ما كان الإختلاف المحترم في الرأي سبب للإمتناع عن التدوين
و اللي مش محترم تمسح تعليقه و تدي له على دماغه بالأدب برضه

إنت من الناس المحترمة و إمتناعك عن التدوين خسارة لينا كقراء ليك
ثم كفاية إني حملت من تدوينات النقاب 3 كتب من عندك زي الفل و شغال قراية فيهم
:)

ثم اللي أعرفه عن النقاش بين رأيين يا حد يقنع التاني برأيه
يا يفضل كل واحد محتفظ برأيه لكن تزداد معرفته بالآخر و إحترامه ليه

أتمنى تراجع موقفك ده و ترجع للتدوين تاني
و بلاش تنطوي على نفسك لإنك عزيز على ناس ياما

Kiara يقول...

االاختلاف في الراي لا يفسد للود قضيه ليه بقي شايف ان التدوين ملوش لازمه اصبر وخليك مثابر

هزور المدونات اللي قلت عليها

ومستنية بوست جديد

بسمـــة مســـــلّم يقول...

اخى العزيز شكرا لك جداعلى تعليقك بس انا مشغولة اليومين دول اوى واكيد راجعة تانى مرسى ليك وياريت قلمك ميبطلش كتابة ومدونتك تفضل عمرانة بيك علطوووول وبالنسبة لموضوع النقاب انا مش قرأته بس تذكر ان اختلاف الرأى لا يفسد للود قضية ابداا واجمل حاجة فى التدوين بجد انك تلاقى ناس تحبك وتسأل عليك لوجه الله سلللللللللللللللااااااامى

Unknown يقول...

بدراوي بيه

شكرا علي الاعلان عن حفل توقيع الكتاب

لأني طبعا منصوراوي انا و شريكتي !

كمان اعمل تحليل للمرارة زي ما تحب و ارجع اعمل معارك برضه حامية الفطيس

الاختلاف في الراي .............

و اوعي انت كمان يجيلك مرض قفل المدونة

تامر علي يقول...

ولو إني مش مقتنع إن ممكن النقاش حول موضوع معين يخلي انسان ينسحب من مجتمع كامل لكن لو افترضنا انك اصطدمت بعقليات مختلفة وتراجعت نهائياً فبكدة بتعلم نفسك الانسحاب والانعزال وده سلوك غير سليم نفسياً ..إلا إذا كانت فترة استرخاء تعود بعدها لمواصلة المشوار

تحياتي وتقديري :)

الشعب لابد له من حكومه تشكمه يقول...

مممممممممم طاايب..162

الشعب لابد له من حكومه تشكمه يقول...

هههههههه عادى قلت اكمل على المراره بتاعتك..

بس عارف بجد مش عارفه اقولك حاجه لانى ببساطه مش بعرف اتحايل على حد ولما حد يتقمص او يقول والله مهدون تانى فمش بعرف المفروض نعمل ايه او اقوله ايه..
لكن عموما هقولك حاجه انا برضه دخلت ولقيتك شيلت البوست الخاص بالنقاب بالكامل ودا شئ انا مفهمتوش..يعنى ايه تدخل مناقشه ولما حد يختلف معاك او حتى يبدأ يطول لسانه تخفيهم وتقول انا مش هكتب تانى اصل المراره اتفقعت..!!!
اولا اللى بيختلف معاك عادى المفروض يكون صدرك رحب شويه ..طب اقولك حاجه شوف الريس اهو تقريبا 99.9 من الناس بيشتموا فيه فى الجرايد والمدونات شوفته قفل البلد ولا قال انا ماشى ابسلوتلى نووووووو ساب كل واحد يتكلم براحته ولا بتتهزله شعره انت المفروض تكون كده..
حاجه كمان لو حد اساء ادبه اعرف ان ده مش عيب فيك فكل اناء ينضح بما فيه ودلت الكومنت ببساطه..
وهقولك حاجه حتى لو شايف ان كلامنا ملوش لازمه اى التدوينات انا شايفه انه على الاقل بتخرج شحنه او طاقه جواك.بتتكلم عن حجات جواك دا مش عيب ومش غلط وليه لازمه...
اخيرا وانا اسفه على الرغى ده مفيش حد بيعيش لوحده يامستر بدراوى لازم تعرف انك عايش وسط بشر ومحدش هيتفق على شخصك...
اه حاجه اخيره ومتزعلش منى فيها بجد:
اوعى تنفعل ولا يعصبك ولا يزعلك:)
انا بحس انك اوقات بتكون عنيف فى رد فعلك بمعنى ان حد اختلف معاك فى الرأى ليه تقول فقع مراره وكلام زى كده يعنى ناس احترمت مدونتك ودخلت تتكلم معاك حتى لو كلامها مش بيعجبك برضه متقولش كده لان اكيد هتلاقى حد بيرد عليك بنفس السخريه..وانا مش هخبى عليك انا شخصيا وانت عارف البدايه كانت ازاى بينا,انا اول مشوفت البوست اللى نزلته انا زعلت جدااااااااااااااا منك واستغربت انك متعرفنيش ليه تقول كده واعتبرت كلامك فيه اساءه كمان لكن هديت نفسى ودخلت وضحتلك ,, وسوء التفاهم انتهى وخلاص بأيت انا بتابع تدويناتك ولازم ارد كمان...
حاول تكون اهدى من كده ومتردش بعنف صدقنى انت كده مش بتجيب حقك انت بخسر من ناس حواليك وافتكر دايما:
اذا اساء الناس بك الظن,,فأحسن انت بهم الظن..

تحياتى يامستر بدراوى المنفعل دائما من يوم معرفته:))
روستوك روستوك يازكى ياروستوك..

بلاش فضايح يقول...

هو انت كل مهتزعل من حد شوية هيحصلك كدة
امال لو شوفت اللى انا فيه هتقول ايه

ارتاح شوية وارجع تانى مستنينك يا أحمد

احمد سعيد يقول...

بطل هبل يااااااااض

عيب عليك دا انا عامل الحركه قبل منك

هو مش هيقفل ولا حاجه ياجماعه

انا عارف ماله

ساعات البونيادم لما بيكون حساس شويتين زيادة

وحاجه بتنرفزة وبتجرحه

( دا من وجهه نظرة يعنى )

بيحب يرزع كرسى فى الكلوب

ويقلب الترابيزة

علشان نفسه يحس ان فيه حد جنبه

يطبطب عليه ويقوله معلث معلث

سد سد



ونا واثق انك سعيد بالتعليقات اللى جاتلك فى البوست دة

يلا ياعم

اخر دلع اهو



بس انا بقى مش بدلع

وعلى رأى ستيته حسب الله

ها

هتدون ولا امدك ؟؟؟؟

Kalimalhus يقول...

بدراوى
------
خليك حلو و نزل الموضوع بتاع أوباما خلينا نضحك .. أنا مسافر الفجر و عندى أمل أقرا الموضوع .. و ألا البلد دى ما بقاش فيها حاجة بتمشى من غير وقفة إحتجاجية ؟.. يعنى عايزنا نقف لك على باب المدونة و ننزلك عربيتين أمن مركزى و العاشرة مساءا تيجى تصور و البت بتاعة الحياة اليوم تكلمك فى التليفون و تتفضح فى بيتكم و يتقال عليك بتعرف مزز..

د/على خميس يقول...

الأخ الكريم بدراوى
الإختلاف فى الرأى لا يفسد للود قضية و إلا كانت الناس كلها كل واحد دخل غرفة و قفل على نفسه
ياما فى الحياة اختلافات و وجهات نظر و شد و جذب و خطأ و اعتذار

أسألك بالله ألا تتوقف عن التدوين و النقاش و ( الإختلاف )

بارك الله فيك
مش معقول طبعا هتكسف كل اللى كتبوا لك علشان تكمل ...انا عارف انت كلك ذوق

تقبل تحياتى