الثلاثاء، يونيو 16، 2009

مجدى مهنا وحشتنى

التدوينة السابقة

و هذه التدوينة بنشرهم
لأنى حلمت أول امس
بأستاذ مجدى مهنا الله يرحمه
الراجل ده وحشنى اووووووى
و اسف على جرعة الحزن

ديه







------
الصفحة الأخيرة

شعر على سلامة
------
مش باقى من كل الرايات
غير راية الحزن
بنمشى ف الشارع ساعات
ما بنلاقيش حد
ناخده بالحضن











أخر مقال كتبه الراحل فى 22 يناير 2008


راح فين الشاطر حسن
يا ست الحسن؟
إوعى تقوليلى خلاص
ماعدش ف الشارع
لا ناس..ولا بيوت
جايز يغيب الضى
لكن عمر القمر ما يموت
بصى تانى..
فى الصفحة الأخيرة
فوق ع اليمين
عنوان..غير كل العناوين
فى الممنوع..
مجدى مهنا..
لحد آخر نفس
وحيرتك أمل
وخوفك ونس
وحلمك وطن
وبنى آدمين
أما عن أحوالنا يامجدى
فأنت سيد العارفين
لسه يامجدى
ليل القاهرة بايخ
ولسه ع المنابر مشايخ
بتدعى بطولة العمر
لأصحاب الدار
وتقول آمين
ولسه حكم البراءة
مكافأة اللصوص والمجرمين
ولسه عايزين ناكل عيش
ونربى العيال
لكن لا العيال بتكبر يامجدى
ولا إحنا كمان عايشين
عارف يامجدى..
أجمل ما فى الألم
كشف لنا عن
ضعفك الجميل
ودمعتك القريبة
وابتسامتك الرقيقة
بدرى أوى يامجدى
عرفت الحقيقة
وعشت العمر كله
ف كام دقيقة
زى أى فارس نبيل
وده قدرك يا طيبة
ياعروسة النيل
كل ما يروح حد م الحبايب
ينطفى جواكى قنديل
يعوض عليكى ربنا
عوض الصابرين

هناك 12 تعليقًا:

nody يقول...

مجدى مهنا وحش مصر كلها

لن انسى يوم وفاته

حسيت لاول مره يعنى ايه العين والقلب يبكوا من غير دموع

الشعب لابد له من حكومه تشكمه يقول...

اعتقد مفيش حد فى مصر مش بيحب مجدى مهنا,,وهو فعلا صحفى يحترم ومش عاوزه اقول كان.
انا لسه فاكره مانشيت المصرى اليوم يوم وفاته كان:
مجدى مهنا مات يامصر..
تحس انه عنوان صعب جداااا وبيهزك من جواك كان فى حاجه بتصرخ...
انت حلمت بمجدى مهنا وانا حلمت حلم غريب جدااااااااا جداااااااااا لدرجة انا لسه مفوقتش من ذهول الحلم ده

مواطن مصري يقول...

الله يرحمة نفتقد الصحفي الحر مجدي مهنا فكلمات الانسان الصادق تبقى اما مناضلي قنوات الجزيرة فيرحلون دون ترك بصمة في الحياة

well يقول...

ثقافة حتى فى الاحلام
انا عاوز اقولك ادعيله الدعاء هيفيده
تحياتى

Unknown يقول...

الله يرحمه
بجد كان راجل بمعني كلمة راجل مش زي الناس بتوع هشتكنا و بشتكنا

Kalimalhus يقول...

تصدق؟؟ لسه مش مصدق.. و كل مرة يمر على شيئ مكتوب أو مسموع يقول إن مجدى مات مابصدقش و أقول: ده أنا لسه قاريله من يومين و شايفه إمبارح .. و أهم من كده مستنى أقراله بكره و محتاج أشوفه كل يوم..

نفس الشعور بحسه تجاه العظيم عبدالوهاب المسيرى ..

يمكن أكتر إتنين مش ممكن احس بغيابهم لأنهم جزء من الوجدان..

بلاش فضايح يقول...

اولا ازيك يا احمد

مصر مش مكتوبلها تتصلح ولا تقف على رجلها
كل ماحد ييجى يحييها فجأة يختفى ويحسر القلب عليه وعليها وعلينا

البقاء لله
احنا كمان كلها أيام ونحصله

تقبل مرورى

Ramy Wasel يقول...

رحمه الله رحمه واسعه
كان من اشرف الرجال
ومن الرجال الذين يقال عنهم اولاد مصر

ديالا يقول...

الله يرحمه

كان بجد انسان وصحفي فوق الرائع

مع احترامي

تقبل مروري

غير معرف يقول...

الله يرحمه.....اخر الرجال المحترمين
انا مش هقدر اوصف حزني لوفاه هذا الرجل.......الكلمات اعادت الاحزان الى نفسي
الله يرحمه

Kiara يقول...

ربنا يرحمه بجد

كان راجل اوي

وحشنا كلنا مش انت بس

MaNoOoSh يقول...

الله يرحمه

بجد كان من اكتر الاعلاميين اللي بحبهم وبحترمهم